Isaias 7 - Tagbanwa

³ Kat iting timpu miyabut duꞌun it ki Isaias i ampang it AMPUꞌANG DIYUS nga magꞌaat, “Pabayaꞌen mu i anak mu nga si Sear-Jasub ka susmuun mi si Acaz. Maparagan mi yan kanya asan it kiyaꞌpusan it binwat nga pagpaburusan it danum mi nga maggaring duꞌun it tumbud nga kat taga bukid nga ayun it siyudad, asat dalan ngayan nga magꞌaduꞌun it bebladan it mga pakayan.

⁴ Maat i aaten mu it kanya, ‘Magꞌintur ka, ayaw kat patarantaꞌ u iꞌlam baw ega maranggaꞌan ka it nakem sabap it masyadu nga iseg ni Resin nga taga Siria baw ni Peca nga anak ni Remalias. Ka, duwa ngaytu, subung sira it duwang puꞌun nga kayu nga magtabuk temed ega magdeleg.

⁷ Akuytu nga AMPUꞌANG DIYUS i magꞌampang ngaytu nga ega talaga makatabus nira i kubwaten nira ngayti.

^9b Aku ngaytuy sarigan mi, sabap in ega mapaꞌgen i pamayaꞌ baw pagsarig mit aken, ega naga papaꞌgenen kamuy imyu.’”

¹⁰ Itu siꞌ i ipiyagsugid it AMPUꞌANG DIYUS duꞌun it ki Acaz nga magꞌaat,

¹¹ “Mangut ka it imandaꞌan sinit aken nga AMPUꞌANG DIYUS mu, imandaꞌan it matuud i inaat ku pasar it duwa ngayan nga magkurumpak it imu. In ari ireg mu nga garingan, unu, duꞌun it seled it lugtaꞌ u duꞌun it langit?”

¹² Katubag si Acaz, maat ya, “Ega bayan mangut aku. Unuka sukda-sukdanan ku i AMPUꞌANG DIYUS?”

¹³ Kaꞌampang si Isaias, maat ya, “Pagnegan mi, kamu nga mga tungtung-inapuꞌ ni David. Unu, kurang pat imyu i magpasked it masigkataw mi ka pati Ampuꞌang Diyus ku, pagpaskedan mi gasiꞌ?

¹⁴ Aypaꞌ AMPUꞌANG DIYUS na ngaytu i megay it imyu it imandaꞌan, imandꞌan nga dumarugmatiꞌ i esang babay nga ega paꞌ naglabay it lalaki. Sumakit nga anak ya, lalaki. Emmanuel i ipangaran it kanya.”