Genesis 32 - Tagbanwa

Napikir ni Jacob nga pandamay yat akaꞌ ya

¹ Kana Jacob, namagpanaw siꞌ. Ta sakaling may naltegan ya nga mga anghil it Ampuꞌang Diyus.

² Pagkalteg yat kanira, maat ya, “Mga anghil palan it Ampuꞌang Diyus nga magtarima it aten!” Piyangaranan yay iting rugar, Mahanaim.

³ Bawnga napikir ni Jacob, magayen in may pauꞌnaen ya duꞌut akaꞌ ya ngayti nga si Esau nga duꞌut rugar nga Seir, nga esang ngaran it iting rugar, Edom.

⁴ Maat ya it piyauꞌna ya ngayti, “Aaten mi i agalen ku nga si Esau, ‘Magpaꞌa-paꞌaat bay tugun it ariꞌ mu nga manigsirbi mu, kaꞌlay ngaytu, duꞌun aku magtataꞌid it ki Amay Laban.

⁵ Kiminseg aku na duꞌun ka dakel nay bakaꞌ, kabayuꞌ nga asno, tupa baw kambing ku, baw dakel naga gasiꞌ i mga uripen ku, babay, lalaki. Pagbaritaꞌan ku naga ikaw ka barang may maparagan ku nga ildaw mu isaꞌun magkagayen ta nagang nagsulsug.’” Ta, yan nay itinggun ni Jacob.

⁶ Pagkaꞌuliꞌ it mga piyauꞌna ya ngayti, maat nira, “Nakitaan namen nay akaꞌ mu. Kayti asan nayan kanya ka sumusmu it imu. Epat nga gatus i kadakel nira nga magpanusmu.”

⁷ Pagkagneg ni Jacob, miniꞌlam kanya nga banar. Nalibeg nga banar i pikir ya. Binwat ya, dinwa ya nga bagiꞌ i kanya ngayting mga kaꞌibaan, pati mga ayep ya ngayti.

⁸ Binwat yay atkayti isaꞌun in pagꞌabut na Esau, sulungun sira nga lagi, kapalagyu nagay sang gurupu ngayti.

⁹ Bawnga binwat ni Jacob, nanalangin. Maat ya, “AMPUꞌANG DIYUS it apuꞌ ku nga si Abraham baw amaꞌ ku nga si Isaac, magꞌangut akung banar it tabang mu, ka panaw ku ngayni, aat mu nagat aken, nga muliꞌ aku na duꞌun it aken nga banwa baw mga kaduguꞌan ku, ka tatarimaen mu naga aku.

¹⁰ Talagang subuk daꞌna bagay it aken, nga esang timawaꞌ nga taw, i mga ildaw mu ngayni. Ka yay matuud, paggaring ku duꞌun it mga giyaringan ku, rumꞌar it taban ku it dimnipag duꞌun it danum it Jordan ngayti, sungkud ku. Temed kayti, panguliꞌ ku na ngayni, bulyug-bulyug na i mga kaꞌibaan ku nga duwa ngayning gurupu.

¹¹ Kayti pagꞌangutun ku nga iribri mu naga aku kat alima it sulsug ku nga si Esau. Magregen akung banar ka barang pagkita namen, pangimatayen ya na kaming muꞌsa, mga babay ngayni, pati mga anak nira.

¹² Magꞌangut akung banar it tabang mu ka inampang mu nagat aken nga daꞌku pabaya-bayaꞌan mu. Inaat mu ngayan nga padaklen mu i mga tungtung-inapuꞌ ku nga subung it kadakel it igis duꞌut baybayan nga ega na magkabilang.”

¹³ Duꞌun nat Mahanaim ngayti i inigaꞌan na Jacob. Pagꞌeyag it aldaw, nagꞌareg nga lagi si Jacob it ibgay ya nga bilang abut yat ki Esau.

¹⁴ Ipiyagꞌareg ya, duwang gatus i kambing nga inaꞌan, duwang puluꞌ i kambing nga mandangan. Duwang gatus i inaꞌan nga tupa baw duwang puluꞌ gasiꞌ i barakuꞌ.

¹⁵ Tulung puluꞌ i magꞌaꞌanak nga kamelyo, epat nga puluꞌ i inaꞌan nga bakaꞌ, sang puluꞌ i tudu ya. Duwang puluꞌ i inaꞌan nga kabayuꞌ nga asno. Sang puluꞌ gasiꞌ i tudu ya nga ipiyaꞌuyut.

¹⁶ Kada kalasi ngayting ipiyagꞌareg ya, ipiyakarguꞌ yat sang kaꞌuripnan bawnga inaat ya sira, “Muꞌna kamu nat amen, temed inturun nga ega magtake-takeden. Kaꞌilangan alaid nga elaꞌanan it kada sang kataawan ngaytung may taban nga ramu-ramu.”

¹⁷ Maat ya it magꞌuꞌuꞌna nga uripen ya, “In magsusmu kamu nat akaꞌ ku baw mingkut kanya it imu in siyuy agalen mu, paꞌunu kaytu, baw kasiyung mga ayep i taban mu ngaytu,

¹⁸ aaten mu nga, ‘Taban ku ngaytung mga ayep, si Jacob nga ariꞌ mu nga manigsirbi mu, kanyay tagpuꞌun. Ipagbegay ya it imu nga agalen ya. Asan nayan sira it giyaringan.’”

¹⁹ Atkayti nang muꞌsa i ipiyagꞌaat ni Jacob it beken ngayti nga uripen ya nga timnaban it beken ngayti nga ramu-ramu nga ipagbegay yat akaꞌ ya ngayti nga si Esau.

²⁰ “Iyan,” maat ni Jacob, “ega lipa-lipaten mi i ipiyagꞌaat ku ngayan it imyu. Aaten mi nga magsusunud kami na.” Atkayti i binwat ni Jacob sabap kat nake-nakem ya nga, “In madamay ku na kanyat mga ipagpauꞌna ku ngaytung mga begay ku, barang magkagayen kami naga. Pagkita namen, sana tanggapen ya na aku it may magayeng nakem.”

²¹ Aypaꞌ piyauꞌna ya nay mga magtataban ngayti. Kanira, minigaꞌ paꞌ it sang delem duꞌun it piyagbalay-balayan nira ngayti.

May nabetangan ni Jacob, pagpakirbu ya

²² Iting delem, ega naga nakabara-baraꞌ migaꞌ si Jacob, ka napikir ya nga iduꞌlung ya duꞌut sang dipag it Jaboc it delemen i duwa ngayting asawa ya, duwa ngayting uripen nira nga babay, baw sang puluꞌ may esa ngayting anak ya nga lalaki.

²³ Pagkapadipag yat mga asawa ya baw mga anak ya ngayti, uyut i duwa ngayting uripen nga mga babay, piyadipag ya na gasiꞌ i muꞌsang mga kaꞌibaan ya ngayting beken, pati muꞌsang pirisiꞌen ya.

²⁴ Bawnga esa-esa ya manay nagpatuduꞌ duꞌut iting dipag. Ta, sakaling may miyabut duꞌut kanya nga subuk esang lalaki, nagrubuwan sirat seked aldaw.

²⁵ Iyan namuyaan it magpakirbu ngaytit ki Jacob nga ega pagdaꞌgen ya si Jacob ngayti, dineꞌnan yay paꞌa ni Jacob it narisar nga lagi i kapi-kapi it baliꞌlang ya.

²⁶ Bawnga maat ya, “Iꞌindiꞌ mu na aku ka aldaw na.” “Aaꞌ, ega bayan iꞌindiꞌ ku ikaw,” maat ni Jacob, “basta egay magnegan ku nga ampang mu nga paꞌildaw it aken.”

²⁷ Iningkut it nagpakirbu ngayti in siyuy ngaran ya. “Si Jacob bay ngaran ku,” maat ni Jacob.

²⁸ “Ta kayti,” maat ya, “ega na si Jacob ngayan i ngaran mu. Si Israel na, sabap nagpatikeseg ka kat Ampuꞌang Diyus baw kat mga taw, baw nakaꞌindaꞌeg ka.”

²⁹ “In mapakay,” maat ni Jacob, “sana ireg ku nga maꞌrutan in siyuy imu nga ngaran.” “Aaꞌ, unuka ireg mu paꞌ nga maꞌrutan?” maat i tubag yat ki Jacob. Ega na isiyugid yay ngaran ya. Piyatdekan ya na lamang it ampang nga may guna si Jacob.

³⁰ “Aaꞌ,” maat ni Jacob, “naꞌrutan ku na palan, Ampuꞌang Diyus na kanya. Nabilug ku na kanyat kalteg temed it daꞌku naga naꞌunu. Egen aku naga.” Aypaꞌ pangaranan yay sikaytit iting rugar, Peniel.

³¹ Maglebat nay aldaw it gimnaring na kanya duꞌut Peniel ngayti. Magpapiꞌkal manay panaw ya sabap it narisar ngayti.

³² Aypaꞌ iti i puꞌun-puꞌun it siyubli-subli nga kaꞌugaliꞌan it mga tungtung-inapuꞌ ni Israel, nga daꞌsira magkaꞌen it isi nga patuꞌ duꞌut kapi-kapi it baliꞌlang, ka iti ngayti, narisar nga bilug ni Jacob.