Genesis 8 - Tagbanwa

Mimbas na i luyud nga ikiyatunaw nat banwa

¹ Ta, ega nalipatan it Ampuꞌang Diyus si Noe baw muꞌsang mga kaꞌibaan ya duꞌut pagsasakayan nira ngayti. Aypaꞌ ka piyaꞌyep ya nay deres kat sagpaw it lugtaꞌ. Ta, nagpapuꞌun nat mebas-ebas na i danum,

² beken it mindek na i tumbud it danum baw timniꞌdaw nay uran.

³ Magsisiging magkayaꞌmat nat mebas i danum seked it may sang gatus baw lima nang puluꞌ nga aldaw garing it nagpapuꞌun i uran.

⁴ Bawnga, pagꞌabut it ikasang puluꞌ may pitung aldaw it ikapitung bulan, simnangrad na i pagsasakayan ngayti na Noe duꞌut esang bukid nga pagpangaranat Ararat.

⁵ Sigi na nga ebas it danum. Naꞌbut i sang pulung bulan, uꞌnang aldaw it bulan, magkatandaꞌan na i mga siyagpawan it mga bukid.

⁶ Ta, garing sikayti, iyan nagtaꞌlib nay epat nga puluꞌ pang aldaw, inabriyan na ni Noe i lalawagan nga binwat ya duꞌut pagsasakayan nira ngayti.

⁷ Pagkaꞌabri ya, ipiyalayug yay sang batung manu-manuk nga ugak. Yanay binwat it ugak ngayti, layug-layug it magpasuliꞌ-suliꞌ, seked napra nay danum kat sagpaw it lugtaꞌ.

⁸ Bawnga sunud sing ipiyalayug ni Noe, kalapatiꞌ, isaꞌun masiguru ya in napra na i danum.

⁹ Temed ega pay magkaparagan it kalapatiꞌ ngayti nga mapakay ya nga mataꞌpunan. Aypaꞌ miyuliꞌ naga duꞌun it ki Noe nga duꞌut pagsasakayan ngayti, ka danum pang muꞌsay banwa. Magꞌabut i kalapatiꞌ ngayti, pagkayapen ni Noe. Ipiyasled ya siꞌ duꞌut pagsasakayan nira ngayti.

¹⁰ Yapaꞌ siꞌ ipalayug ni Noe i kalapatiꞌ ngayti ka nakapitu.

¹¹ Apu-apun manay ipiyagꞌuliꞌ it kalapatiꞌ ngayti duꞌut ki Noe. Mabut may pagtatangagen ya na nga egenen nga daꞌun it olibo. Pagkalteg ni Noe kayti, naꞌrutan ya nga magkapra na i danum, ka pagtubuꞌan siꞌ it mga kayu.

¹² Minlat siꞌ si Noe it seked it kapitung aldaw, bawnga ipiyalayug ya siꞌ i kalapatiꞌ. Ta, ega na miyuliꞌ duꞌun it ki Noe.

¹³ Iyan magꞌidad na si Noe it enem nga gatus baw sang taꞌun, uꞌnang bulan, intrada gasiꞌ it bulan, tinꞌugan nay muꞌsang sagpaw it lugtaꞌ. Rimbangan ni Noe i atep it pagsasakayan nira ngayti bawnga nanlawag-lawag. Ipabeyeng-beyeng yay mata ya, ega nay danum, natꞌugan nay lugtaꞌ.

¹⁴ Ikadwang bulan, ikadwang puluꞌ may pitung aldaw, diminsen nay lugtaꞌ.

Nagbuwat si Noe it panalisi nga ipagpasalamat ya duꞌun it Ampuꞌang Diyus

¹⁵ Iyan madesen na ngayti i lugtaꞌ, inaat nat Ampuꞌang Diyus si Noe.

¹⁶ Maat ya, “Ta, manliꞌwan kamu nang muꞌsa. Lumampud kamu na magꞌasawa, baw mga anak mi, pati mga asawa nira.

¹⁷ Ipaliꞌwan mu na gasiꞌ i muꞌsang maginawa nga kaꞌibaan mi asat siyakayan mi ngayan, manu-manuk baw ramu-ramu, pati mga magkambang i pamanaw, isaꞌun manganak-anak sirang muꞌsa, dumakel siꞌ i situt sinirungat langit.”

¹⁸ Aypaꞌ egay beken, limnampud na na Noe nga muꞌsa, asawa ya, mga anak nira, pati mga asawat mga anak nira ngayti, namaglampud nang muꞌsa.

¹⁹ Namagpanliꞌwan na gasiꞌ i muꞌsa ngayting mga ramu-ramu, pati mga magkambang i pamanaw, baw muꞌsang mga manu-manuk. Kada kalasi ngayti, nanliꞌwan na.

²⁰ Bawnga nagbuwat si Noe it papangantengan it ipagsamba duꞌun it AMPUꞌANG DIYUS. Pagkaꞌman ya, minsiꞌ kanya kat mga ramu-ramu baw manu-manuk nga mapakay nagang ipagsamba ka isiyalisi ya duꞌun it AMPUꞌANG DIYUS. Mga iti ngayti nga ipagpasalamat ya, inanteng ya duꞌun it papangantengan ngayti.

²¹ Siyagyaan it AMPUꞌANG DIYUS nga inarek ya, bawnga maat it AMPUꞌANG DIYUS kat sadili ya, “Ega na sumpaan kut sumaꞌup i banwa sabap it kasalaꞌan it taw. Pagꞌuꞌrutan ku nga karaꞌe-raꞌetan i nakapnuꞌ it nakem it taw garing pat pagwaꞌwaꞌ ya. Temed ega na puuꞌun ku i muꞌsang maginawa nga subung it binwat ku ngaytu.

²² Paꞌuꞌuma baw pakakayeg, panguran baw pangaldaw, aldawun baw delemen, mintras ega paꞌ naꞌbut i umur it banwa, sigi paꞌ i muꞌsa ngaytu.”