Genesis 17 - Tagbanwa

Pagturiꞌ i tandaꞌ it seled sira it pakiꞌupakat it Ampuꞌang Diyus

¹ Iyan siyam nang puluꞌ baw siyam nga taꞌun i idad ni Abram, nagpakikita siꞌ i AMPUꞌANG DIYUS it kanya. Maat i inaat ya, “Aku i Ampuꞌang Diyus nga landaw nga gunaan. Kayti, ituy ipagꞌaat kut imu, mangaꞌgenan ka it uyun kat kaꞌirgan ku. Magpakataldeng ka.

² Ka talagang tumanen kuy isiyanggup ku ngaytut imu nga padaklen ku nga banar i mga tungtung-inapuꞌ mu.”

³ Nanluud si Abram baw itinꞌem yay rupa ya duꞌun it lugtaꞌ. Sigi nga ampang it Ampuꞌang Diyus ngayti.

⁴ Maat ya paꞌ, “Aku ngaytu i simnanggup it imu. Yay matuud, magbaraꞌ ka nga panggaring-garingan it dakel nga bangsa.

⁵ Kayti ega na Abram i panggetaꞌ it ngaran mu in daꞌga Abraham na, sabap ipiyabetang-betang ku nga ikaw na ngaytu i panggaring-garingan it dakel nga bangsa.

⁶ Buwaten ku paꞌ nga dumakel nga banar i tungtung-inapuꞌ mu, ka talagang may manggaring-garing it imu nga mga bangsa, pati mga adiꞌ nira.

⁷ Talagang magtetdek naytut imu i isiyanggup ku ngaytu. Maski ega nay ikaw ka mga kaꞌanakan mu mana, maneꞌteꞌ i pakiꞌupakat ku it seked maꞌlay nga banar. Tindak magtindak tu, itu nga isiyanggup ku ngaytu it imu, nga aku i Ampuꞌang Diyus mi, nga magꞌildaw it imu seked it mga kaꞌanakan mu magtungtung-magꞌinapuꞌ.

⁸ Talagang ibgay kut imu baw mga tungtung-inapuꞌ mu i mga rugar nga pagpanaw-panawan mu, muꞌsa ngaytung banwa nga Canaan, nga piyakakusas nira it seked maꞌlay nga banar. Baw talagang tarimaen ku sira, aku nga Ampuꞌang Diyus nira.”

⁹ Inaat paꞌ it Ampuꞌang Diyus it ki Abraham, “Temed ikaw baw mga tungtung-inapuꞌ mu, kaꞌilangan nga pagsunudun mi nga pirmi i ipagpakiꞌupakat ku ngaytut imyu.

¹⁰ Itu nagay buwaten mi. Kaꞌilangan turiꞌan i kada lalaki mi.

¹¹ Pagturiꞌ ngaytu i esang tandaꞌ it pakiꞌupakat kut imyu.

¹² Talagang muꞌsang ipanganak nga lalaki mi garing kayti magtungtung-magꞌinapuꞌ, kaꞌilangan turiꞌan pagꞌabut it ikawalung aldaw. Kaꞌilangan turiꞌan gasiꞌ i mga kaꞌuripnan mi baw mga taw nga ipiyaꞌalang it imyu. Maski ega kat duguꞌ mu, kaꞌilangan nagang turiꞌan, basta kat seled it pamalay-balay mi.

¹³ Ituꞌun ngaytu nga buwaten mi kat bilug mi i keseg it ipiyakiꞌupakat ku ngaytut imu. Pakiꞌupakat ku ngaytu, maneꞌteꞌ tu it seked maꞌlay nga banar.

¹⁴ In siyung lalaki i ega mabwat it atkaytu kat mga kaduguꞌan mu, ipabetang ku nga ega na kaꞌuyutan it mga taawan ku, ka riyanggaꞌ yay ipiyakiꞌupakat ku ngaytu.”

¹⁵ Beken paꞌ nga inaat it Ampuꞌang Diyus it ki Abraham, “Kayti ega na Sarai i panggetaꞌ mut ngaran it asawa mu, in daꞌga Sara na.

¹⁶ Talagang ildawan ku kanya nga manganak naga. Limiꞌwan kanya nga subuk inaꞌ it dakel nga bangsa. Kat mga inapuꞌ ya, may makapagꞌadiꞌ.”

¹⁷ Simnaꞌup siꞌ si Abraham it nanluud it magtetꞌem i rupa, temed nakaslem kanya. Kat nake-nakem ya, “Sang gatus nang taꞌun i idad ku baw si Sara ngaytu, ungaytu, manganak palan kanya it maski siyam nang puluꞌ i idad ya!”

¹⁸ Miyampang siꞌ si Abraham. Maat ya, “Sana ildawan mu naga si Ismael!”

¹⁹ Maat i tubag it Ampuꞌang Diyus it ki Abraham, “Eeꞌ, mapakay naga yan. Temed manganak naga si Sara, sumakit yan, lalaki. Pangaranan mut ki Isaac. Muꞌsa ngaytung isiyanggup baw ipiyakiꞌupakat kut imu, gumaring kat itung anak mu seked anak-inapuꞌ ya mana, magtetdek paytu it bilug nira it seked maꞌlay nga banar.

²⁰ Baw ki Ismael, ibgay ku i pagꞌangutun mu. Ildawan ku naga kanya baw padaklen ku naga i mga tungtung-inapuꞌ ya. Manganak kanya it sang puluꞌ may duwang mataꞌas nga ginuꞌu. Limiꞌwan nga ega babasta-bastaen i tungtung-inapuꞌ ya ka dakulang bangsa.

²¹ Temed pakiꞌupakat ku ngaytut imu, ega uyut si Ismael ngayti, in daꞌga, katumanan ya, duꞌun lamang it anak mu nga si Isaac, nga anak mi ni Sara nga ipanganak yat tumaꞌun siꞌ.”

²² Pagkaꞌampang it Ampuꞌang Diyus kayti, nagsipat na kat panleteg ni Abraham.

²³ Iti nga laging aldaw, uyun kat inaat ngaytit Ampuꞌang Diyus, tiyuriꞌan nga lagi ni Abraham si Ismael baw muꞌsang kalalakiyan duꞌut seled it pamalay-balay ya, pati mga anak it uripen ya nga duꞌun nay siyakitan it seled it pamalay-balay ya, baw iyan mga ipiyaꞌalang duꞌun it kanya, basta lalaki piyamagturiꞌan ya na.

²⁴ Pati sadili yang bilug, maski siyam nga puluꞌ baw siyam na nga taꞌun i idad ya, binwat ya gasit atkayti.

²⁵ Idad ni Ismael it kanya, iyan naturiꞌan kanya ngayti, sang puluꞌ may tulu nang taꞌun.

²⁶ Naꞌubus ni Abraham it sang aldaw i panuriꞌ ya, duwa sira magꞌanak,

²⁷ baw kapuꞌsaan it mga lalaki kat seled it pamalay-balay ya, iyan nga duꞌun nay siyakitan nira baw iyan mga ipiyaꞌalang duꞌun it kanya it mga taw nga belag i duguꞌ.