Filemon 1 - Tagbanwa

¹ Pagmaꞌalen nameng iba-iba nga si Filemon, nga kasubung namen nga manigbuwat it buwaten it Ampuꞌan, wayan i surat namen, aku nga si Pablo, nga pagpipirisuun sabap it pagsirbi kut ki Cristo Jesus, baw sulsug ta kat pamayaꞌ nga si Timoteo.

² Pagsuratan namen gasiꞌ i sulsug tami kat pamayaꞌ nga si Apia, baw si Arquipo nga magayeng iba-iba ku kat panindeg it Magayeng Baritaꞌ maski dakel i magpakikuntraꞌ. Baw kadakel it mga magpamayaꞌ nga mamagtingped asat balay mu, pagkumustaen namen naga.

³ Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami baw Ampuꞌan ta nga si Jesu-Cristo.

⁴ Kada ipagpanalangin ku ikaw, pirmi aku nga magpasalamat duꞌun it Ampuꞌang Diyus ku,

⁵ sabap magkabaritaꞌan ku i pagsarig baw pamayaꞌ mu it Ampuꞌan nga si Jesus, baw raras mu it muꞌsang mga kasubung mu nga taawan it Ampuꞌang Diyus.

⁶ Ipagpanalangin ku nga, liꞌwan it pamayaꞌ mu ngaytut ki Cristo, magsisigi kang numakman kat maꞌiba mu, isaꞌun subraꞌ nga makilala mu i muꞌsang kagayenan nga maꞌaten kat pakilagpit tami it ki Cristo ngaytu.

⁷ Pagmaꞌaleng sulsug kat pamayaꞌ, talagang kiminseg i nakem namen baw simnagya kami nga banar pagkabaritaꞌ namen it raras mu it mga maꞌiba mu, ka dakel kunuꞌ i mga taawan it Ampuꞌang Diyus nga napasagya muy nakem nira.

Pakiꞌupakat ni Pablo pasar it ki Onesimo

⁸ Ta it atkayti, maski may pudir ku nga semkat it imu nga muwat it in unuy dapat mu nga buwaten, sabap it esa akung apustul ni Cristo,

⁹ temed, ega buwaten kuytu. In daꞌga sabap it raras mu ngaytu magpakiꞌupakat akut imu, aku nga si Pablo nga magurang na baw pagpipirisuun paꞌ sabap it panindeg ku it ki Cristo Jesus.

¹⁰ Kayti pagꞌupakaten ta ikaw pasar it anak ku ngaytu kat pamayaꞌ nga si Onesimo. Subuk anak ku kanya ka lamang pagpipirisuun aku, piyamayaꞌ yay pangadal kut kanya pasar it ki Cristo.

¹¹ Matuud, tagnaꞌ ngayti, si Onesimo ngaytu, egay pakinabang mu temed kayti, talagang may pakinabang ta na nga duwa.

¹² Kayti pagpaꞌuliꞌen ku naga kanya asat imu, baw kat kadakulat pagmaꞌal kut kanya, kaꞌaat ka sadili kung bilug i pagpaꞌuliꞌen ku ngaytu.

¹³ Sana pakaꞌlayen ku kanya sinit aken isaꞌun, mintras pirisu aku paꞌ sabap it pangadal ku it Magayeng Baritaꞌ, kanyay bilang begay mut aken nga manigtabang ku sinit pirisuwan.

¹⁴ Temed ega buwaten kuy atkayan in daꞌga talagang ikaw i garing. Magayen ku, talagang buluntad i tabang mu, ega maat magkaregesan.

¹⁵ Baw beken, barang nakablag kanyat imu it dekeyeꞌ nga timpu isaꞌun makaꞌuliꞌ siꞌ kanya nga mamirmiyan na kat pudir mu.

¹⁶ Baw kayti, ega na desang uripen mu kanya in daꞌga maꞌal na nga sulsug mu kat pamayaꞌ. Talagang maꞌal nga maꞌal kanyat aken, temed pagmaꞌal ku ngaytu, simpri subraꞌ pay imu nga pagmaꞌal ka uripen mu kanya baw sulsug mu na kat pamayaꞌ it Ampuꞌan.

¹⁷ Aypaꞌ, it talagang eꞌget i pagꞌurunyun ta kat pagpanindeg it Ampuꞌan, tanggapen mu si Onesimo ngaytu it masagyay nakem nga kat pabetang mu, aku na mismu i pagtanggapen mu.

¹⁸ In may kamaliꞌ nga binwat ya kuntrat imu u in may utang ya asat imu, abunuwan ku na lamang kanya.

¹⁹ Kamatuudan, isurat ku naytu kat sadili kung alima, Aku nga si Pablo i baalaꞌ mayad asan it imu. Temed magayen demdemen mu gasiꞌ nga utang mu nga nakem sinit aken i pagkakilala mu it ki Cristo, nga yay ikaribri mu.

²⁰ Aypaꞌ, pagmaꞌalen kung sulsug kat pamayaꞌ, asi-asi pat imu, buwaten mu nagay pagꞌangutun ku ngaytu. Kat keseg it pagꞌurunyun ta nga namayaꞌ it ki Cristo pasagyaen mu i nakem ku.

²¹ Pagsuratan ta ikaw sabap talagang pagsisiguruun ku nga ega daꞌgaen mu i ipagpakiꞌupakat ku ngaytut imu. Inawar ku nga subraꞌ paꞌ sikaytu i buwaten mu.

²² Paꞌugdun ku paꞌ, in mapakay gasit imu argan mu aku it mapaꞌabutan ku asan it balay mu. Ka pagꞌiꞌinawaren ku nga, kat keseg it mga panalangin mi, makaliꞌwan aku kat pirisuwan ngaytu nga makapaꞌuliꞌ aku naga asan it imyu.

Mga pangiyaꞌpusang pangumusta

²³ Pagkumustaen ka ni Epafras, nga sulsug ta kat pamayaꞌ it ki Cristo Jesus, baw iba ku sinit pirisuwan ngayni.

²⁴ Pati si Marcos, si Aristarco, si Demas, baw si Lucas, nga mga kasubung ku nga manigbuwat it buwaten it Ampuꞌan, magpangumusta gasit imu.

²⁵ Ipagpanalangin ku nga sana taꞌsebeng banar i nakem mi it ildaw ngaytu nga maggaring duꞌun it Ampuꞌan nga si Jesu-Cristo.