Genesis 6 - Tagbanwa

Karaꞌe-raꞌetan nay nakapnuꞌ it banwa

¹ Iyan dimnakel nay taw kat sinirungat langit, nagsigꞌanak-anak na. Dakel na nga mga babay i ipiyanganak.

² Paribasay mga daraga i mga babay ngayti nga anak it taw, naꞌirgan it mga anak it Ampuꞌang Diyus. Egay beken, siyari nira nat asawa i kanya-kanyang naꞌigut mata.

³ Ta it atkayti na, maat it Ampuꞌang Diyus, “Ega na ipasigi ku i buwat it Espiritu Santo ku nga magpadisir baw magsupil it katataawan, sabap nagpadura-duraꞌit na sira it adat nga maraꞌe-raꞌet. Takaꞌ ildawan ku naga sira it sang gatus baw duwang puluꞌ nga taꞌun i kaꞌlay.”

⁴ Kat iti nga timpu, timpu ngayti nga namagpangasawa na i paꞌaaten nga mga anak it Ampuꞌang Diyus it mga paꞌaaten nga mga anak it taw baw namagꞌanak-anak na ngayti, may mga taw na nga lagi nga pagtaꞌwagen it Nefilim. Nagpanaw paꞌ it naꞌlay may iti paꞌ nga mga taw. Baw mga Nefilim ngayti, matanug nga mga mandadaꞌeg nga mga taw.

⁵ Namuyaan it Ampuꞌang Diyus nga karaꞌe-raꞌetan nay nakapnuꞌ duꞌun it katataawan ngayti, ka pagsumbayaꞌen na nira nga banar i muꞌsang karaꞌe-raꞌetan kat nakem nira.

⁶ Talagang nasmekan it AMPUꞌANG DIYUS i in unuka giyuna yay taw baw piyadakel kat sinirungat langit. Talagang nasusa nga banar i nakem ya.

⁷ Iyan atnakayti, maat it AMPUꞌANG DIYUS, “Puuꞌun kuy katataawan nga giyuna ku kat sinirungat langit. Ega lamang taw, pati mga ramu-ramu baw manu-manuk, ka magkasmekan kuy in unuka giyuna ku sira.”

⁸ Temed si Noe ngayti, siyagyaan kanyat AMPUꞌANG DIYUS.

Tiyaꞌeg si Noe nga muwat it masakayan nira nga sang anakan isaꞌun maribri

⁹ Talagang si Noe ngayti, mataldeng kanya kat panleteg it Ampuꞌang Diyus. Kat iting timpu, kanya lamang i magayen nga adat it taw, ega nay beken. Talagang pagpaꞌresan ni Noe i kaꞌirgan it Ampuꞌang Diyus nga bilang kaꞌiba-iba ya nga pirmi.

¹⁰ Baw yanayan, lalaki nga tulu i anak ya, si Sem, si Cam baw si Jafet.

¹¹ Temed kat mga beken nga taw, piyaraꞌe-raꞌet nira nang banar i pangaꞌgenan nira. Talagang karaꞌe-raꞌetan nay nakapnuꞌ kat paꞌari-aring rugar.

¹² Kamatuudan, kat panleteg it Ampuꞌang Diyus, talagang karaꞌe-raꞌetan nay betang it sang kinleban.

¹³ Iyan atnakayti, inaat it Ampuꞌang Diyus si Noe, “Kayti puuꞌun ku nay muꞌsang taw, pati banwa ngaytu, tunawun ku na, sabap talagang punung-punuꞌ nay banwa ngaytu it karaꞌe-raꞌetan nira.

¹⁴ Takaꞌ imu, magbuwat ka it subuk dakulang baul nga masakayan mi. Kayu nga sipres i buwaten mu. Seled-seleden mu in maꞌman mu na baw palanayan mut paparkat i paseled paliꞌwan isaꞌun ega tubudan.

¹⁵ Baw magꞌaꞌatkayti i pamwat mu, tulung gatus nga parasikwan i kaꞌabwat, limang puluꞌ nga parasikwan i bukaꞌ ya, baw katagbaw ya tulung puluꞌ nga parasikwan.

¹⁶ Atpan muy sakayan ngaytu nga buwaten mu baw dingdingan, temed ega iparapat duꞌut atep i pandingding, mga sang parasikwan i kataꞌal. Buwatan mut tulung ruknuꞌ i daꞌtag ya. Buwatan mu gasit liliꞌwanan bawnga talaꞌpan.

¹⁷ Atkaytuy buwaten mu sabap magꞌaꞌabut talaga nga ipapanaw ku kat muꞌsang banwa i ega basta-bastang lenep, isaꞌun mapuuꞌ i muꞌsang maginawa kat sinirungat langit. Matay sirang muꞌsa.

¹⁸ Temed may ipakiꞌupakat ku it imu. Aypaꞌ pagkaꞌman mu it sakayan ngaytu, pasakay kamu nang muꞌsa, duwa kamu magꞌasawa, pati mga anak mi, uyut gasiꞌ i kanirang mga asawa.

¹⁹ Baw kumargaꞌ ka naga it muꞌsang mga ramu-ramu gasiꞌ, nga kat kada kalasi tagduwang batu i ikargaꞌ mu, isaꞌun makaꞌuyut sirat imyu nga maꞌped. Lalaki baw babay i ikargaꞌ mu.

²⁰ Puꞌsaen mu, manu-manuk baw ramu-ramu, magpanaw baw magkambang. Duwang batu kat kada kalasi i ikargaꞌ mu, isaꞌun maꞌped gasiꞌ sirat kanira.

²¹ Baw dakulaꞌen mi nga kargaꞌ it muꞌsang kalasit pangaꞌen, muꞌsang kaꞌilangan mi baw kaꞌilangan it mga ramu-ramu gasiꞌ, isaꞌun daꞌkamu kurangen.”

²² Ta, muꞌsa ngayting ipiyagꞌaat it Ampuꞌang Diyus nga munaꞌaw ya it ki Noe, siyunud nga muꞌsa ni Noe.