Genesis 44 - Tagbanwa

Binwat ni Jose nga tukasiꞌ yat adat it mga sulsug ya ngayti

¹ Pagkakaꞌen, ipiyagtaꞌeg ni Jose it sarig-sarigan ya nga pamtangan nat pangaꞌen i mga sakuꞌ it mga taw ngayti, pangipnuꞌun. Baw inaat ya nga parabir taiꞌen, irgud naga duꞌun i kumpur ipiyamagbayad nira.

² “Bawnga,” maat ya, “in duꞌun nat sakuꞌ it kiyaꞌpusan ngayan, ibtang mu duꞌun i iꞌimnan ku ngaytung pirak i binwat, nga uyut it kanya nga pirak nga ipiyagbayad yat kanya.” Siyunud nga muꞌsa it sarig-sarigan i kumpur ipiyagꞌaat ngaytit kanya.

³ Pagꞌeyag it aldaw, naꞌadlem nay sang sulsugan ngayti ka piyapanaw na sira, pati mga asno nira.

⁴ Temed daꞌsira paꞌ nakaꞌalaid duꞌut siyudad ngayti, ipiyagtaꞌeg ni Jose it sarig-sarigan ya ngayti, nga maat ya, “Usigen muy mga taw ngayan nga gimnaring situt aten. In maꞌbutan mu na, aaten mu sira, ‘Unuka atkayan i itiyumbas mi it kagayen namen nga ipiyalteg namen it imyu?

⁵ Iꞌimnan ya ngayang tiyakaw mi, daꞌga baꞌ iyan nagay paggamiten ya gasiꞌ in magpintuꞌ? Talagang maraꞌe-raꞌet i binwat mi ngaytu?’”

⁶ Pagkaꞌbut nga matuud it sarig-sarigan ngayti, atkayti nay inaat ya.

⁷ Makatubag sira, maat nira, “Unuy paꞌaaten mu ngaytu? Unuka atkayay ampang mu? Yay matuud, alaid kat pikiran namen i muwat it atkayang mga bagay!

⁸ Ka ungayan ga, namuyaan mi na nga nakaꞌbut kami na duꞌut Canaan temed ipiyagꞌuliꞌ namen naga i pirak ngayang naꞌukadan namen duꞌut mga pirisiꞌen nameng sakuꞌ. Ta unuka maat tumakaw kamit pirak u bulawan kat balay it agalen mu?

⁹ Temed gasiꞌ kagalang-galang it imu, kayti in siyu manggid it amen i maꞌanuꞌan it paꞌaaten mu ngayang iꞌimnan, bagay it kanya imatayen, baw in siyuy maꞌped, uripnen mu nang muꞌsa.”

¹⁰ “Magayen nagayan,” maat i sarig-sarigan ngayti, “temed atkaytuy buwaten ta. Iyan lamang nga maꞌanuꞌan it iꞌimnan ngayan i uripnen, iyan beken liꞌwan sira.”

¹¹ Ta egay beken, imbes nirang muꞌsa i mga sakuꞌ nira ngayti bawnga iniriꞌan it taiꞌ.

¹² Inesa-esa it sarig-sarigan ngaytit mimuyaꞌ, giyaring ya duꞌut pirisiꞌen it kiyaꞌakaꞌan, isiyareg duꞌut pirisiꞌen it kiyaꞌpusan ngayti. Unupat naparagan it iꞌimnan ngayti, duꞌut ki Benjamin.

¹³ Ta pagkamuya nira, piyamagrasik niray pakayan nira kat kadakulat kasmek nira. Idinluꞌ nira siꞌ duꞌut mga asno nira i mga pirisiꞌen nira ngayti ka nagpaꞌuliꞌ siꞌ duꞌut siyudad.

¹⁴ Abutan na Juda, duꞌun pat balay si Jose. Pagkasled nira, nanluud siꞌ sira duꞌut adapan ya, nga magsusuꞌsub na sira.

¹⁵ Miyampang si Jose, maat ya, “Unuytuy binwat mi ngaytung atkaytu? Siguru ega magkaꞌrutan mi nga taw nga subuk aken ngaytu, may kiyaꞌrutan nga mamimintuꞌ, aypaꞌ ega nataguꞌ it aken i binwat mi ngaytu.”

¹⁶ “Unu nay maꞌampang namen it imu, Agalen namen?” maat ni Juda. “Unu pay aaten namen? Magꞌuꞌunu kami makamataldeng it daꞌkami baytu timnakaw, it Ampuꞌang Diyus na i magpalbaw it kasalaꞌan namen it tagnaꞌ nga rigaen ya na? Aypaꞌ waytu kami na, Agalen namen, uripen mu nang muꞌsa, pati naꞌanuꞌan ngayan it iꞌimnan.”

¹⁷ Maat siꞌ ni Jose, “Ega mapakay nga buwaten ku i atkayan, ka ega yan mataldeng nga ukuman. Iyan lamang, naꞌanuꞌan ngayan it iꞌimnan i uripnen ku. Iyan beken, muliꞌ kamu naga duꞌut amaꞌ mi it egay kaꞌunuꞌan mi.”

Namuyaan ni Jose nga nagbaꞌgu nay adat it mga sulsug ya ngayti

¹⁸ Iyan atnakayti, nagpatpad nga banar si Juda duꞌut ki Jose baw maat ya, “Tabing galang it imu, wayni kat sagpaw it ampupuru ku, esang kagalang-galang nga mataꞌas nga subung it adiꞌ. Sana ega naga dalaꞌan muy ampangen ku ngaytu.

¹⁹ Daꞌga basaꞌan, kagalang-galang nga Agalen ku, iningkut mu kami in may amaꞌ namen paꞌ baw sulsug namen nga beken?

²⁰ Katubag kami, may amaꞌ namen paꞌ takaꞌ gurang na, baw may ariꞌ namen naga nga yapaꞌ ipanganak kanya, gurang na si Amaꞌ. Nasugid namen gasiꞌ ngayan nga kuꞌkup yat kanya, patay na. Kanya manay egen. Talagang maꞌal nga maꞌal kanya it amaꞌ namen ngayti.

²¹ Ta it maat mu ngayan nga pabayaꞌen nameng pabayaꞌen kanya situ isaꞌun maltegan mu.

²² Ipiyagsugid namen ngayan it imu nga makuriꞌ makablag it ki Amaꞌ i iting waꞌwaꞌ ka barang matay i magugurang ngaytit kasmek.

²³ Temed katubag ka ngayan it amen, basta ega mapabayaꞌ namen i ariꞌ namen ngayti, ega na mapakay nga madap kami pat imu.

²⁴ Aypaꞌ muꞌsa ngaytu, ipiyagtuturan namen duꞌut amaꞌ namen, pagkaꞌuliꞌ namen nga lagi duꞌun.

²⁵ Ta, yan pagtaꞌgen kami siꞌ ni Amaꞌ nga paꞌasitu siꞌ nga mangalang it pangaꞌen,

²⁶ ipiyademdem namen it kanya nga, maat mu ngayan basaꞌan, daꞌkami na mapakay nga lumusad situt itung banwa basta ega magbabayaꞌ it amen i ariꞌ namen ngaytu. Ka maski paꞌasitu kami, basta ega magbabayaꞌ kanya, daꞌkami na tanggapen mu.

²⁷ Katubag si Amaꞌ it amen, maat ya, ‘Magkaꞌrutan mi na nga paduduwa-duwa i anak it inaꞌ nira.

²⁸ Ta it kayti nga naꞌilang nay sangbat ngayti, ka talagang subung nat paꞌaaten ku, siyamay-samay nayat kumakaꞌen nga ramu-ramu, aypaꞌ ega na pagpapaꞌbutun ku nga makitaan ku paꞌ kanya.

²⁹ Ta naꞌped ngaytu, in pabayaꞌen mi paꞌ, bawnga magated kanya, talagang matay aku nat kasmek.’

³⁰ Yay matuud, subung it ginawa it amaꞌ namen, kasugput it ginawa it waꞌwaꞌ ngayan. Aypaꞌ in mabut kami duꞌut kanya, baw mamuyaan ya nga ega nay magbabayaꞌ it aken nga waꞌwaꞌ ngayan,

³¹ siguradung egay pagduwa-duwa nga matay kanya. Ka kanya, magurang nang matuud. Talagang muꞌsa, ipakusalaꞌ ya nat amen, baw talagang pagsisiguruun namen nga kasmek ya, patayan ya lamang, ega na maꞌawaꞌ kat nakem ya.

³² Baw beken it ipinirinda kuy ginawa ku sabap it waꞌwaꞌ ngaytu. Inaat kuy amaꞌ namen ngayti nga, ‘In ega makaꞌuliꞌ ku kanya situt imu, aku i pabekbekan mut masul seked it kaꞌnu-kaꞌnu.’

³³ Aypaꞌ in beteꞌ, tabing galang it imu, in mapakay ka, aku na lamang i uripnen mu. Ega lamang it ariꞌ namen ngayan. Asi-asi pat imu nga paꞌintulutan mu naga kanya nga makabayaꞌ nagat beken ngayan nga mga sulsug ku.

³⁴ Ka talagang daꞌku makaꞌuliꞌ duꞌut ki Amaꞌ in ega magbabayaꞌ naga si Benjamin. Yay matuud, ega masagkaꞌan ku in subraꞌ nang kasmek i mabetangan it amaꞌ namen ngayti!”