Genesis 25 - Tagbanwa

⁷ Tanan-tanan nga idad ni Abraham, sang gatus baw pitung puluꞌ may limang taꞌun.

⁸ Bawnga miyatay kanya. Talagang piyaꞌlay kanya baw piyagurang nga banar.

⁹ Pagpatay ya, piyagtabangan naga it duwa ngayting mga anak ya nga si Ismael baw si Isaac i panlebeng. Duꞌun nagay limbengan nirat kubkub ngayting duꞌut Macpela nga duꞌut lugtaꞌ ni Efron ngayting anak ni Zohar nga Heteo, nga kapatuꞌ nagat Mamre.

¹⁰ Iti nga lugtaꞌ, inalang ngayti ni Abraham duꞌut mga Heteo. Sikayti nay limbengan it kanya, nga limbengan naga ngaytit asawa ya nga si Sara.

¹¹ Pagpatay ni Abraham, duꞌun sit ki Isaac ngayting anak ni Abraham i ildaw it Ampuꞌang Diyus. Duꞌun i ki Isaac nga tiyaꞌidan it Beer-lahai-roi.

Nanganak na na Isaac, sumakit, gambar

¹⁹ Itu nay katuturanan pasar it ki Isaac, nga anak ni Abraham.

²⁰ Magꞌidad na si Isaac ngaytit epat nga pulung taꞌun, bawnga nagꞌasawa sira ngayti ni Rebeca, nga anak ni Betuel nga esang Arameo nga taga Mesopotamia. Sulsug nga babay ni Laban si Rebeca.

²¹ Ta it ega magpanganak si Rebeca ngayting asawa ya, iyan naꞌlay na, nanalangin si Isaac nga nagpasanguꞌ-sanguꞌ duꞌun it AMPUꞌANG DIYUS. Baw siyambungan it AMPUꞌANG DIYUS i ipiyanalangin ya ngayti. Nagbeteng nga matuud si Rebeca.

²² Iyan dakulaꞌ nay beteng ya, duwa i magkabatiꞌan ya nga magkuliꞌget. Temed pangalabtaꞌ nira, siyang, ka subuk magraraꞌet. “Unuka,” maat ya, “atkaytuy kabetangan ku?” Egay beken, ipiyanalangin ya duꞌun it AMPUꞌANG DIYUS.

²³ Tubag it AMPUꞌANG DIYUS it kanya, maat ya, “Gambar i beteng mu ngayan, nga panggaringan sira it duwang kabangsaan. Garing it pagbebtengen paꞌ sira, daꞌsira nang lagi nagkagayen, mamagkukuntraꞌ na. Magbaraꞌ nga subrang makseg i sangbat manggid nga bangsa. Baw masinakepan it ariꞌ i akaꞌ manggid.”

²⁴ Iyan naꞌbut nay pananakit it beteng, simnakit na. Sumakit nga matuud, gambar, lalaki nga duwa.

²⁵ Uꞌnang simnakit, madarag-darag baw mabulbulun, subung nagat mabulbulun nga abel, aypaꞌ pangaranan nira, si Esau, nga ireg sugiden mabulbulun.

²⁶ Iyan sunud nga simnakit, magseskel duꞌut biyutu-butut aꞌay it kagambar ya ngayti, aypaꞌ pangaranan niray itiꞌen, si Jacob. Enem nang puluꞌ i idad ni Isaac, pagpanganak nirat duwa ngayti.

In magꞌuꞌunu nakatindak duꞌut ki Jacob i pudir kat panunubliyen ni Esau nga akaꞌ ya

²⁷ Pagdadakulaꞌ it duwa ngayting gambar, si Esau, mabantug nga manlulugitem. Duꞌun nay banwa-banwa yat talun. Si Jacob ngayti, ega maliniꞌid-liꞌiden nga taw, balaynen lamang.

²⁸ Pagdiyu-diyuun nga banar ni Isaac si Esau ngayti, ka pirmi kanya nga magkakaꞌen it lulugitmen. Ki Rebeca, iyan i kanyang pagdiyu-diyuun nga banar, si Jacob.

²⁹ Kaꞌsa nga magtanag si Jacob it alit it antak nga madarag, miyabut si Esau nga garing duꞌun it talun. Paggetmanan na kanya nga banar.

³⁰ “Aaꞌ,” maat ya, “magetem ku nang banar! Begayan mu akut pagꞌilutuꞌun mu ngayang madarag.” Iti, puꞌun-puꞌun it napangaranan si Esau it ki Edom, nga ireg sugiden, madarag.

³¹ “Aaꞌ, eeꞌ,” maat ni Jacob. “Begayan ta ikaw, temed may itukar mu naga. Itukar mu, aku nay bilang akaꞌ kat seled it pamalay-balay ta.”

³² “Mapakay bayan,” maat ni Esau. “Ikaw na. Unuy mapulus ku kayan, beken it subuk pirinda nga pirmi i ginawa ku duꞌut talun?”

³³ “Elat daꞌan,” maat ni Jacob. “Sumumpa ka daꞌan nga talagang ipiyatindak mu na situt aken.” Egay beken, simnumpa si Esau nga ipiyatindak ya na duꞌut bilug ni Jacob i kumpur pudir nga magbebgay it akaꞌ kat panunubliyen.

³⁴ Yapay begay ni Jacob it pagꞌilutuꞌun ya ngayti nga madarag nga alit it antak baw binggayan ya gasit tinapay. Pagkakaꞌen ni Esau, napanaw na. Iti na lamang i regat pudir ya ngayti kat panunubliyen. Talagang biyalalaꞌan ya na.