Isaias 6 - Tagbanwa

Pagrumra it Ampuꞌang Diyus it ki Isaias kat katengdanan nga prupitaꞌ

¹ Iyan taꞌun nga pagpatay it adiꞌ nga si Uzias, naltegan ku it subuk pagtagaynepen i AMPUꞌANG DIYUS. Magꞌaꞌdung kanya duꞌun it araꞌdungan it adiꞌ. Talagang mataꞌas kanya baw subraꞌ nga mabantug. Iyan sagyaden it gulamen ya, magkukulumbung nat kapuꞌsaan it daꞌtag it Templo.

² Baw duꞌun it palibut ya may mga pagpangaranan it serapin nga mamagtitindeg. Kada esa, tagꞌeꞌenem i elad ya. Duwa i magtatagnep it rupa nira, duwa i magtatagnep it mga aꞌay, baw iyan duwa, yanay paggamiten nga ipaglayug.

³ Sigi-sigi nga gaꞌuy-gaꞌuy nira nga magꞌaat, “Ega babasta-bastaen baw talagang alaid nga banar kat muꞌsang kasalaꞌan i AMPUꞌANG DIYUS nga landaw nga gunaan. Iyan kabantugan ya, talagang magpanlekep it muꞌsang banwa.”

⁴ Kat kadakulaꞌ it panggaꞌmaran nira, namagruyag i mga pakseg it balay ngayti nga papagsambaan, baw napnuꞌ it tabuk i duꞌun it seled ya.

⁵ Kaꞌampang aku, “Unu nay baraꞌan ku kaytu it purus na maraꞌe-raꞌet i magliꞌwan kat baꞌbaꞌ ku, baw pagtataꞌidan ku, kasagpun it mga taw ngaytu nga maraꞌe-raꞌet gasiꞌ i kat baꞌbaꞌ nira. Siguraduytu nga maꞌilang aku naytu sabap makasalaꞌan aku nga nakalteg it AMPUꞌANG DIYUS nga landaw nga gunaan, kanya nga ega basta-bastang Adiꞌ.”

⁶ Bawnga may limnayug nga serapin ngayti, minlep duꞌun it aken. May pagseskelen ya nga kiyupit ya nga baga duꞌun it papangantengan.

⁷ Ipiyadiꞌkit ya duꞌun it bibig ku i baga ngayti baw maat ya, “Ega nay sasalaꞌ mu. Naparaw na i mga kasalaꞌan mu.”

⁸ Bawnga nagnegan ku i ampang it AMPUꞌANG DIYUS nga magꞌaat. “Siyuytu i taꞌgen ku? Siyuy papanawun namen?” Katubag aku, maat ku, “Wayni aku. Aku na i taꞌgen mu.”

⁹ Maat siꞌ it AMPUꞌANG DIYUS, “Ta, in atkayan, mapanaw ka na, ka aaten mu i iting mga taw, ‘Maski manamar kamu nat pagneg, daꞌkamu makasepsep. Maski semyek kamu na nga semyek, ega makilaan mi i pagletganan mi.’

¹⁰ Tulduꞌan mu sira it ipagpasugid ku isaꞌun limiꞌwan nga demsen i ulu nira, nga subung it benglen i talinga nira baw belgen i mata. Ka in daꞌga, barang mamagkalteg naga sira, mamagkagneg naga, mamagkasepsep naga, baw paꞌuliꞌ naga sira situt aken nga mapagayen ku naga sira, arit ega.”

¹¹ Iningkut ku, maat ku, “Seked it kaꞌnu, AMPUꞌANG DIYUS, i buwatan ku it atkayan?” Maat i tubag ya, “Seked it maranggaꞌ na i mga lansangan baw babanwaan nira baw maꞌawaꞌan nat mga taw.

¹² Seked talaga it, iyan mga katataawan, subuk ibuntal ku na, aku nga AMPUꞌANG DIYUS, duꞌun it lekat na nga banwa, baw banwa nira ngaytu, makasbung na it malayaw nga rugar nga kapupuyangtan.

¹³ Temed maski atkayan may ikasang puluꞌ nga bagiꞌ naga it mga taw nga maꞌped, baw masagyaan ku sira ka sira i mga kamatuudan nga taawan ku. Kabilangan nira, subuk tuꞌud it kayu nga piyukan situt banwa ngaytu nga tumunas naga.”