Genesis 26 - Tagbanwa

Nabetangan gasiꞌ ni Isaac pasar it mga tabud

¹ Miyabut siꞌ i subuk miyabut it egen paꞌ si Abraham nga getem. Gintem siꞌ i Canaan, aypaꞌ duꞌut Gerar i napaꞌugadan ni Isaac, nga sakep it adiꞌ nga si Abimelec, nga adiꞌ it mga Filisteo.

² Ka nagpakikita it ki Isaac i AMPUꞌANG DIYUS baw inaat kanya, “Isaac, ayaw kat paꞌaduꞌun it Egipto. Duꞌun i aduꞌunan mu it rugar nga iꞌaat ku it imu ka duꞌun i taꞌidan mu.

³ Baw mintras duꞌun ka, ildawan baw tarimaen ku ikaw. Sabap itung mga banwa ngaytu, ibgay ku it imu, nga subliyen it anak-inapuꞌ mu. Talagang tumanen ku i isiyanggup ku it amaꞌ mu nga si Abraham.

⁴ Talagang padaklen ku i mga tungtung-inapuꞌ mu nga subung it kadakel it mga bituꞌun duꞌun it langit. Baw talagang ibgay ku it mga tungtung-inapuꞌ mu i kapuꞌsaan it itung mga banwa, baw manggaring kat mga tungtung-inapuꞌ mu, maꞌildawan i muꞌsang bangsa situt sinirungat langit.

⁵ Buwaten kuytu sabap siyunud it amaꞌ mu nga si Abraham i mga ipiyagꞌaat ku it kanya. Talagang siyunud yay muꞌsang mga taꞌeg baw mga ipiyagꞌurdin ku it kanya.”

⁶ Aypaꞌ duꞌun nay tiyaꞌidan ni Isaac it Gerar ngayti.

⁷ Bawnga in ingkutun it mga taw duꞌun in unu ni Isaac si Rebeca ngayti, panugid ya sulsug ya, ka magꞌiꞌlam kanya. Sabap kat nake-nakem ya, “Barang in aaten ku nga asawa ku kanya, imatayen nira aku isaꞌun maꞌagaw si Rebeca ngaytu, ka daraga ngaytu nga babay.”

⁸ Iyan naꞌlay na kanya duꞌun, pagpanlalawagan it adiꞌ ngaytit mga Filisteo nga si Abimelec duꞌut sangbat nga lalawagan, nalawag ya nga magpakikaut-kaut si Isaac it ki Rebeca ngayti.

⁹ Egay beken, ipiyapisiꞌ ni Abimelec si Isaac. Pagꞌabut ni Isaac, maat ni Abimelec, “Talagang asawa mu palan! Unuka panugid mu situt amen, sulsug mu?” Katubag si Isaac, maat ya, “Pagbuwaten ku bay atkayan ka magꞌiꞌlam aku, ka barang imatayen aku sabap it kanya.”

¹⁰ “Iyan nga buwat mu,” maat ni Abimelec, “magꞌindadangep it may makabwat it kasalaꞌan situt amen, nga makasalya it asawa mu ngayan. Pagbuwatan mu kami it ipagkasalaꞌan namen!”

¹¹ Ta, egay beken, ipiyanugun-tugun ni Abimelec nga magꞌaat, “In siyu-siyuy sumalya it itung taw baw asawa ya ngayan, talagang egay pagduwa-duwa nga imatayen kanya.”

¹² Iting taꞌun, nanguma si Isaac duꞌun. Talagang inildawan kanya it AMPUꞌANG DIYUS, ka dadakulaꞌ nang banar nga magkapatbasan ya.

¹³ Nagmanggaden nga banar si Isaac ngayti, magdudungag-dudungag i kamanggadan ya.

¹⁴ Sabap maꞌayepen kanya nga banar baw dakulay pamalay-balay ya, aypaꞌ ininggitan na kanyat mga Filisteo.

¹⁵ Aypaꞌ muꞌsang tabud nga kiyali it mga taawan ni Abraham nga amaꞌ ya ngayti, siyariyan nat tabur it mga Filisteo.

¹⁶ Iyan atnakayti, maat ni Abimelec it ki Isaac, “Magayen siguru, magliꞌid ka na situt tepad namen ka ikaw, makseg paꞌ it amen.”

¹⁷ Aypaꞌ egay beken, nagpataꞌal si Isaac duꞌun kayti, takaꞌ duꞌun naga kanyat mintang ngaytit Gerar. Duꞌun nagay tiyaꞌidan ya.

¹⁸ Iyan duꞌun na kanya, piyakaliyan ya sit sumaꞌup i mga tabud, nga tabud nagat amaꞌ ya ngayting si Abraham, iyan duꞌun ngayti kanya. Sabap pagpatay ni Abraham, piyamagtaburan nat mga Filisteo nga taga duꞌun. Inarut ya naga gasiꞌ i mga ngaran it mga tabud nga ipiyangaran nagat amaꞌ ya ngayti.

¹⁹ Kimnali gasit baꞌgu i mga taawan ngayti ni Isaac. Masbeg i tumbud it nakaliyan nira.

²⁰ Temed pagpakidaꞌgan siꞌ it mga datiyang taga Gerar nga manigꞌeper it ayep i ki Isaac ngayting manigꞌeper. Maat nira, “Amen bay danum ngaytu, ega imyu!” Aypaꞌ piyangaranan ni Isaac i iting tabud it Esek, nga ireg sugiden, pagpakidaꞌgan.

²¹ Egay beken, kimnali siꞌ sirat beken nga tabud. Pagkakali, iyan nagang piyagraꞌe-raꞌetan, piyangaranan ya sit Sitnah, nga ireg sugiden, piyagraraꞌtan naga.

²² Piyabayaꞌan nira siꞌ i iting tabud ka nagpaꞌugad siꞌ na Isaac. Kimnali siꞌ sira it belag nga tabud. Ega nay nagpakiraꞌet it kanira it itiꞌen, aypaꞌ piyangaranan ni Isaac it Rehoboth, nga ireg sugiden, malayaw nga rugar. Ka maat ni Isaac, “Binggayan ta naytut AMPUꞌANG DIYUS it bastanting rugar. Kemseg ta na situt itung banwa.”

Nagpakiꞌupakat si Abimelec duꞌun it ki Isaac

²³ Garing duꞌun, nagpaꞌugad siꞌ si Isaac duꞌun it Beer-seba.

²⁴ Pagꞌabut ya duꞌun, nagpakikita siꞌ it kanya i AMPUꞌANG DIYUS it iti nga lagi nga delem baw inaat kanya, nga magꞌaat, “Aku i Ampuꞌang Diyus it amaꞌ mu nga si Abraham. Ayaw kat iꞌlam ka pagtatarimaen kuytu ikaw. Talagang ildawan ku ikaw baw padaklen ku nga banar i mga tungtung-inapuꞌ mu uyun kat isiyanggup ku it ki Abraham ngayti nga manigsirbi ku.”

²⁵ Aypaꞌ nagbuwat si Isaac it papangantengan ka siyamba yay AMPUꞌANG DIYUS duꞌun kayti. Duꞌun siꞌ kayti i piyakabratan yat mga balay ya ngayti nga magkapuru-purun, baw kimnali siꞌ i mga taawan ya it tabud duꞌun.

²⁶ Iyan duꞌun na ngayti si Isaac, naꞌaduꞌun it kanya i adiꞌ nga si Abimelec, garing duꞌut Gerar. Mga kaꞌibaan ni Abimelec ngayti, iba-iba ya nga si Ahuzat baw si Picol naga ngayting piyakapagbayaꞌen it sundaluꞌ ya.

²⁷ Pagꞌabut nira duꞌun, maat ni Isaac, “Unuy pagꞌengden mi situt aken? Daꞌga baꞌ piyalꞌid mi na aku duꞌut imyu ka magpakitabug kamut aken?”

²⁸ “Aaꞌ,” maat i tubag nira, “natantuwan namen nang matuud nga pagtatarimaen ka nga pirmi it AMPUꞌANG DIYUS. Aypaꞌ napikir namen, magayen in pakiꞌupakat kami. Magayen, kami baw ikaw, may siyumpaan nga upakat.

²⁹ Ituy paꞌaaten namen ngayan nga pagsumpaan ta, nga daꞌkami buwatan mu it maraꞌe-raꞌet. Ireg namen, subung nagat binwat namen it imu nga ega riniꞌe-riꞌeng namen ikaw, egay binwat namen nga maraꞌe-raꞌet it imu. Sabagay piyalꞌid namen ikaw, temed magayen i palꞌid namen it imu. Kayti situt imu nga pirmi i ildaw it AMPUꞌANG DIYUS.”

³⁰ Aypaꞌ nagsimpan na Isaac ngayti it dakulang pangaꞌen ka nagkaraꞌnen baw nagꞌinum sira.

³¹ Pagꞌeyag, nagbangun sira it kadedelman paꞌ nga banar. Nagsumpaan na sira, bawnga piyaꞌuliꞌ sira ni Isaac. Miyuliꞌ i mga naꞌaduꞌun ngayti it maꞌimbeng i nakem.

³² Ta, iti nagang aldaw, naꞌaduꞌun it ki Isaac i mga taawan ya ngayti nga kimnali, ka isiyugid nira it kanya nga naꞌbut na niray danum duꞌut pagkaliyan nira ngaytit tabud.

³³ Egay beken, piyangaranan ni Isaac it Seba, nga ireg sugiden, sumpa. Aypaꞌ ka pangaran it iting lansangan, Beer-seba, seked kayti na ngaytu.

Piyangasawaan ni Esau it kanya

³⁴ Iyan epat nang puluꞌ i idad ni Esau ngayting anak na Isaac, nangasawa na kanya it ki Judit nga anak ni Beeri nga Heteo. Ipiyadway ya, si Basemat nga anak ni Elon nga Heteo naga.

³⁵ Talagang ipagkapanrurunggukan na Isaac, duwa magꞌasawa, i mga adat baw uꞌugaliꞌen it duway ngayting miyagad nira.