Isaias 2 - Tagbanwa

Kagayenan nga mabut kat pagdadarapaꞌen

¹ Itu siꞌ i ampang it Ampuꞌang Diyus nga ipiyaꞌrut ya it ki Isaias, nga anak ni Amoz, pasar it Juda baw Jerusalem.

² Asan nat sauryan nga timpu, iyan mungsuꞌ nga pagtitindegan it Templo, nga papagsambaang balay it AMPUꞌANG DIYUS, ipataꞌas na nga makasubraꞌ it muꞌsa nga mga mungsuꞌ nga beken. Baw kat iti nga timpu magsigꞌabut duꞌun i muꞌsa nga mga bangsa.

³ Dadaklan talaga i mabut baw maat nira yan, “Daliꞌ kamu na. Tumungul tami duꞌun it mungsuꞌ ngayti it AMPUꞌANG DIYUS, duꞌun it balay nga papagsambaan it kanya, kanya nga Ampuꞌang Diyus ni Jacob, isaꞌun maꞌrutan tami i mga dalan ya, baw maꞌubas ta na nga sumunsun it mga dalan ya ngaytu. Sabap manggaring duꞌun it Sion i mga urdin it AMPUꞌANG DIYUS, baw duꞌun it Jerusalem i garingan it ampang ya.”

⁴ Begayan ya it kaꞌayusan i muꞌsang mga bangsa, baw dakel i taldengen ya sabap it pikir nira nga pandaꞌeg-daꞌeg. Sikayan pamwaten nira na nga aradu i mga basiꞌ nira nga paggamiten in magpakibunuꞌ. Iyan nga besak, buwaten na nga gagapas. Ega nay magꞌaraꞌaram it pagbunuꞌ sabap it ega nay pagbunuꞌ ngaytu.

⁵ Daliꞌ kamu na, mga tungtung-inapuꞌ ni Jacob. Kaꞌilangan nga mangaꞌgenan tami na kat kaꞌyagan nga ipagbegay it AMPUꞌANG DIYUS.

¹⁹ Talagang magsigpatataguꞌ i katataawan duꞌun it mga kubkub baw duꞌun it mga bulauꞌ sabap it iꞌlam nira it iseg it AMPUꞌANG DIYUS, baw kabantugan ya nga ega babasta-bastaen kat aldaw ngayan nga payegyegen yat egay pateng i muꞌsang banwa, nga betanganan yat ukuman i kasalaꞌan it taw.

²⁰ Kat iyan nga aldaw, iyan mga tiyaw-taw nga bulawan baw pirak i binwat, nga siyari nirat buwat nga kanya-kanyang pagsambaen, ibuntal nira lamang baw pataꞌnan nga pugadan it mga angbeꞌ baw pamanwaan it kalalagbeng.