Genesis 2 - Tagbanwa

¹ Ta, naꞌman nay langit baw banwa baw muꞌsang magkaltegan nga mga betang nira.

² Iyan ikapitu nang aldaw, ega nay binwat it Ampuꞌang Diyus nga mga kugunaen ya ka nakumplitu ya nay muꞌsa, aypaꞌ nagpapaꞌna na kanya.

³ Ipiyabetang it Ampuꞌang Diyus i ikapitu ngayting aldaw nga maꞌal baw mataꞌas pat beken nga mga aldaw, sabap it pagkaꞌbut it ikapitung aldaw, nakumplitu ya nay muꞌsang mga kugunaen ya.

Puꞌun-puꞌun it taw baw piyataꞌidan it kanira nga rugar

⁴ Ta, ituy kamatuudan pasar it langit baw banwa, iyan baꞌgu sirang giyuna it AMPUꞌANG DIYUS. Tagna-tagnaꞌ paꞌ, iyan giyuna it AMPUꞌANG DIYUS i langit baw banwa,

⁵ ega pay magpanubuꞌ nga maski unu nga luwak, sabap ega paꞌ piyaꞌuran it AMPUꞌANG DIYUS i banwa baw ega paꞌ gasiꞌ i taw nga manluwa-luwak situt banwa.

⁶ Takaꞌ may subuk gabun nga maggaring duꞌun it lugtaꞌ, magpatibung, nga yanay magmaregmeg it lugtaꞌ.

⁷ Bawnga garing kat lugtaꞌ binwat it AMPUꞌANG DIYUS i bilug it taw. Pagkaꞌman ya, inyepan yay mga lamun it urung ka binggayan ya it ginawa baw kaꞌgenan. Iyan i puꞌun it ginawa it taw.

⁸ Bawnga gimnuna i AMPUꞌANG DIYUS it kalulwakan duꞌut esang rugar nga magayen baw patag, duꞌun it pagpangaranat Eden, nga ayun kat lebatan. Bawnga duꞌun nay tiyabanan yat taw ngayting binwat ya, ka duꞌun nay piyataꞌidan ya.

⁹ Garing siꞌ sikayti, piyatubuꞌ it AMPUꞌANG DIYUS sikayting rugar i muꞌsang kalasit kayu nga, buwaꞌ nira, magayen nga pagletganan baw magayen gasing pagkaꞌnen. May ipiyatubuꞌ ya gasiꞌ duꞌun it tengaꞌ it kalulwakan ngayti nga esang kayu nga pagpangaranan it Kayu nga Magpaꞌabwatay it Kaꞌgenan baw sang puꞌun nga kayu, Kayu nga Ipagkakilala it Magayen baw Maraꞌe-raꞌet.

¹⁰ Baw may esa gasing danum nga magburus duꞌut Eden ngayti, nga iyan i magpakseg it mga luwak ngayti duꞌun. Garing duꞌut Eden, nga duꞌun i puꞌun ya, nabagiꞌ nat epat nga kadanuman.

¹¹ Pangaran it uꞌnang bagiꞌ, Pison, nga iyan i magpanliyang-liyang i burus ya kat rugar nga pagpangaranat Havila, nga may bulawan duꞌun.

¹² Talagang bulawan duꞌut iting rugar, piyakamagayen. Ega lamang desang bulawan i duꞌun. May duꞌun gasiꞌ nga magkapisiꞌan it magkabwat nga pirmirang babangluun, baw marga nga batu nga pagpangaranat onice.

¹³ Ngaran gasit ikadwang bagiꞌ it danum ngayti, Gihon, nga magpanliyang-liyang i burus ya kat rugar nga pagpangaranat Etiopia.

¹⁴ Ngaran gasiꞌ it ikatlu nga bagiꞌ it danum ngayti, Tigris, nga duꞌun i burus ya it Asiria nga ayun kat lebatan. Ngaran it ikaꞌpat nga bagiꞌ ya, Eufrates.

¹⁵ Ta duꞌun nat kalulwakan ngayti i piyataꞌidan it AMPUꞌANG DIYUS it taw ngayti nga lalaki nga binwat ya, ka yanayti i marigra.

¹⁶ Iyan duꞌun nay lalaki ngayti, inaat it AMPUꞌANG DIYUS, nga maat ya, “Mapakay mu nga kaꞌnen i buwaꞌ it mga kayu situ.

¹⁷ Temed iyan sang puꞌun nga kayu nga magkapisiꞌan ngaytut ipagkakilala it magayen baw maraꞌe-raꞌet, ega salyaen mut kumaꞌen. Sabap kat aldaw nga kumaꞌen ka it iyan ngayan, egay pagduwa-duwa nga kamataynen i panriga it imu.”

¹⁸ Pagkapatakenaꞌ yat lalaki ngayti, maat siꞌ it AMPUꞌANG DIYUS, “Ega magayen i esa-esat lalaki ngaytu nga egay iba ya. Magayen muwat aku nagat iba ya, isaꞌun may katabyang ya baw maꞌiba-iba ya nga bagay talagat kanya.”

¹⁹ Ta, mga giyuna ngaytit AMPUꞌANG DIYUS nga muꞌsang mga ramu-ramu baw muꞌsang mga manu-manuk, tiniꞌmes ya nga muꞌsa duꞌun it lalaki ngayti ka papangaranan it kanya. Aypaꞌ kada ipangaran it lalaki ngayti, yanay naneꞌteꞌ nga ngaran it ramu-ramu baw manu-manuk.

²⁰ Piyangaranan nga muꞌsa it lalaki ngayti i mga ramu-ramu baw mga manu-manuk, temed egay mapakay nga katabyang baw maꞌiba-iba ya.

²¹ Aypaꞌ piyaꞌigaꞌ it AMPUꞌANG DIYUS i lalaki ngayti it maꞌlek. Bawnga inabat it Ampuꞌang Diyus i esang takgang it lalaki ngayti. Pagkaꞌabat ya, ipiyagꞌarut ya siꞌ i inabatan ya ngayti.

²² Iti, takgang ngayting inabat it AMPUꞌANG DIYUS duꞌut lalaki ngayti, binwat ya nga esang babay. Pagkabwat ya, tiyaban ya na duꞌut lalaki ngayti.

²³ Pagꞌabut duꞌun, siyagyaan talaga it lalaki ngayti, nga maat ya, “Ta, in iyan, may iba ku na! Ka tuꞌlang, isi, subung talagat aken nga pamilug i pamilug ya. Babay i panaꞌwag it kanya sabap pinsiꞌ kanya kat bilug it lalaki.”

²⁴ Aypaꞌ ka buwat nat mga taw, tananan it lalaki i amaꞌ baw inaꞌ ya ka magsagpun na sira magꞌasawa. Ta egay beken, subung na sirat sang kabilu-bilugan.

²⁵ Purus sira paꞌ maglelbas, babay baw lalaki ngayti, baw ega pay eꞌyaꞌ nira.