Genesis 15 - Tagbanwa

May ipiyalteg it AMPUꞌANG DIYUS it ki Abram, nga keseg it pakiꞌupakat ya

¹ Garing sikayti ega naꞌlay, nagpakikita i AMPUꞌANG DIYUS it ki Abram nga bilang pagtagaynepen ya. Nagnegan ni Abram i inaat it Ampuꞌang Diyus, nga magꞌaat, “Ayaw kat iꞌlam, Abram. Talagang tatarimaen ku ikaw nga akuy bilang kalasag mu kat kaꞌiꞌilang. Baw aku ngaytu i magkapisiꞌan mut ega basta-bastang kamanggadan nga ipagtumbas kut imu.”

² Katubag si Abram, maat ya, “In iyan, magpasalamat aku, Agalen, temed subuk egay kapulusan it begayan mu aku, ka aku, egay aꞌanak. Siyu i sumubli? Daꞌga yanay sumubli, si Eliezer ngaytu nga taga Damasco?

³ Ka ungaytu, daꞌku na inildawan mut anak. Daꞌga yanaytuy sumubli it muꞌsang kusas ku, manigsirbi ku ngaytu, ka yanay ipabetang nga anak ku?”

⁴ Temed maat i tubag it AMPUꞌANG DIYUS it kanya, “Egaytu itung taw i sumubli it kusas mu, in daꞌga talagang garing kat sadili mu nga bilug i sumubli.”

⁵ Bawnga inaat it AMPUꞌANG DIYUS si Abram nga manliꞌwan duꞌut balay. Bawnga maat ya siꞌ, “Tingaraꞌen muy langit ka bilangen muy mga bituꞌun, in mabilang mu naga. Subung it kadakel it mga bituꞌun ngayan i kadakel it mga tungtung-inapuꞌ mu.”

⁶ Kat iting mga ipiyagꞌaat, piyamayaꞌ nga banar ni Abram. Aypaꞌ ipiyabetang kanya it AMPUꞌANG DIYUS nga taw nga mataldeng kat panleteg ya sabap it pamayaꞌ ya ngayti.

⁷ “Magkaꞌrutan mu,” maat paꞌ it Ampuꞌang Diyus, “aku nga Ampuꞌang Diyus i miyaat ngayan it imu nga limꞌid ka duꞌut Ur, nga rugar it mga Caldeo, ka talagang ibgay kut imu i itung banwa nga subliyen it anak-inapuꞌ mu.”

⁸ Maat siꞌ i tubag ni Abram, “Tabiꞌ, Agalen ku, unuy kamatuudan it talagang maꞌaken i itung banwa?”

⁹ Maat siꞌ it AMPUꞌANG DIYUS, “Misiꞌ ka it dumaraga nga bakaꞌ, esa gasiꞌ i babay nga kambing baw sangbat gasiꞌ i tudu nga tupa. Kaꞌilangan idad it tulu ngaytu, tagtutulung taꞌun paꞌ. Misiꞌ ka gasiꞌ it esay uꞌuybun it kalapatiꞌ baw esa gasiꞌ i uꞌuybun it punay. Tabanen mu nga muꞌsa situt aken.”

¹⁰ Pagkapisiꞌ ni Abram it muꞌsang ipiyagꞌaat ngayti, biyegsang ya na. Pagkabegsang ya, idiyaꞌtun ya it nagpatuꞌ-patuꞌun i kada begsang. Temed duwa ngayting uꞌuybun it manu-manuk, ega biyegsang ya.

¹¹ Nagsigꞌabut i mga manu-manuk nga mga tarwangin ka kukaꞌen it mga ramu-ramu ngayti nga biyegsang ni Abram, temed pagdinggawun ya sira.

¹² Desang magsedep nay aldaw, nakaꞌigaꞌ na si Abram it yanay elek. Subung nat piskat it piyatay i pandele-delem kat linibut ya baw may nabatiꞌan ya nga subraꞌ na nga kaiꞌiꞌlaman.

¹³ Bawnga piyakisugidan siꞌ kanya it AMPUꞌANG DIYUS. Maat i inaat ya, “Ituy kamatuudan, mga tungtung-inapuꞌ mu, manumpang sira duꞌut banwat beken. Ega lamang desang manumpang, magsirbi gasiꞌ sira ka uripnen duꞌun. Talagang ipabetang sira it makuriꞌ, seledat epat nga gatus nga taꞌun.

¹⁴ Temed iyan banwa ngayang muripen it kanira, talagang rigaen ku. Garing sikayan makaliꞌwan na sira. Limiꞌwan sirat may dakulang kamanggadan.

¹⁵ Temed ikaw, ega na labayen muy itu ngaytu. Magayen i kabetangan mu, seked maꞌbut nay imung umur, sabap kagurang nagay ipatay mut imu.

¹⁶ Kat ikaꞌpat nga tungtung-inapuꞌ it kaꞌanakan mu, maꞌuliꞌ na niray itung banwa baw masadili na nira. Sabap kat iting timpu, nga dimnakulaꞌ nang banar i karaꞌe-raꞌetan nga pagsariyen it buwat it mga Amorreo ngaytung datiyan nga taga situ, talagang rigaen ku sira.”

¹⁷ Iyan nakasdep nay aldaw baw nagꞌalisakep nay delem, magleteg si Abram it esang pugun nga matabuk baw magdeleg. Pugun ngaytu, subuk napanaw duꞌut tengaꞌ it mga biyegsang ngayting ramu-ramu.

¹⁸ Sikayti ipiyamatuud it AMPUꞌANG DIYUS nga talagang tumanen yay pakiꞌupakat ya ngaytit ki Abram. Maat ya, “Talagang ibgay kut mga tungtung-inapuꞌ mu i itung banwa, garing duꞌut matanug nga danum it banwa nga Egipto mabut duꞌut kadanuman it Eufrates.

¹⁹ Makaꞌuyut i banwa it mga Cineo, mga Cenizeo baw mga Cadmoneo.

²⁰ Masakep gasiꞌ i banwa it mga Heteo, mga Perezeo baw mga Refaita,

²¹ mga Amorreo, mga Cananeo, mga Gergeseo baw mga Jebuseo.”