Galacia 2 - Tagbanwa

Egay naꞌiway it beken nga mga apustul it mga ipagpanulduꞌ ni Pablo

¹ Ta, pagtaꞌlib it sang puluꞌ baw epat nga taꞌun naꞌaduꞌun aku sit Jerusalem, duwa kami ni Bernabe. Piyabayaꞌ ku gasiꞌ si Tito.

² Naꞌaduꞌun aku ka yay ipiyanakem it aken it Ampuꞌan, isaꞌun katuturan ku kat mga magpamayaꞌ duꞌun in unuy ipagpangadal ku nga Magayeng Baritaꞌ duꞌut mga piyanawan nameng babanwaan it mga taw nga ega Judio. Aypaꞌ pagꞌabut namen ngayti duꞌut Jerusalem, nagtiꞌmes daꞌan i mga pagkilalaen nga matataꞌas nga magpamaalaꞌ it mga magpamayaꞌ duꞌun, bawnga ipiyaꞌyag ku nay muꞌsa duꞌut kanira. Mga magpamaalaꞌ ngayti daꞌan i piyaꞌyagan ku isaꞌun masiguru ku nga paꞌuyunan nira i ipagpangadal ku. Ka in ega paꞌuyunan nira, barang limiꞌwan nga egay kakapulusan it buwat ku ngayti nga magpangadal duꞌun it mga taw nga ega Judio.

³ Ta, subuk piyaꞌuyunan nira naga i pangadal ku ka iyan iba namen ngayting si Tito, maski Griego kanya, ega nareges nirat paturiꞌ,

⁴ maski na maat ipagpaliꞌwan it beken nga paturiꞌan kanya. Mga magpaliꞌwan ngaytit atkayti, mamagbete-beteꞌ nga kasubung tami nga magpamayaꞌ arit ega. Ka yay antap it nakem nira, subuk baklayan niray karibriyan tami, nga liꞌwan tami na kat pagsunud it mga urdin ni Moises sabap maglalagpit tami nat ki Cristo Jesus. Ireg nira ipaꞌuripen tami siꞌ kat mga urdin ngayti.

⁵ Temed daꞌkami nagpaꞌuyun it maski dekeyeꞌ it ipagpaliꞌwan nira ngayti, ka isaꞌun ega maragiꞌan it ega matuud i kamatuudan nga Magayeng Baritaꞌ, baw ega mateꞌag-teꞌag kamu.

⁶ Ta, subung it inaat ku, iyan mga magpamaalaꞌ it mga magpamayaꞌ duꞌut Jerusalem, egay naꞌiway nira kat ipagpangadal ku. Egay tiyaldeng nira. (Maski maat pagkilalaen sira nga mataꞌas, ega yan magkalibegan it pikir ku, sabap urut ku nga, iyan Ampuꞌang Diyus, ega pagsagyaan ya i esang taw in sabap lamang it kat liꞌwan nga kabetangan ya.)

⁷ Mga magpamaalaꞌ ngayti, kinilala nira nga in magꞌuꞌunu ipiyakarguꞌ it Ampuꞌang Diyus it ki Pedro i pamaalaꞌ it pangadal it Magayeng Baritaꞌ kat mga Judio, atkayan naga, aku na mismu i piyakarguꞌan ya it pamaalaꞌ it pangadal it Magayeng Baritaꞌ kat mga taw nga ega Judio.

⁸ Baw in magꞌuꞌunu inildawan si Pedro it Ampuꞌang Diyus it kakayaan kat katengdanan yat kanya, iyan nagay ipiyagꞌildaw yat aken kat aken gasiꞌ ngaytu nga katengdanan.

⁹ Aypaꞌ, iyan mga pagkilalaen nga piyakapagbayaꞌen it mga magpamaalaꞌ duꞌut Jerusalem, nga si Santiago, si Pedro baw si Juan, iyan namuyaan nira nga kat keseg it ildaw it Ampuꞌan it aken, dakulay paglapusan it pangadal ku kat mga taw nga ega Judio, tiyanggap nira kami ni Bernabe baw napakay sira nga kaꞌuyutan kami na nira nga mga manigbuwat it buwaten it Ampuꞌan. Ta piyagꞌupa-upakatan namen nga ipasigi namen nay amen nga pangadal duꞌun it mga taw nga ega Judio. Iyan kabilug namen nga mga Judio, yanay kanira.

¹⁰ Iyan lamang i ipiyakiꞌupakat nirat amen, nga iyan gasiꞌ i pagpaꞌresan ku nga kubwaten, nga ega pabaya-bayaꞌan namen i mga kukurangen.

Ipiyatantu ni Pablo duꞌut Antioquia nga ega talaga kat pagsunud it kaꞌurdinan tumaldeng i taw kat panleteg it Ampuꞌang Diyus

¹¹ Ta yan nakaꞌuliꞌ kami na duꞌut Antioquia nagbisitaꞌ it amen si Pedro. Temed miyabut nga may kamaliꞌ nga binwat ya duꞌun, aypaꞌ ega mapakay nga ega tiyaldeng ku i binwat ya ngayti.

¹² Ka yapa-yapaꞌ pagsunudun yay adat nameng magpamayaꞌ duꞌun nga maski Judio u daꞌga, magkaraꞌnen it sang kamiyan. Egay pagbidaꞌen. Temed iyan may miyabut na nga mga Judio nga garing duꞌut mga pagpamaalaꞌan ni Santiago duꞌut Jerusalem, miniꞌlam si Pedro nga barang dalaꞌan nira kanya, aypaꞌ ega na magpakikaꞌen kanya duꞌun it mga magpamayaꞌ nga ega Judio. Pagliꞌyan ya na. Ka mga miyabut ngayti, kaꞌuyutan sirat mga taw nga magꞌaat, kaꞌilangan nagang paturiꞌ i mga taw nga ega Judio, maski namayaꞌ na sirat ki Cristo.

¹³ Ta it atkayti, maski mga beken nga sulsug kat pamayaꞌ nga mga Judio, magguru na gasiꞌ it buwat ya ngayti. Pati si Bernabe, nakabaya-bayaꞌ nat paꞌisti-isti nira ngayti.

¹⁴ Ta yan namuyaan ku nga daꞌsira magpangaꞌgenan uyun kat kamatuudan nga Magayeng Baritaꞌ, inaat ku si Pedro kat adapan nirang muꞌsa, “Ta ikaw, maski manengteng ka nga Judio, temed inindiꞌan mu na i pagsunud it mga kaꞌurdinan kat rilihiyun tami nga mga Judio. Aypaꞌ unuka ipagpasunud mu paꞌ it mga taw nga ega Judio?

¹⁵ Ka kita, Judio tami nga manengteng, nga magkilala it Ampuꞌang Diyus, ega subuk mga taw nga ega Judio nga egay pagkilala nira it Ampuꞌang Diyus ngaytu. Temed it namayaꞌ tami nat ki Cristo,

¹⁶ nasepsepan tami na nga ega kat pagsunud it taw it mga urdin ipabetang kanya nga mataldeng kat panleteg it Ampuꞌang Diyus, in daꞌga kat kamatuudang pamayaꞌ baw pagsarig ya it binwat ni Cristo Jesus. Aypaꞌ, maski kita ngaytu nga mga Judio, paribasay nakasepsep nat itu ngaytu, namayaꞌ tami na it ki Cristo Jesus. Ka natantuwan tami na nga pamayaꞌ baw pagsarig tami ngaytu it binwat ni Cristo i ikapisiꞌ tat maꞌawaꞌ i kasalaꞌan tami kat panleteg it Ampuꞌang Diyus, ega maat sadili tang pagsunud it mga urdin. Ka ega talagay maski siyu nga ipabetang it Ampuꞌang Diyus nga mataldeng sabap it pagsunud yat mga urdin, ka egay magkasunud it kaꞌustuꞌan.

¹⁷ Temed, kita nga magsarig nat binwat ni Cristo isaꞌun tumaldeng kat panleteg it Ampuꞌang Diyus, in beteꞌ ipabetang tami nga makasalaꞌan it mga kabilug tang mga Judio, sabap ega na pagsunudun tay mga kaꞌurdinan kat nasulagan tami nga rilihiyun, daꞌga nangangaꞌulugan nga manigpabetang-betang it kasalaꞌan si Cristo? Temed talagang ega magꞌaꞌatkayan.

¹⁸ Takaꞌ in tiyananan ta na i dalan ngaytu nga pagsunud it mga urdin, ka natantuwan ta na nga ega itiꞌen i ikaribri it taw, bawnga paꞌuliꞌan ta siꞌ, ta yanay kasalaꞌan nga matuud.

¹⁹ Kat paꞌres kut pagsunud it mga urdin it rilihiyun tami nga mga Judio natantuwan ku na nga palan, maski sang unuy paꞌres ku, ega ipagkapisiꞌ it tumaldeng kat panleteg it Ampuꞌang Diyus. Aypaꞌ ka, inindiꞌan ku nay pagsunud kut mga urdin ngayti. Baw pagpaꞌresan ku nay pangaꞌgenan nga uyun nga pirmi kat kaꞌirgan it Ampuꞌang Diyus, ka subuk natay aku na nga uyut ni Cristo duꞌut krus.

²⁰ Ta kayti, maski egen aku paꞌ ngaytu, pagkilalaen ku nga subung it ega na akuy egen in daꞌga si Cristo na i egen kat bilug ku. Ka ega na aken nga kaꞌirgan i pagsunudun ku, in daꞌga kaꞌirgan ya na. Aypaꞌ mintras situ aku pat banwa, magpangaꞌgenan aku kat keseg it pamayaꞌ baw pagsarig ku it kanya nga Anak it Ampuꞌang Diyus, kanya nga nagpagtas it ginawa ya kat kadakulat raras ya it aken.

²¹ Talagang ega mabaliwalaꞌ ku i ildaw ngaytut Ampuꞌang Diyus. Ka in taw, magkaꞌawaꞌan it kasalaꞌan duꞌun it pagsunud it kaꞌurdinan, daꞌga egay kapulusan it kamataynen ngaytu ni Cristo?” Yay inaat kut kana Pedro duꞌut Antioquia.