Genesis 11 - Tagbanwa

¹ Iyan tagna-tagnaꞌ paꞌ, paribasa it esa-esay puꞌun it taw, esa-esa paꞌ gasiꞌ i ampang.

² Ta it magpanlekep na ngayti sirat banwa, naꞌlay na sirat kayaꞌmat it panaw nga ayun duꞌut lebatan, nakaparag na sirat malayaw nga daranasan duꞌun it pagpangaranat Sinar. Pagkaparag nira, duꞌun nay tiyaꞌidan nira.

³ Iyan nakatiꞌen-tiꞌen na sira duꞌun, nagꞌupa-upakaten sira. Maat nira, “Esa-esa ga, muwat tamit dakel nga dakel nga padseneng lugtaꞌ, lugtaꞌ ngayang magkabwat tang dakut. Pakaꞌyawun tami nga banar isaꞌun demsen nga demsen.” Piyadsen na ngayti nira nga lugtaꞌ i ganti nirat batu nga ipagbuwat-buwat it balay. Piyulitan nirat alkitran isaꞌun magdeke-deketen.

⁴ Pagkamuya nirat magkabwat sirat iting mga bagay, namagꞌupa-upakaten siꞌ sira. “Esa-esa ga,” maat nira, “magbuwat tamit magayeng lansangan baw patindeg tamit balay nga ega basta-basta i kaꞌabwat nga kaꞌbut duꞌut langit i alibubungan ya, isaꞌun matanug tami baw ega na matariwanak situt sinirungat langit.”

⁵ Temed nanlampud i AMPUꞌANG DIYUS nga subuk nanleteg it lansangan baw pagpaꞌabwatayen ngayting balay nga pagbuwaten nira.

⁶ Pagkalteg ya, maat ya, “Mga taw ngaytu, magkakayaan niray itung kabubwalan nira sabap esa-esay ampang nira baw urunyun sirang muꞌsa. Ta, it atkayan, daꞌga subraꞌ na sikaytu i makayaan nira nga kabubwalan, nga ega na mapaaran sira it kumpur kubwaten nira?

⁷ Magayen aduꞌunun ta na sira ka belag-belagen i ampang nira, isaꞌun daꞌsira na magsepse-sepsepen it pagꞌaaten.”

⁸ Egay beken, tiyariwanak nat AMPUꞌANG DIYUS i mga taw, nga garing duꞌun ilingkep na sirat muꞌsang banwa. Aypaꞌ ka natananan na niray pagbuwaten nira ngayting lansangan baw abwatay ngayting balay.

⁹ Aypaꞌ sikaytiꞌen, piyangaranan it Babel i iting rugar, nga ireg sugiden, nalibegan. Ka sikayti biyelag-belag it AMPUꞌANG DIYUS i ampang it taw, baw duꞌun kayti i giyaringan it nagbelag-belagen na gasiꞌ i taw ka ilingkep nat muꞌsang banwa.

Napanaw na na Tare, ikawalung tungtung-inapuꞌ ni Sem

²⁷ May esang taw nga pagpangaranat ki Tare. Anak ni Tare ngaytu, si Abram, sumunud si Nacor bawnga si Haran. Manganak si Haran, lalaki. Pangaranan, si Lot.

²⁸ Ega piyaꞌlay si Haran, ka natay kanya it egen pay amaꞌ ya nga si Tare. Piyatayan ya, siyakitan ya naga nga rugar nga Ur, nga sakep it Caldea.

²⁹ Kana Abram, duwa ni Nacor, nagsigpangasawa na. Mangasawa si Abram it kanya, pagpangaranat ki Sarai. Ngaran it ki Nacor nga asawa, si Milca nga esang kamanaken ya, ka amaꞌ ni Milca si Haran. May esa pang anak ni Haran, ngaran ya si Isca, nga sulsug ni Milca.

³⁰ Si Sarai ngayti, ega magpanganak, aypaꞌ egay kanyang aꞌanak.

³¹ Ta, miyabut nga nagpaꞌugad si Tare, taban yat nagpaꞌugad i anak ya nga si Abram baw apuꞌ ya nga si Lot, nga yay esang anak ni Haran, pati miyagad ya nga si Sarai nga asawa ngayti ni Abram. Nagliꞌid na sira duꞌut Ur ngayti nga sakep it Caldea ka iyan sana i paꞌugadan nira, banwa nga Canaan. Temed ega naga nakalangbus ka pagkaꞌbut nira duꞌut lansangan nga pagpangaranat Haran, duꞌun nay tiyaꞌidan nira.

³² Duꞌun nat Haran ngayti i piyatayan ni Tare, magꞌidad na kanyat duwang gatus baw limang taꞌun.