Isaias 40 - Tagbanwa

Mga beken pang ipiyasurat it Ampuꞌang Diyus it ki Isaias kat timpu it adiꞌ nga si Ezequias

¹ Ituy taꞌeg ku it imyu, aku nga Ampuꞌang Diyus nga nagpatindeg it imyu. Pasagyaen mi i nakem it mga taw nga piniliꞌ ku nga mga taawan ku.

² Ibaritaꞌ mi duꞌun it mga taga Jerusalem i ipagkasagya it nakem nira. Aaten mi nga pagbilwaten ku na sira kat kagipitan nga piyalugtan kut kanira. Napasinsiya nat kanira i mga kasalaꞌan nira sabap it subraꞌ ngaytu nga panriga nga ipiyalabay ku it kanira.

³ May magpanggaꞌmaran nga magꞌaat, “Buwatan mi it dalan i AMPUꞌANG DIYUS, nga panawan ya duꞌun it rugar nga kapupuyangtan. Diritsuun baw gayen-gayenen mi i panawan ya ngaytu duꞌun.

⁴ Kaꞌilangan tambakan gasiꞌ i mga magkekelnaꞌ baw pulinasen i kada mungsuꞌ baw bukid. Diritsuun i iyan mamagliliꞌut-liꞌut nga dalan, baw pantayen i mabakutud.

⁵ Itanyag naytu sikaytu i kabantugan it AMPUꞌANG DIYUS baw maltegan na it muꞌsang katataawan. Kanyaytu mismu i nagꞌaat kaytu.”

⁶ “Manuturan ka,” maat siꞌ it ampang it esang magꞌampang. Katubag aku, “Ay, unuy ituturan ku?” Maat i tubag ya, “Ipaꞌyag mu nga, muꞌsang taw, kabilangan nira, subung it dikut baw, kagayen nira, subung lamang it mga bura-burak it dikut ngaytu.

⁷ Ka dikut, magpanluyus baw, iyan mga bura-burak, magkatagar in papsagan it AMPUꞌANG DIYUS it ginawa ya. Iyan taw, matuud nga subung lamang it dikut,

⁸ nga iyan dikut, magpanluyus baw, mga bura-burak, magkupas i kagayen nira. Temed iyan ampang it Ampuꞌang Diyus tami, talagang maneꞌteꞌ seked it kaꞌnu-kaꞌnu.”

Talagang Ega Babasta-bastaen i Ampuꞌang Diyus, baw egay kasbung it kanya

¹² Siyu yan i makasbung it Ampuꞌang Diyus nga magkatakes it kadakulat danum it dagat nga pagsaklutun ya lamang it pala-palad ya? Siyu gasiꞌ i makasbung it kanya nga magkatakes it kalayaw it langit it pagdangawun lamang? Siyuy makabtang it muꞌsang lugtaꞌ kat esang karebtangan ya lamang? U siyu yan i makatimbang it mga bukid baw mga mungsuꞌ kat titimbang ya?

¹³ Siyuy magkataꞌseb it pikir it AMPUꞌANG DIYUS? Siyuy manigpadisir ya nga magkatulduꞌ it kanya?

¹⁴ Baw ta, siyuy piyatulduꞌan ya, nga isaꞌun maꞌrutan ya lamang i iyan magayen nga buwaten kat in unu-unu nga bagay? Siyuy timnulduꞌ it kanya it dalan it kataldengan, u nagbegay it kanya it kanyang kasepsep?

¹⁵ Kat panleteg it Ampuꞌang Diyus, muꞌsang mga bangsa situt sinirungat langit, subung lamang it sang tiꞌray nga danum duꞌun it esang karebtangan, u subuk kapu-kapu lamang kat titimbang ya. Iyan mga pulaw it banwa, magkakuꞌmit ya ka, kapuꞌsaan nira, dekeyeꞌ lamang kat panleteg ya.

¹⁶ Iyan muꞌsang ramu-ramu kat talun nga duꞌun it Libano, talagang kurang paꞌ nga buwateng ipagsamba nga pasalamat duꞌun it kanya. Baw muꞌsang kayu ya duꞌun it iting bukid, kurang paꞌ nga iduꞌput nga ipagꞌanteng it mga ipagsamba ngaytu.

¹⁷ Kat panleteg ya, talagang ipagpabetang nga egay kakapulusan it muꞌsa nga bangsa.

¹⁸ Unuy mapatibayaꞌan mi it Ampuꞌang Diyus, baw unu gasiꞌ nga pagkinataw i mapasbungan mi it kanya?

¹⁹ Unu, ipasbung mi it tiyaw-taw nga binwat it esang maniggagal, nga liyulupan it bulawan baw pagsegtanan it mga kadinaꞌ nga pirak i binwat?

²⁰ Ega naga maat kapasbung kanya it tiyaw-taw it mga makukuriꞌ. Ka in ega kaya nira i mabakas nga tiyaw-taw, tumulus sira it madesen nga kayu nga ega madaliꞌ rumaꞌmuk, bawnga pabwat sira it tiyaw-taw nga makapatindeg nirat pagayen-gayen.

²¹ Unu, ega magkaꞌrutan mi? Unu, garing paꞌ it kapuꞌun-puꞌunan egay nagbaritaꞌ it imyu it ega basta-bastang kabantug it Ampuꞌang Diyus? Unu, kagayen it banwa ngaytu nga giyuna ya, ega paꞌ magpatantu it imyu it kabantug ya?

²² Iyan kalayawan it langit i bilang araꞌdungan it Ampuꞌang Diyus ngaytu. Garing duꞌun, pagꞌungaw ya it mga taw, subung lamang it kagaganggangan. Iyan langit ngaytu, ipiyakabrat ya lamang nga bilang kurtinaꞌ, u subung it bala-balay nga magkapuru-purun nga ipagpakabrat ka isaꞌun mataꞌidan.

²³ Maski matataꞌas nga mga punuꞌan u pagbayaꞌen situt banwa, kaya ya nga awaꞌan it pudir baw buwaten nga egay kakapulusan.

²⁴ Subung sirat mga luwa-luwak nga yapay kalwak, magpangkerep nga lagi ka ega pay gagamut. In paꞌyepan ya it deres, ta, manluyus na. Bawnga in pasbegen ya nga banar i deres, magabut na baw ipagperad nga subung it dagami.

²⁵ “Ta kayti, unuy mapatibayaꞌan mi it aken? Siyuy mapasbungan mi?” maat it Ampuꞌang Diyus nga Ega Babasta-bastaen baw alaid kat muꞌsang kasalaꞌan.

²⁶ Timingaraꞌ kamu duꞌun it kalayawan it langit. Siyu i nagguna it kadakel it mga bituꞌun? Siyu baꞌ i tumaꞌwag it kanira nga manresa it delem-delem kat kanya-kanyang timpu? Kat keseg it guna ya pagtaꞌwagen yay kada esat kanira kat kanya-kanyang pangaran. Egay maski sangbat nga daꞌga remsa nga simingkar.

²⁷ Bangsa nga Israel, unuka magpamasul kamu nga maat mi ega magkaꞌrutan it AMPUꞌANG DIYUS i kabetangan mi, baw pagbaliwalaꞌen ya i ega pagbegayan kamu it kataldengan?

²⁸ Unu baꞌ, ega makaꞌrutan mi? Unu, ega nabaritaꞌan mi nga AMPUꞌANG DIYUS ngaytu nga egay pinꞌunan baw egay kaskedan, kanya nga nagguna it muꞌsang banwa, talagang ega kanya magkalpuꞌan, baw ega pagtaluun? Baw egay maski siyu nga kataꞌseb it pikir ya.

²⁹ Iyan mga malulubay baw mga marurupuk na, pagpakulaꞌsiyen ya.

³⁰ Ka maski mangaꞌwaꞌen paꞌ nga taw, magkalpuꞌan baw pagtaluun naga seked it makasuꞌsub na nga naꞌubsan it keseg.

³¹ Temed iyan nga magꞌuꞌunay i pagsarig baw pamayaꞌ nira it AMPUꞌANG DIYUS, talagang pirmi sira nga pagbastantiyen it kakayaan. Kat kadakulat kakayaan nira ngaytu, subung sirat kalayug duꞌun it dibwat nga banar, nga subung it agila nga egay kalpuꞌan yat kerab-kerab. Malagyu sira nga malagyu temed ega epaꞌan. Mapanaw sira nga mapanaw, subung naga, ega naga malpuꞌan sira.