Genesis 21 - Tagbanwa

¹ Talagang inildawan nagat AMPUꞌANG DIYUS si Sara uyun kat isiyanggup ya.

² Aypaꞌ maski gurang na sirat atkayti, nagbeteng naga si Sara. Pagkaꞌbut it timpu nga inaat ngaytit Ampuꞌang Diyus, sumakit, lalaki.

³ Pagsakit, pangaranan ni Abraham i anak ya ngayti, si Isaac.

⁴ Pagꞌikawalu nga aldaw, tiyuriꞌan ni Abraham i anak ya ngayti, uyun kat ipiyagꞌurdin ngaytit Ampuꞌang Diyus it kanya.

⁵ Pagpanganak nirat ki Isaac ngayti, magꞌidad na si Abraham it sang gatus nang taꞌun.

⁶ Miyampang si Sara, maat ya, “Kayti maslem aku na ka dakulaꞌ naytung kasagyaan nga begay it Ampuꞌang Diyus it aken. Baw makasagya gasiꞌ i kumpur mabaritaꞌan pasar it panganak ku ngaytu.”

⁷ Maat ya pang beken, “Siyu pay makasugid it ki Abraham nga may maduduꞌ paꞌ situt aken it yapaꞌ ngaytu manganak kami, gurang na kanya? Takaꞌ nanganak aku nga matuud it anak ya nga lalaki.”

⁸ Iyan dakulaꞌ na i waꞌwaꞌ nga binlag na it duduꞌ, aldaw nga pagbelag it ki Isaac it duduꞌ, dakulaꞌ nga pagkaraꞌnen i ipiyaꞌitsu ni Abraham.

Piyalꞌid na na Agar duwa magꞌanak

⁹ Ta, namuyaan ni Sara nga pagsariyen it tibabaꞌ si Isaac it anak ngaytit uripen nga si Agar.

¹⁰ Pagkamuya ni Sara, maat yat ki Abraham, “Imugawun mu na sira magꞌinaꞌ, ka ega mapakay nga pasubliyan mu i anak ngayat uripen, in daꞌga si Isaac lamang nga sadili ta nga anak i sumublit muꞌsa ta.”

¹¹ Nalibeg i pikir ni Abraham pagkagneg ya kayti. Subuk mabeꞌgat nga buwaten ya, sabap si Ismael ngayti, pagmaꞌalen ya naga ka matuud nga idingguꞌ ya.

¹² Iyan atnakayti, inaat siꞌ it Ampuꞌang Diyus si Abraham, nga magꞌaat, “Ega malibegan it pikir mu i sabap it kanira magꞌinaꞌ. Sunudun mu nay ireg ngayan ni Sara. Palꞌiden mu na sira, sabap talagang asat ki Isaac i liꞌwanan it bangsa ngayang taꞌwagen nga mga tungtung-inapuꞌ mu.

¹³ Ega masmekan mu, ka magꞌanak-anak nagayan i anak mu ngayan asat ki Agar. Timindeg nagayan nga dakulang bangsa, sabap anak mu naga si Ismael.”

¹⁴ Pagꞌeyag it aldaw, sinimpanan na ni Abraham it balun nga pangaꞌen baw danum na Agar ngayti bawnga piyapanaw ya na. Napanaw na na Agar ngayti duwa magꞌanak, limnaꞌung-laꞌung na sira duꞌun it kapupuyangtan nga rugar it Beer-seba.

¹⁵ Iyan naꞌubus nay balun nira ngayting danum baw magpatay na si Ismael it kuꞌinum, binwat ni Agar, itiyuduꞌ yay anak ya ngayti duꞌut siꞌrung it esang kayu-kayu.

¹⁶ Bawnga napanaw kanyat ega naga alaid duꞌut kayu-kayu ngayti bawnga miyadung duꞌun. Maat i pagꞌampa-ampangen ya, “Talagang daꞌku kasagkaꞌ it pagleltegan kuy anak ku ngayan nga matay.” Magꞌaꞌdung ngayti kanya, atnat magkalme-kalmes, sigi gasing sugaw ni Ismael it kanya.

¹⁷ Nagnegan it Ampuꞌang Diyus i sugaw ngaytit waꞌwaꞌ. Pagkagneg ya, nanggaꞌmaran i Anghil it Ampuꞌang Diyusnga duꞌun it langit i garing it ampang ngayti. Maat ya, “Agar, unuy magkasmekan mu? Ayaw kat regen. Nagnegan it Ampuꞌang Diyus i sugaw it anak mu.

¹⁸ Paꞌuliꞌ ka na duꞌut kanya ka bangayen mu na, ka yay matuud, ipatindeg ku naga yan nga esang dakulaꞌ nga bangsa i tungtung-inapuꞌ ya.”

¹⁹ Egay beken, subuk piyaꞌyag it Ampuꞌang Diyus i panleteg ni Agar ngayti. Pagpanigma-sigmata ya, may naltegan ya nga tabud duꞌun. Siyaꞌgeban ya nay bintangan ngaytit balun nirang danum. Pagꞌabut ya duꞌut anak ya ngayti, piyaꞌinum ya na.

²⁰ Talagang ega nagang matuud piyabaya-bayaꞌan it Ampuꞌang Diyus si Ismael ngayti. Duꞌun nay diyakulaꞌan ya it kapupuyangtan nga rugar nga Paran. Pagdakulaꞌ ya, bantug kanya nga manlulugitem. Gamit ya, panaꞌ.

²¹ Iyan ustuꞌ na kanyang taw, minsiꞌ nay inaꞌ ya ngayti it babay nga taga Egipto ka ipiyaꞌasawa nat kanya.