Genesis 40 - Tagbanwa

Nanagaynep i duwang pirisu nga kat karguꞌ ni Jose

¹ Kat iting timpu, may napirisu nga duwang kataawan nga mataꞌas i katengdanan nira duꞌut pamalay-balay it adiꞌ ngaytit Egipto, ka may binwat nira nga ega napakay it adiꞌ ngayti. Esa, katimbang ya naga nga manigpamaalaꞌ it pagꞌimnun ya. Iyan esa, pagbayaꞌen it mga manigꞌilutuꞌ it tinapay nga pagkaꞌnen it adiꞌ ngayti.

² Ta paribasay may dakulang inisgan it adiꞌ it duwa ngayting manigpamaalaꞌ,

³ aypaꞌ pinirisu ya sira duꞌut balay it kapitan it mga guwardiya, duꞌut iti nagang pirisuwan, pagpipirisuwan ngaytit ki Jose.

⁴ Ta, egay beken, si Jose naga ngayti i piyakarguꞌan it kapitan it duwa ngayti. Kimnaꞌlay sira duꞌun nga pagpipirisuun.

⁵ Ta kaꞌsang delem, namagpanagaynep i mga pagpipirisuun ngayting manigpamaalaꞌ it pagꞌimnun it adiꞌ baw pagbayaꞌen it mga manigbuwat it tinapay ya. Nanganya-kanya sirat tiyagaynep, lamang nagsagpun it delem i pagpanagaynep nira ngayti. Ega naga nagsubung i kaꞌulugan it tiyagaynep nira.

⁶ Pagꞌeyag pagrikisaꞌ siꞌ ni Jose it mga pagkakarguꞌun ya ngayti, naꞌanuꞌan yay duwa ngayti, maꞌlung i pagkinataw nira.

⁷ Aypaꞌ iningkut ya sira, nga maat ya, “Unuka maꞌlung i pagkinataw mi kayti?”

⁸ Katubag sira, maat nira, “Namagpanagaynep kami baytu, temed egay magkasugid it amen it kaꞌulugan it mga tagaynep namen ngayti.” “Daꞌga baꞌ, Ampuꞌang Diyus lamang i magkapaꞌyag it kaꞌulugan it mga tagaynep?” maat ni Jose ngayti. “Ta, unu yay tiyagaynep mi ngayan?”

⁹ Aypaꞌ egay beken, uꞌnang nagtuturan duꞌut ki Jose it tiyagaynep, katimbang ngaytit adiꞌ nga manigpamaalaꞌ it pagꞌimnun ya. Maat ya, “Atkayti bay aken nga tiyagaynep. Maat magleteg akut sang puꞌun nga ubas duꞌut sarungaan ku.

¹⁰ Tulung kasangaan i sanga ya. Pagleteg ku, maat, miyurak, minwaꞌ, namagꞌiꞌnug nga muꞌsa.

¹¹ Maat gasiꞌ pagseskelen ku i iꞌimnan it adiꞌ. Piyuꞌpuꞌ ku maat i iꞌnug ngayting buwat ubas bawnga pinsel ku duꞌut iꞌimnan ngayti, bawnga ipiyakawaꞌ ku na duꞌut kanya.”

¹² Pagkagneg ni Jose, maat ya, “Ituy kaꞌulugan it tagaynep mu ngayan. Iyan tulu ngayang kasangaan, tulung aldaw yan.

¹³ Katlu kayti, ipaliꞌwan ka na it adiꞌ situt pirisuwan ngaytu. Ipaꞌuliꞌ ka siꞌ kat katengdanan mu. Ipakawaꞌ mu sit kanya i iꞌimnan ya, subung nagat tagnaꞌ ngayting buwat mu, nga ikaw i magpamaalaꞌ.

¹⁴ Temed beteꞌ, in gumayen siꞌ i kabetangan mu, sana demdemen mu naga aku. Sana tabangen mu naga aku nga sangpiten mu aku duꞌun it adiꞌ ngayan, isaꞌun kat tabang mu ngaytu, kaliꞌwan aku situt pirisuwan ngaytu.

¹⁵ Ka yay matuud, talagang aku ngaytu, subuk tiyakaw akuytu duꞌut banwa it mga Hebreo. Ta situ gasiꞌ, egaytuy nabwat ku nga maski unu nga maraꞌe-raꞌet nga dapat ku nga ikapirisu.”

¹⁶ Pagkamuya it pagbayaꞌen ngaytit mga manigbuwat it tinapay nga magayen i ipiyaꞌyag ni Jose nga kaꞌulugan it iting tiyagaynep, itiyuturan ya na gasiꞌ i kanya ngayting tiyagaynep. Maat yat ki Jose, “Magꞌaꞌatkayti gasiꞌ i aken nga tiyagaynep. Maat pagtatandungun ku i tulung kabaꞌayan nga pagrurgudan it tinapay.

¹⁷ Maat duꞌut magsasagpaw manggid nga baꞌay, kalasi-kalasing magagayen nga tinapay nga pangaꞌen it adiꞌ, temed pagkaꞌnen it mga manu-manuk i tinapay ngayti.”

¹⁸ Pagkagneg ni Jose, maat ya, “Ituy kaꞌulugan it tagaynep mu ngayan. Iyan tulu ngayang kabaꞌayan, tulung aldaw yan.

¹⁹ Ikatlung aldaw kayti, ipapunggut it adiꞌ i ulu mu bawnga bilug mu, ibyut ya duꞌut kayu. Ta egay beken, kaꞌnen nat mga manu-manuk i isi it bilug mu ngayan.”

²⁰ Desang ikatlung aldaw, kaꞌaldawan siꞌ it adiꞌ ngayti. Aypaꞌ nagpaꞌitsu kanya it dakulang pagkaraꞌnen bawnga inimbitar yay mga katimbang ya. Egay beken, ipiyapisiꞌ ya na duꞌut pirisuwan i katimbang ya ngayting manigpamaalaꞌ it pagꞌimnun ya, pati pagbayaꞌen ngaytit mga manigbuwat it tinapay ya. Ipiyaꞌadap ya na duꞌut adapan it mga katimbang ya ngayti nga beken.

²¹ Ipiyaꞌuliꞌ ya siꞌ i manigpamaalaꞌ ngaytit pagꞌimnun ya kat katengdanan ya nga lagi, aypaꞌ ipiyakawaꞌ ya sit adiꞌ ngayti i iꞌimnan ya nga ipagpakawaꞌ yat kaꞌlay.

²² Temed pagbayaꞌen ngaytit mga manigbuwat it tinapay, inimatay nang matuud nga ibinyut duꞌut kayu, subung nat inaat ngayti ni Jose it kanira kat paꞌyag ya it mga tiyagaynep nira ngayti.

²³ Temed ta, manigpamaalaꞌ ngaytit pagꞌimnun it adiꞌ, ega nay demde-demdem ya it tabangen ya si Jose, in daꞌga, linipatan ya na.