Isaias 58 - Tagbanwa

Iyan kamatuudan nga pagsunud it kaꞌirgan it Ampuꞌang Diyus

¹ Maat it AMPUꞌANG DIYUS, “Gumaꞌuy ka it ubsu-ubsun muy gaꞌmaran mu. Sugidan muy mga taawan ku nga mga tungtung-inapuꞌ ni Jacob, nga ipaꞌyag mu it kanira i mga kasalaꞌan nira.

² Sabagay aldaw-aldaw mamagsamba sirat aken, nga maat ireg nira nga ireg nga maꞌrutan i kaꞌirgan ku, subung nagat esang bangsa nga magbuwat it mataldeng baw ega magpaski kat mga urdin it Ampuꞌang Diyus nira. Mamagꞌangut sira sinit aken it mga ukuman nga mataldeng, baw kasagyaan nira kunuꞌ i pagsamba nirat aken.

³ Aypaꞌ maamaatan sirat aken, ‘Unuy kapulusan it pagpuwasa namen it ega pagbanu-banuun mu? Unuka pagpakuriꞌan namen i sadiling bilug it ega pagꞌintindiyen mu?’ Temed ta, yay matuud,” maat it AMPUꞌANG DIYUS, “kat aldaw nga magpuwasa kamu, ega talaga tingled i nakem mi sinit aken, in daꞌga ipagpasigi mi nagay sadiling kaꞌirgan baw panulus. Baw pati mga taawan mi, pasigi nga pagꞌigpitan mi.

⁴ Baw beken, in magpuwasa kamu, magmaꞌiseg kamu na. Ega maꞌlay magdaꞌe-daꞌegen kamu baw magraꞌe-raꞌeten na. Isugid kut imyu nga basta atkaytu i pagpuwasa mi, siguradu nga ega pagnegan ku i panalangin mi.

⁵ Unuy tanud mi, masagyaan kuy atkaytu nga pagpuwasa it taw? Kat pagpuwasa mi ngaytu, desa nang pagpakuriꞌan mi i sadiling bilug. Rumunggukan kamu nga subung nat mga dikut nga pagdersan. Magpakay kamu it maꞌerep baw kaꞌabuwan nay pagliꞌtidan mi. Ka barang tanud mi, basta atkayan nay pagbuwaten mi, yay kamatuudan na nga pagpuwasa. Siguru tanud mi, magkasagyaan ku na i pagbuwaten mi ngayan nga atkayan.

⁶ Itu i ireg ku nga buwaten mi in magpuwasa kamu. Pedkanan mi na i panguripen mi ngayan it kabilug mi. Medek kamu nat pakuriꞌ it beken. Baw iyan mga makukuriꞌ nga talagang ega nay magkaparagan nga ipagkabayad, puwasen mi na lamang i utang nira.

⁷ Iyan mga paggetmanan, pakaꞌnen mi. Iyan mga egay pagtataꞌidan, pataꞌiden mi asat balay mi. Iyan mga taw nga lebas na, papakayan mi. Ega daꞌgaen mi i mga kabilug mi nga magpadangep asat imyu.

⁸ Basta mabwat mi gay atkaytu, sakpen kamu nat ildaw ku nga subung it pagsingkaran nat aldaw. Madaliꞌ na manggayen i kabetangan mi. Pagtatarimaen ku nayan kamu nga pirmi, nga akuy kat uꞌnaan baw talikudan mi, aku nga egay kasubraꞌ nga kataldengan baw kabantugan.

⁹ Pagnegan kuy panalangin mi baw talagang sumambung aku in mangabang kamu. Kaꞌilangan indiꞌan mi nay panguripen baw pakuriꞌ mi it beken. Pedkanan mi nay panibabaꞌ baw ampang nga maraꞌway.

¹⁰ Paꞌresan mi it tumabang i mga paggetmanan baw ildawan i mga makukuriꞌ kat in unuy mga kakurangan nira. Sabap yay matuud, basta mga atkaytu i buwat mi, manggayen nay kabetangan mi, nga subung it sakpen kamu nat kaꞌyagan. Ka iyan kadleman nga magsasakep pat imyu kayti, magbalyu na nga subung it eyag it nakaꞌugtu.

¹¹ Baw aku nga AMPUꞌANG DIYUS, magpanguꞌna aku nayan nga pirmi it imyu. Maski magkakuriꞌan i banwa ka naꞌlay nang ega tindag it uran, pabastantiyan ku kamu it muꞌsang mga pagkaꞌilanganen mi. Pakulaꞌsiyen ku i mga bilug mi. Talagang makasbung kamu it kalulwakan nga pagpabastantiyan it buꞌbuꞌ it danum. Makasbung kamu it tumbud nga ega magkapra.

¹² Ipatindeg siꞌ it mga kabilug mi i mga balay baw kutaꞌ nga naremek-remek na. Iꞌunay nira duꞌun it mga pakseg ya nagang lagi. Bawnga yanay panaꞌwag it imyu, mga manigꞌarut it naranggaꞌ nga kutaꞌ baw mga manigꞌayus it mga mamagkaranggaꞌ na nga mga balay baw karsadaꞌ.”

¹³ Maat pay paꞌugdun it AMPUꞌANG DIYUS, “Kaꞌilangan nga ega kuntraꞌen mi i ipiyagꞌurdin ku pasar it Aldaw it Kapaꞌnaan, nga ega na sadili mi nga kaꞌirgan i buwaten mi kat aldaw ngaytu nga ipagpabetang ku nga ega basta-basta. In daꞌga, maꞌalen baw galangen mi i itung aldaw, nga papaꞌna kamu daꞌan kat sadili mi nga mga panaw baw panulus, baw ayaw kamut ampang it egay kakapulusan.

¹⁴ Ka basta masunud mi gaytu, siguradu nga maꞌimyu i ega basta-basta nga kasagyaan kat pagsirbi mit aken. Begayan ku kamu it kabantugan nga matanug kat muꞌsa nga banwa, baw masagya talagay pangaꞌgenan mi kat banwa ngayan nga ibinggay ku it kiyaꞌapuꞌ-apuꞌan mi nga si Jacob. Talagang magꞌabut tu ka aku nga AMPUꞌANG DIYUS i nagꞌampang kaytu.”