Isaias 42 - Tagbanwa

Pasar it ipatindeg nga Manriribri

¹ Maat it Ampuꞌang Diyus, “Waytu na i manigsirbi ku nga pagtabangen ku. Piniliꞌ ku kanya baw pagsagyaan ku kanya nga banar. Piyapasaruman ku kanya it Espiritu Santo ku baw kamatuudan nga kataldengan i ipapanaw ya kat muꞌsang mga bangsa.

² Ega pirmi nga magpanggaꞌmaran kanya u pagdadakulaꞌen ya nga ampang. Ega gasiꞌ magpanggerak-gerak kanya duꞌun it mga karsadaꞌ.

³ Ega luꞌtasen yat mungguꞌ i kubungu-bungguꞌ na, u parngen ya i magkedyep-kedyep mana nga tidaw. Baw purus mataldeng nga pangukuman i ipapanaw ya.”

⁶ Ituy pagꞌaaten it AMPUꞌANG DIYUS, “Uyun kat pabetang-betang ku nga purus mataldeng, ipiyatindeg ku ikaw. Tatarimaen baw tabangen ku ikaw nga pirmi. Ikaw i ibgay ku nga bilang tidaw kat muꞌsang mga bangsa, nga papaꞌgen it pakiꞌupakat ku it katataawan.

⁷ Ikaw i pamukrat it mga beleg, baw paliꞌwanen mu i mga pinirisu it kadleman.

⁸ Aku lamang nga AMPUꞌANG DIYUS i kamatuudan nga Ampuꞌan it muꞌsa. Ega ipalugut ku nga agawun it beken i kabantugan ku, u sambaen it maski siyu i mga pagbete-beteꞌen nga diyus.

⁹ Kumpur mga inaat ku nga mabut, kayti nagꞌabut na. Mga baꞌgu na nga bagay i ipagpaꞌyag ku kayti. Parabir tu mabut, ipiyagꞌaat ku naytu nga lagi.”