Isaias 43 - Tagbanwa

Talagang pagtatarimaen it Ampuꞌang Diyus i mga taawan ya

¹ Bangsa nga Israel, kamu nga mga tungtung-inapuꞌ ni Jacob, itu i ipagsasar it AMPUꞌANG DIYUS nga nagguna it imyu. “Ayaw kamu it iꞌlam. Ipagribri ku yan kamu. Akuy nagpabetang-betang it in siyu kamu nga mga taw, nga kamu, aken talaga.

² Maski unu nga magkalabayan mi, ega yan pabaya-bayaꞌan ku kamu. In subuk luyud i mga kakuriꞌan nga magꞌabut it imyu, daꞌkamu yan malmes. U maski subuk dakulang apuy, egay kaꞌunuꞌan mi. Talagang daꞌkamu daꞌgen it maski sang unu na nga kabebeꞌgat it sukdan it imyu.

^3a Sabap aku i AMPUꞌANG DIYUS mi, bangsa nga Israel. Aku nga Ega Babasta-bastaen baw alaid kat muꞌsang kasalaꞌan i Manigribri it imyu.

¹¹ Aku i AMPUꞌANG DIYUS. Talagang aku lamang. Puyrat aken ega na talaga i beken nga Manriribri.

²² Temed kamu, mga tungtung-inapuꞌ ni Jacob, ega tiyaꞌwagan mi aku. Bangsa nga Israel, ega na nagpaꞌres kamu sumamba it aken.

^23a Maski tupa nga pagꞌantengen nga ipagsamba, daꞌkamu minggay it aken. Talagang daꞌku binggayan mi it galang it mga pagꞌimatayen nga ramu-ramu nga ipagsamba.

^24b In daꞌga yagay riyaga mi nga binwat, dakel-dakel na nga kasalaꞌan. Talagang pagpabeꞌgatan mi na aku it mga karaꞌe-raꞌetan mi.

²⁸ Aypaꞌ betanganan ku it dakulang kaꞌeꞌyaꞌan i mga matataꞌas nga magpamaalaꞌ duꞌun it Templo. Baw muꞌsang bangsa nga Israel, nga mga tungtung-inapuꞌ ni Jacob, pataꞌnan ku nga paꞌampuꞌun kamu baw tibabaꞌen it beken nga bangsa.”