Isaias 11 - Tagbanwa

Esa gasiꞌ nga paꞌrut it Ampuꞌang Diyus pasar it ipatindeg nga Manriribri

¹ Iyan pagkaꞌadiꞌ it kaduguꞌ-duguꞌan ni David, kabilangan ya, subuk begtek it kayu nga piyukan. Temed kat kaduguꞌ-duguꞌan naga ni David, limiꞌwan i esang adiꞌ nga kabilangan ya, esang tumunas siꞌ nga kayu duꞌun it tuꞌud ngayti it kayu nga piyukan.

² Pasarum duꞌun it kanya i Espiritu Santo it AMPUꞌANG DIYUS, nga yay tumaban it kanya it kasepsep it muꞌsang bagay. Kat keseg gasiꞌ it Espiritu Santo ngaytu, kumaꞌrut kanya nga banar, paꞌiguꞌ-iguꞌ kanya it magayen, baw magmaꞌiseg i nakem ya kat pagsarunga it katengdanan ya it may kamatuudan nga galang nga may iꞌlam ya it AMPUꞌANG DIYUS.

³ Talagang kilalaen ya nga pirmi i kumpur kaꞌirgan it AMPUꞌANG DIYUS. In mukuman kanya, ega yay pisiꞌan ya it ibetangan yang ukuman, sabap it naltegan lamang u magkagnegan duꞌun it beken.

⁴ Talagang mataldeng nga ukuman i ipapanaw ya kat ikagayen it mga makukuriꞌ baw mga mapiyababaꞌ situt sinirungat langit. Temed, iyan mga karaꞌe-raꞌetan gay paglabiyen, talagang rigaen yat ega makatindeg. Ampang ya ngaytu in mangukuman, subuk dakulang sungkud nga itiꞌkul it banwa.

⁵ Kataldengan baw kamatuudan nga bulun i ipapanaw ya kat pamaalaꞌ ya.

⁶ Kat pamaalaꞌ ya ngaytu, magsagpun nat taꞌidan i mga bunglun baw mga tupa. Magꞌumid nay magꞌigaꞌ nga mga leopardo baw mga uꞌuybun it kambing, atnaga i mga uꞌuybun it bakaꞌ baw leon. Baw yanay magꞌaꞌarigra it kanira, dekeyeꞌ paꞌ nga waꞌwaꞌ.

⁷ Iyan mga bakaꞌ, sang siraan nay mamagpangaꞌen it mga ramu-ramu nga oso. Iyan mga anak nira, magꞌuli-uliden nay magꞌigaꞌ. Ega na kumakaꞌen nga ramu-ramu i mga leon ka kumaꞌen nat dikut nga subung nat mga bakaꞌ.

⁸ Iyan paduduꞌun paꞌ nga waꞌwaꞌ, duꞌun na it tepa-tepad it lamun it dukul i kakalabtaꞌan ya. Baw egay kagatdan it maski siyu nga waꞌwaꞌ maski ruꞌukan yat alima ya i lamun it dukul nga dalitan.

⁹ “Talagang ega nay mamasakit u manranggaꞌ duꞌun it ega basta-bastang mungsuꞌ nga piniliꞌ ku,” maat it AMPUꞌANG DIYUS. “Sabap, kat iting timpu, mapnuꞌ i muꞌsang banwa it kamatuudan nga pagkilala it aken, subung na it kapnuꞌ it dagat duꞌut kanyang rugar.”