Isaias 53 - Tagbanwa

¹ Katubag i mga taw, “Subuk egay magpakimatuud it ipiyanuturan ngaytu it amen. Subuk egay tiyaꞌseb it in unu talagay pagpapuntuꞌan it mga pagbuwaten ngaytu kat keseg it guna it AMPUꞌANG DIYUS.

² Kabilangan it manigsirbi ngaytu it Ampuꞌang Diyus, esang lulwaken nga inasikasu ya it magayen, nga timnubuꞌ baw kiminseg maski nakalwak duꞌun it lugtaꞌ nga matuꞌug. Kat aten nga panleteg, egay maski unu nga kagayenan ya. Talagang in maltegan tami kanya, egay kaꞌunu-unu ya nga pagsagyaan tami.

³ Tiyeger-teger kanya it mga taw baw diyaꞌga. Talagang dakulay magkasmekan ya baw dakulaꞌ gasiꞌ i pasakit it taw it kanya. Egay maski nagpatiklib it semyek duꞌut kanya it seyek nga may sanguꞌ. Talagang tinibabaꞌ ta kanya, nga ipiyabetang ta nga egay kakapulusan.

⁴ Temed yay matuud, inakuꞌ ya i mga magkasmekan baw mga magkasusaan tami isaꞌun maꞌawaꞌ na situt aten. Tanud ta, mga kakuriꞌan nga liyabay ya ngayti, panriga it Ampuꞌang Diyus it mga kasalaꞌan ya.

⁵ Temed palan, nabungadan kanya ka timnanggung it kasalaꞌan tami nga mga taw. Sabap naga it aten nga karaꞌe-raꞌetan piyabastantiyan kanya it pasakit. Ta kayti, nagkagayen tami na it Ampuꞌang Diyus sabap it mga pakuriꞌ ngaytu nga tiyanggap ya, baw naꞌubaꞌubat nay mga kasalaꞌan tami sabap it ega ngaytu teꞌe-teꞌeng nga pasakit nga tiyanggap ya.

⁶ Kitang muꞌsa, subuk mga tupa nga namagkateꞌag-teꞌag na nga nanganya-kanya nat piyanawan. Temed, iyan ukuman nga panriga nga pagꞌangutun it kasalaꞌan tami nga muꞌsa, ipiyalabay na it AMPUꞌANG DIYUS it kanya.

⁷ Talagang piyabastantiyan kanya it pasakit baw pakuriꞌ, temed egay daꞌawa ya nga maski sang tagaꞌ. Mapiyalulus kanya nga subung it tupa nga pagtabanen na duꞌun it iꞌimatayan ka karniꞌen. Subung kanya gasiꞌ it uꞌuybun it tupa nga egay riꞌe-riꞌeng maski buꞌlugan. Ka kanya, ega nabngaꞌ i baꞌbaꞌ ya it maski sang tagaꞌ nga pamasul.

⁸ Ipiyabetang kanya it dakulang kagipitan baw inukumanan it ukum-dapit. Egay makasugid in sang unuy kadakulaꞌ it karaꞌe-raꞌetan it mga kaꞌebay-ebayan ya ka gintas nira i ginawa ya. Temed inimatay kanya sabap tiyanggung ya i kasalaꞌan tami nga mga taw.

⁹ Ilimbeng kanya, ipiyaꞌiba nat mga mamumuwat it karaꞌe-raꞌetan baw mga manggaden, lamang egay kakasalaꞌan yat kanya. Maski ampang nga aꞌakal, egay maski sang tagaꞌ nga naꞌampang ya.

¹⁰ Temed talagang pabetang-betang it AMPUꞌANG DIYUS nga pakuriꞌan baw imatayen ngaytu kanya. Sabap in buwaten kanya nga salisi nga ipagꞌangut it kapasinsiyaan it kasalaꞌan, baraꞌan ya, paꞌlayen nang banar kanya baw maltegan ya nga dumakel i mga tungtung-inapuꞌ ya. Baw, kat mga buwaten ya, matuman nga banar i kumpur ipiyabetang-betang it AMPUꞌANG DIYUS.

¹¹ Maat it Ampuꞌang Diyus, “Pagkatupus it kakuriꞌan, magantiyan siꞌ it kasagyaan, sabap matantuwan ya nga ega desang kaꞌuruꞌ-uruꞌan i siyagkaꞌan ya nga kakuriꞌan. Kat kamatuudan nga pagkilala it aken it manigsirbi ku ngaytu nga mataldeng, dakel nga taw i buwaten ya nga mataldeng kat panleteg ku. Sabap tanggungun ya i mga kasalaꞌan nira.

¹² Aypaꞌ kilalaen ku kanya nga mabantug baw bagiꞌ-bagiꞌen ya it mga kaꞌibaan ya nga makekseg i riyangpasan ya. Sabap ibinggay matag ya i sadili ya, maski ikiyagtas nat ginawa ya. Ipiyabetang kanya nga kaꞌuyutan it mga mamagbuwat it karaꞌe-raꞌetan, ka kanya na i timnanggung it kasalaꞌan it dakel nga pagtaw. Baw ipiyanalangin ya paꞌ nga pasinsiyaen na i mga makasalaꞌan.”