Isaias 65 - Tagbanwa

Ega puuꞌun it Ampuꞌang Diyus i kapuꞌsaan it mga Israelita. May ipaꞌped naga nga sang bagiꞌ nga dekeyeꞌ

⁸ Itu paꞌ i pagꞌaaten it AMPUꞌANG DIYUS, “Ega ibuntal i sang parungpung nga ubas basta may magayeng letes nga magkabwat nga pagꞌimnun. Atkayan naga i buwaten ku kat bangsa ngaytu nga Israel. Ega muꞌsat kanira i puuꞌun ku. Ipaꞌped ku naga i mga kamatuudan nga taawan ku, nga sira i makasbung it magayeng letes ngaytu.

⁹ Garing duꞌun it mga tungtung-inapuꞌ ni Jacob nga kat kuyunan ni Juda, pisiꞌen ku i subuk ipiyagꞌareg ku nga biꞌni baw ilwak ku siꞌ duꞌun it rugar ku ngayti nga mabukid. Subliyen siꞌ i iting rugar it mga piniliꞌ ku nga taawan, baw taꞌidan siꞌ it mga kamatuudan nga manigsirbi ku.

¹⁰ Iyan mintang it Saron, magbaraꞌ nga magayeng papakaꞌnan it tupa. Baw iyan Acor nga duꞌut piyagtengaꞌan it mga bukid, magbaraꞌ nga maꞌimbeng nga papaꞌnaan it bakaꞌ. Ipasubli kuytu kat mga taawan ku, kumpur magpaꞌres it kamatuudan nga pagkilala it aken.

¹¹ Temed belag i mabetangan mi in indiꞌan mi aku, baw in ega na kat ulu mi i Mungsuꞌ it Sion, iyan mungsuꞌ ku nga ega basta-basta. Ka iyan i pagsirbiyan mi baw pagsambaen it mga ipagbegay nga pasalamat, mga pagbete-beteꞌen nga diyus nga si Suwirtiꞌ baw si Sukud.

¹² Magꞌaꞌareg it imyu nga tarep basiꞌ i ipatay mi. Iyan i baraꞌan it sukud mi! Ka iyan pagtaꞌwagan ku kamu, daꞌkamu timnubag it aken. Baw iyan ipiyaꞌabut kut imyu i ampang ku, daꞌkamu nagpagneg. Yay namuyaan ku nga pagsariyen mit buwat, purus na karaꞌe-raꞌetan kat panleteg ku. Iyan nga ega pagsagyaan ku i pagragaen mit muwat.”

Baꞌgung langit baw banwa i gunaen it Ampuꞌang Diyus kat pagdadarapaꞌen

¹⁷ Maat it Ampuꞌang Diyus, “Gumuna akuytu it baꞌgung langit baw baꞌgung banwa. Iyan mga bagay kat tagnaꞌ nga mga timpu, talagang ega na mademdeman it taw. Ega na talaga mangbit kat nakem nira.”