Genesis 5 - Tagbanwa

Palangbus pang ipagpaꞌyag i pasar it ki Adan baw mga kaꞌanak-anakan ya

¹ Itu na ngaytu i paꞌyag pasar it mga kaꞌanak-anakan ni Adan. Iyan giyuna it Ampuꞌang Diyus na Adan, pamwat ya, magꞌagen-agen it kaladawan ya.

² Lalaki baw babay i giyuna ya, baw piyatdekan ya sira it ampang nga ikagayen it bilug nira. Yay ipiyangaran yat kanira, taw.

³ Magꞌidad si Adan ngaytit sang gatus baw tulu nga pulung taꞌun, nakaꞌanak sit lalaki nga subung it pagtaw-taw ya naga. Piyangaranan na ngaytit ki Set.

⁴ Garing it nakaꞌanak ngaytit ki Set, nakaꞌanak naga kanyat beken, babay baw lalaki, ka may walu pang gatus nga taꞌun seked it natay na kanya.

⁵ Pagpatay ya, siyam nga gatus baw tulung puluꞌ nga taꞌun i idad ya.

⁶ Magꞌidad si Set it sang gatus baw limang taꞌun, nakaꞌanak it ki Enos.

⁷ May sunud nagang mga anak ya ka piyaꞌlay kanyat walung gatus baw pitu pang taꞌun.

⁸ Tanan-tanan it idad ni Set, siyam nga gatus baw sang puluꞌ may duwang taꞌun bawnga natay kanya.

⁹ Magꞌidad si Enos it siyam nga pulung taꞌun, nanganak sirat ki Cainan.

¹⁰ May sunud nagang mga anak ya ka piyaꞌlay kanyat walung gatus baw sang puluꞌ may lima pang taꞌun.

¹¹ Tanan-tanan nga idad ni Enos, siyam nga gatus baw limang taꞌun bawnga natay kanya.

¹² Magꞌidad si Cainan it pitung puluꞌ nga taꞌun, nanganak sirat ki Mahalalel.

¹³ May sunud nagang mga anak ya ka piyaꞌlay it walung gatus baw epat nga puluꞌ pang taꞌun.

¹⁴ Tanan-tanan nga idad ni Cainan bawnga natay kanya, siyam nga gatus baw sang puluꞌ nga taꞌun.

¹⁵ Magꞌidad si Mahalalel it enem nga puluꞌ baw limang taꞌun, nanganak na sirat ki Jared.

¹⁶ May sunud nagang mga anak ya ka piyaꞌlay it walung gatus baw tulung puluꞌ pang taꞌun.

¹⁷ Tanan-tanan nga idad ni Mahalalel bawnga natay kanya, walung gatus baw siyam nga puluꞌ baw limang taꞌun.

¹⁸ Magꞌidad si Jared it sang gatus baw enem nga puluꞌ may duwang taꞌun, nanganak sirat ki Enoc.

¹⁹ May sunud nagang mga anak ya ka piyaꞌlay kanyat walung gatus pang taꞌun.

²⁰ Tanan-tanan nga idad ni Jared, siyam nga gatus baw enem nga puluꞌ may duwang taꞌun bawnga natay kanya.

²¹ Magꞌidad si Enoc it enem nga puluꞌ may limang taꞌun, nanganak sirat ki Matusalem.

²² Garing it pagpanganak it ki Matusalem, may tulu pang gatus nga taꞌun nga magsisiging magpangaꞌgenan si Enoc uyun kat kaꞌirgan it Ampuꞌang Diyus nga bilang kaꞌiba-iba yang pirmi. May beken naga nga anak na Enoc nga babay, lalaki, nga simnunud it ki Matusalem.

²³ Tanan-tanan nga idad ni Enoc, tulung gatus baw enem nga puluꞌ may limang taꞌun.

²⁴ Pagkaꞌbut yat iting idad, paribasay bilang kaꞌiba-iba it Ampuꞌang Diyus si Enoc ngayti, nagsipat na lamang kanya. Daꞌna magkaparagan ka pinsiꞌ na kanya it Ampuꞌang Diyus.

²⁵ Magꞌidad si Matusalem it sang gatus baw walung puluꞌ may pitung taꞌun, nanganak sira magꞌasawa it ki Lamec.

²⁶ May sunud nagang mga anak nira ka piyaꞌlay kanyat pitung gatus baw walung puluꞌ may duwa pang taꞌun.

²⁷ Tanan-tanan nga idad ni Matusalem, siyam nga gatus baw enem nga puluꞌ may siyam nga taꞌun bawnga natay kanya.

²⁸ Magꞌidad si Lamec it sang gatus baw walung puluꞌ may duwa nga taꞌun, nanganak sira it esang lalaki.

²⁹ Piyangaranan yat ki Noe, ka maat ya, “Ituy inu-inu it aten kat makuriꞌ ngaytu nga buwat ta, nga magpakariga kat pangarigrat lugtaꞌ nga siyumpaan it AMPUꞌANG DIYUS.”

³⁰ May sunud nagang mga anak ni Lamec ka piyaꞌlay it limang gatus baw siyam nga puluꞌ may lima pang taꞌun.

³¹ Nakaꞌbut i idad ni Lamec it pitung gatus baw pitung puluꞌ may pitung taꞌun, bawnga natay na kanya.

³² Magꞌidad si Noe it limang gatus nga taꞌun, nakaꞌanak kanyat sunud-sunud, si Sem, si Cam, bawnga ikatlu si Jafet.