Isaias 45 - Tagbanwa

Paꞌrut it Ampuꞌang Diyus pasar it adiꞌ nga si Ciro

¹ “Aku ngaytu nga AMPUꞌANG DIYUS, ituy ipagsugid ku it adiꞌ nga si Ciro nga piniliꞌ baw ipatindeg ku nga muwat it ipiyabetang-betang ku. Si Ciro ngaytu, begayan ku kanya it kakayaan nga mandaꞌeg it mga kababangsaan nga rumpakan ya. Awaꞌan kut keseg i mga adiꞌ duꞌun it mga rugar nga kulungun ya isaꞌun abriyen nira i mga puwirtaꞌan it kanirang siyudad. Talagang egay siyudad nga kulungun ya nga daꞌga maꞌabriyan i puwirtaꞌan.

⁴ Ituy ampang kut kanya, ‘Ipatindeg ku ikaw kat ikagayen it mga tungtung-inapuꞌ ni Jacob nga manigsirbi ku, iyan bangsa nga Israel nga piniliꞌ ku. Akuy nagpabetang-betang it in siyu ka nga taw nga binggayan ku ikaw it dakulaꞌ nga kabantugan, maski egay uru-urut mu it aken.’”

¹³ Maat siꞌ it Ampuꞌang Diyus, “Uyun kat pabetang-betang ku nga purus mataldeng, ipatindeg ku si Ciro ngaytu. Padisiran ku kanya kat muꞌsang buwaten ya. Ipabwat ya naga i siyudad ku nga Jerusalem, baw iribri ya i mga taawan ku nga ipiyalugut ku nga dakepanen. Buwaten yaytu maski egay tumangdan u tumumbas it kanya. Aku nga AMPUꞌANG DIYUS nga landaw nga gunaan i nagꞌaat kaytu.”