Galacia 3 - Tagbanwa

Unu talaga i magkapisiꞌan it karibriyan? Pagsunud it kaꞌurdinan u pamayaꞌ baw pagsarig it ki Cristo?

¹ Unu, pagꞌengel-engelen kamu na nga taga Galacia? Barang magpulpug kamu na! Diyaꞌeg aku talaga in unuka magpasasaw kamut mga magpanlibeg ngayat pikiran mi it tiyaꞌseb kamu nang banar it pagpatalandagan it kamataynen ngaytu ni Jesu-Cristo duꞌut krus.

² Kayti ituy ipagpapikir kut imyu it magayen, unu piyasaruman kamu it Espiritu Santo sabap it siyunud mi i mga urdin kat rilihiyun it mga Judio u sabap it piyagnegan mi nat magayen baw piyakimatuud mi nga banar i Magayen ngaytung Baritaꞌ pasar it ki Cristo?

³ In daꞌga pagkaꞌengel-engel mi na, in ega nakapapuꞌun kamu puyrat tiyabang it Espiritu Santo, ta magꞌuꞌunu mangarampus kamu in panadili?

⁴ Unu, pabaraꞌen mi na nga egay kakapulusan it muꞌsang nalabayan mi? Sana ega atkayan.

⁵ Ta yan piyapasarum it Ampuꞌang Diyus i Espiritu Santo kat bilug mi, u iyan minwat kanya it mga kalililuꞌang bagay asat imyu, unu baꞌ, binwat yaytu sabap it siyunud mi i mga urdin ngaytit mga Judio u sabap it piyagnegan mi baw piyamayaꞌ i Magayen ngaytung Baritaꞌ?

⁶ Demdemen mi si Abraham. Kamatuudan i pagsarig baw pamayaꞌ yat Ampuꞌang Diyus, aypaꞌ kinilala kanya nga mataldeng.

⁷ Ta atkayan naga, ipagpasepsep kut imyu nga in siyuy may atkaytung pagsarig baw pamayaꞌ, kabilangan ya, kaꞌanakan ni Abraham.

⁸ Baw paribasay ipiyabetang-betang nga lagit Ampuꞌang Diyus nga sabap it pagsarig baw pamayaꞌ it mga taw nga ega Judio kilalaen ya sira nga mataldeng, ipiyaꞌrut yat ki Abraham i Magayeng Baritaꞌ nga magbebtang duꞌut kasuratan nga magꞌaat, “Garing it imu maꞌildawan i muꞌsang bangsat taw situt sinirungat langit.”

⁹ Aypaꞌ in siyuy magsarig nga matuud it Ampuꞌang Diyus, subung it ki Abraham, kaꞌuyutan nagat ki Abraham nga tumanggap it kumpur isiyanggup it Ampuꞌang Diyus.

¹⁰ Takaꞌ iyan muꞌsa nga pagsunud nirat mga urdin kat rilihiyun it mga Judio i pagpaꞌresan nira isaꞌun maribri, pagsasakpan sirat panriga it Ampuꞌang Diyus. Sabap magbebtang duꞌun it kasuratan nga magꞌaat, “Siguradung rigaen it Ampuꞌang Diyus i ega magsunud it kaꞌustuꞌan it muꞌsang mga urdin nga magbebtang situt kasuratan ngaytu.”

¹¹ Ta daꞌga maꞌyag nga in atkayan, egay maski esa nga pagkilalaen it Ampuꞌang Diyus nga mataldeng in sabap it pagsunud yat mga urdin, in daꞌga sabap it pagsarig baw pamayaꞌ yat Ampuꞌan. Sabap magꞌaat i magbebtang duꞌut kasuratan, “Iyan taawan ku nga ipagpabetang ku na nga mataldeng, yay magdadaꞌeg kat nakem ya, pamayaꞌ baw pagsarig yat aken.”

¹² Temed iyan magsarig it pagsunud yat mga urdin, nangalaid na kat dalan it pagsarig it binwat ni Cristo. Ta maꞌyag tu nga egay kapulusan palan. Ka magꞌaat siꞌ i duꞌut kasuratan nga iyan magsunud it mga urdin, kaꞌilangan sunudun it kaꞌustuꞌan kat muꞌsang kaꞌgenan ya.

¹³ Temed kayti, ipiyagribri ta na ni Cristo kat panriga it Ampuꞌang Diyus, panriga yat mga ega ngaytu magkasunud it kaꞌustuꞌan i mga urdin. Ka imbis kita, si Cristo ngaytu i riniga it Ampuꞌang Diyus sabap it kasalaꞌan tami, subung nagat magsusurat nga magꞌaat, “Siyu-siyu nga pangimatay it kanya, ipaggantung duꞌun it kayu nga ipagrugsuk, naꞌiguꞌ it isiyumpa it Ampuꞌang Diyus nga panriga.”

¹⁴ Ipiyasalisi ni Jesu-Cristo i sadili ya isaꞌun, iyan kagayenan nga isiyanggup it Ampuꞌang Diyus duꞌun it ki Abraham, matanggap gasiꞌ it mga taw nga ega Judio, baw isaꞌun, sabap it pamayaꞌ baw pagsarig tat kanya, pasaruman tang muꞌsa it Espiritu Santo nga isiyanggup ya.

Ega naparaw it urdin i isiyanggup it Ampuꞌang Diyus

¹⁵ Mga kasulsugan, paꞌalimbawaan kuy esang adat tami. Basaꞌan basta napirmaꞌan mana i esang piyagꞌupakatan, ega na maꞌaat it maski siyu nga egay kuwintaꞌ. Ega na gasiꞌ mabwat nga dungagan paꞌ u ginisan, puyrat upakaten sit sumaꞌup.

¹⁶ Ta kayti, iyan isiyanggup it Ampuꞌang Diyus it ki Abraham it tagnaꞌ, nga garing it kanya maꞌildawan i muꞌsang taw, kat sangbat lamang nga kaꞌanakan ni Abraham ngaytu i katumanan ya. Ka ega ireg sugiden matuman kat dakel nga kaꞌanak-anakan ya, in daꞌga sangbat tu i pagpaꞌulugan, si Cristo lamang.

¹⁷ Ituytu i ipagpasepsep kut imyu. Garing it timpu it pakiꞌupakat it Ampuꞌang Diyus it ki Abraham, nga duꞌun ipiyagꞌunay yay sanggup yat kanya, may epat nga gatus baw tulung puluꞌ nga taꞌun bawnga ipiyaskel it Ampuꞌang Diyus it ki Moises i mga urdin ya. Ta it naꞌlay nang ipiyagꞌunay it Ampuꞌang Diyus, daꞌga maꞌyag nga ega naparaw it urdin i upakat baw sanggup ngayti?

¹⁸ Ka in maꞌaten i ildaw it Ampuꞌang Diyus sabap lamang it pagsunud tat mga ipiyaskel ya ngayting urdin, unuy kapulusan it mga sanggup ya? Temed, subung nagat ki Abraham ngayti, maꞌaten lamang sabap it keseg it sanggup it Ampuꞌang Diyus, ega sabap it pagsunud tat kaꞌurdinan ngayti.

In unuka ipiyaꞌrut it Ampuꞌang Diyus i mga urdin ya

¹⁹ Ta daꞌga in atkayan, unuka ibinggay pat Ampuꞌang Diyus i mga urdin ya? Unuy kapulusan nira? Ta, itu ngaytu, ipiyaꞌrut ya i mga urdin ya ngaytu isaꞌun maꞌyagan it mga taw i in unu may unu i kasalaꞌan nga pagbuwaten nira kat pangaꞌgenan nira. Pagsasakpan i mga taw it mga urdin ngaytu seked it mabut na i paꞌaaten ngayting kaꞌanakan ni Abraham, nga duꞌut kanyay katumanan it sanggup. Iyan ibinggay it Ampuꞌang Diyus i mga urdin ya, mga anghil baw si Moises i bilang suruꞌan ya.

²⁰ Temed iyan ibinggay yay sanggup yat ki Abraham, egay giyamit it Ampuꞌang Diyus nga suruꞌan. Kanya mismu i simnanggup, kamatuudan it mataꞌas pat mga urdin i sanggup ya.

²¹ Ta kayti, barang tanud mi kuntraꞌ na kat mga sanggup it Ampuꞌang Diyus i mga urdin ya ngaytu? Temed ega. Lamang nagbelag it puꞌun-sabap i mga urdin baw mga sanggup ngaytu. In beteꞌ may urdin nga magkapisiꞌan it kaꞌgenang egay kaskedan it mga mamagsunud kaytu, simpri yanay panggaringan it tumaldeng na i taw kat panleteg it Ampuꞌang Diyus, iti na, pagsunud it urdin ngayti.

²² Temed sabap it mga urdin ya ngayti, magkasepsepan tami i pagꞌaaten it kasuratan nga pagsasakpan it kasalaꞌan i muꞌsang taw situt sinirungat langit. Ta, basta nasepsepan nat taw i kadakulat kasalaꞌan nira, mapakay nang matuman i isiyanggup it Ampuꞌang Diyus nga maꞌawaꞌan it kasalaꞌan i kumpur sumarig baw mamayaꞌ it binwat ni Jesu-Cristo.

²³ Iyan ega paꞌ miyabut si Cristo nga maat sarigan, subung tat pagpipirisuun it iti nga mga urdin, nga ega makaliꞌwan seked it timpu nga abriyen yay dalan it pagsarig baw pamayaꞌ it kanya.

²⁴ Aypaꞌ, iyan mga urdin ngayti, iyan i subuk manigpadisir it aten nga magpatantu it aten it kadakulaꞌ it kasalaꞌan tami isaꞌun mandangep tami duꞌun it ki Cristo. Ka in mamayaꞌ baw sumarig tami it binwat ni Cristo ngaytu, tumaldeng tami na kat panleteg it Ampuꞌang Diyus.

²⁵ Ta kayti it miyabut na si Cristo baw kat sakep ya na kita, daꞌtami na kat pamegbeg it dati ngayting manigpadisir it aten nga mga urdin.

²⁶ Pati kamu nga ega Judio, mga anak na gasiꞌ it Ampuꞌang Diyus, nga maglalagpit nat ki Cristo Jesus sabap it pagsarig baw pamayaꞌ mi it kanya.

²⁷ Baw kayti, muꞌsa asat imyu nga nagpabawtis nga yay katandaꞌ it maglalagpit na ngaytu it ki Cristo, subuk piyakay na si Cristo, nga ireg sugiden magpasbung nat kanyang adat.

²⁸ Aypaꞌ ega nay piyagbelagan it mga Judio baw ega Judio, uripen baw ega uripen, u lalaki baw babay. Ka basta maglalagpit nat ki Cristo Jesus, inesa-esa tami nang muꞌsa.

²⁹ Baw ta, in kamu, ki Cristo na, ipagpabetang kamu na nga mga kaꞌanakan ni Abraham nga pagsasakpan it muꞌsang kagayenan nga isiyanggup it Ampuꞌang Diyus it kanya.