Galacia 1 - Tagbanwa

^1-2 Mga magpamayaꞌ it ki Cristo nga asan it Galacia, wayan i surat ku, aku nga si Pablo nga esang apustul, nga ega taw-tiyaw na lamang i nagpiliꞌ u nagpatindeg it aken kat pagkaꞌapustul ku, in daꞌga mismu si Jesu-Cristo baw Amaꞌ ta nga Ampuꞌang Diyus nga minggen it paꞌuliꞌ it ki Jesu-Cristo ngaytu. Muꞌsang mga sulsug ta kat pamayaꞌ nga kaꞌibaan ku sini, magkumusta it imyu.

³ Ipagpanalangin ku nga sana asat imyu nga pirmi i ildaw baw kaꞌimbengat nakem nga ipagbegay it Ampuꞌang Diyus nga Amaꞌ tami baw Ampuꞌan nga si Jesu-Cristo,

⁴ kanya nga isiyalisi yay bilug ya kat aten nga mga kasalaꞌan isaꞌun mabilwat ya kita kat pamegbeg it karaꞌe-raꞌetan nga magsasakep it banwa kat timpu ngaytu. Binwat ya ngaytu, pabetang-betang nagat Ampuꞌang Diyus nga Amaꞌ tami.

⁵ Sana bantugun ta kanya it egay kaskedan. Kamatuudan tu.

Iyan matuud nga Magayeng Baritaꞌ

⁶ Talagang pagdaꞌgen aku in unuka yanay karway mi mangganti it pabetang-betang ngaytu it Ampuꞌang Diyus, kanya nga nagpanakem it imyu nga pasakep it ildaw ya nga ipiyatantu yat imyu kat binwat ngaytu ni Cristo. Ka nakumbinyu kamu nga paꞌugad duꞌun it beken nga maat Magayeng Baritaꞌ.

⁷ Temed ta, yan talagay matuud, esa-esay Magayeng Baritaꞌ. Ega naytuy beken. Iyan miyabut ngayan asat imyu nga maat manigpangadal sira, magpanlibeg lamang yan it pikiran mi. Pagpaꞌresan nira nga magantiyan i Magayen ngaytung Baritaꞌ pasar it ki Cristo.

⁸ Temed ta, yay matuud, in siyuy mangadal asat imyu it belag kat ipiyangadal namen ngayan, talagang kaꞌilangan rigaen kanyat Ampuꞌang Diyus it panriga nga ega pateng, maski kami nga mga apustul, u esa nang anghil nga garing duꞌut langit.

⁹ Ka daꞌga baꞌ nakaꞌaat namen na baw kayti, pagsaꞌupun ku siꞌ, nga in may mangadal asat imyu it belag kat ipiyangadal namen ngaytu nga Magayeng Baritaꞌ nga piyamayaꞌ mi, dapat rigaen kanyat Ampuꞌang Diyus it panriga nga ega pateng.

¹⁰ Ta sikayan daꞌga baꞌ maꞌyag nga ega iyan i pagꞌangaden ku, basta lamang sagyaan it mga taw i panulduꞌ ku. Ega maat atkayan, in daꞌga yay ipagpadaꞌeg ku kat nakem ku, masagyaan akut Ampuꞌang Diyus. Ka in yapay pagpaꞌresan ku, masagyaan akung pirmi it taw, ta daꞌga maꞌaat nga taw nay pagsirbiyan ku, ega na si Cristo?

Pamatuud ni Pablo nga Ampuꞌang Diyus i garing it panulduꞌ ya

¹¹ Ka talagang ipagpamatuud ku kayti, mga sulsug ku kat pamayaꞌ, nga ega taw-tiyaw i garing it Magayen ngaytung Baritaꞌ nga ipagpanulduꞌ ku.

¹² Eeꞌ baꞌ, egaytu tiyanggap ku u itiyulduꞌ it aken it taw, talagang mismu si Jesu-Cristo na i nagpaꞌyag it aken kaytu.

¹³ Siguru urut mi naga in magꞌuꞌunuy pangaꞌgenan kut tagnaꞌ, iyan magsunud aku pat rilihiyun namen nga mga Judio. Talagang pagtiꞌsen ku nga banar i mga taawan it Ampuꞌang Diyus nga magpamayaꞌ it ki Jesu-Cristo ngaytu ka ireg ku nga maꞌawaꞌ sirang muꞌsa.

¹⁴ Baw talagang maraꞌang i magkasbung it aken nga kaꞌebay-ebayan ku nga mga Judio kat pagpasakep it rilihiyun namen ngaytu, paribasay eꞌget nga banar i panindeg kut unu-unu nga kaꞌugaliꞌan it mga kamagugurangan namen.

¹⁵ Temed kat kaꞌildaw it Ampuꞌang Diyus it aken, piniliꞌ ya nang lagi aku parabir aku ipiyanganak baw ipiyatindeg ya aku nga manigsirbi it kanya.

¹⁶ Ta, yan ipiyakilala ya nang banar kat nakem ku i anak ya, ka isaꞌun kapangadal ku i pasar it kanya duꞌun it mga taw nga ega Judio, ega talagay siyabut ku nga maski siyu.

¹⁷ Ega na maat naꞌaduꞌun aku pat Jerusalem nga patulduꞌ it mga uꞌna ngaytit aken nga mga apustul, in daꞌga napanaw aku nang lagi it nagpaꞌArabia, bawnga nagpaꞌuliꞌ aku naga duꞌut Damasco.

¹⁸ Tulung taꞌun i nagtaꞌlib bawnga nagpaJerusalem aku, ka pakikita akut ki Pedro. Sang puluꞌ may limang aldaw i kaꞌlay ku duꞌun it kanya.

¹⁹ Kat iting timpu nakitaan ku gasiꞌ si Santiago nga ariꞌ it Ampuꞌan. Duwa lamang ngayti i nakitaan ku nga apustul. Ega nay beken.

²⁰ Talagang, kat panleteg it Ampuꞌang Diyus, ipagpamatuud ku nga kamatuudan i ipagsurat ku ngaytu asat imyu.

²¹ Garing aku duꞌun it Jerusalem ngayti nangalaid aku siꞌ, duꞌut mga prubinsiya it Siria baw Cilicia.

²² Kat iting timpu daꞌku paꞌ kilala it mga maglalagpit it ki Cristo kat paꞌari-aring rugar duꞌun it Judea.

²³ Nabaritaꞌan nira lamang nga, iyan dati nga magtiꞌes it kanira ka isaꞌun mapakuriꞌan sira sabap it pamayaꞌ nirat ki Cristo, kayti magpangadal na it pamayaꞌ ngaytu nga kuranggaꞌen ya ngaytit tagnaꞌ.

²⁴ Aypaꞌ ka biyantug niray Ampuꞌang Diyus sabap it pagbaꞌgu yat nakem ku.