Exodo 8 - Tagbanwa

¹ Bawnga inaat siꞌ it AMPUꞌANG DIYUS it ki Moises, “Paꞌaduꞌun ka siꞌ it adiꞌ ngayti ka may ipagpasugid ku siꞌ it imu duꞌut kanya. Aaten mu nga, ‘Maat it AMPUꞌANG DIYUS, ipalugut mu na nga mapanaw i mga taawan ku ka sumamba it aken.

² Temed in ega paꞌ ipalugut mu, ipnuꞌun kuy muꞌsang banwa mu it baꞌak.

³ Padaklen ku sira nga banar duꞌut danum it Nilo ngayti, baw reet-reet na i maningdal. Pamanwaan nira i balay mu. Talagang ega nay radang-radangan it seled it balay, paꞌirigaꞌan, baꞌak nayang muꞌsa. Atkayan naga i muꞌsang kababalayan basta taga Egipto. Masalyaan nira i mga dapugan baw mga palangganaꞌ nga papaꞌalsaan it tinapay mi.

⁴ Pati mga bilug mi, masalyaan nira nat kakres.’”

⁵ Bawnga inaat siꞌ it AMPUꞌANG DIYUS it ki Moises, “Aaten mu na si Aaron nga seklen ya i sungkud ya ngayti bawnga iptat yay alima ya, ayun siꞌ duꞌut mga kadadanuman baw mga lapnaw, isaꞌun timingdal nay mga baꞌak duꞌut muꞌsang Egipto.”

⁶ Ta siyunud siꞌ ni Aaron i inaat ngayti. Timningdal nga matuud i mga baꞌak seked it baꞌak manang muꞌsa i Egipto.

⁷ Temed mga may kepetan ngayti nga pagsarigan it adiꞌ, nasbungan nira nagay iting binwat, nakapatingdal naga sira it mga baꞌak.

⁸ Ta, it atkayti na, ipiyapisiꞌ it adiꞌ ngayti na Moises. Pagꞌabut, maat ya, “Ipanalangin mi duꞌun it AMPUꞌANG DIYUS nga awaꞌen ya naga situt amen i mga baꞌak ngaytu. Bawnga ipalugut ku na nga mapanaw kamu isaꞌun makasamba kamu nat AMPUꞌANG DIYUS mi.”

⁹ Katubag si Moises it adiꞌ ngayti, “Ta ikaw na i magꞌaat. Kaꞌnu yan i ireg mu nga ipanalangin ku isaꞌun maꞌawaꞌ nay mga baꞌak ngaytu situt banwa mi baw mga babalayan mi, nga yamanay maꞌped, iyan nga duꞌut danum it Nilo?”

¹⁰ “Dedelem,” maat it adiꞌ ngayti. “Ta, ikaw bayan,” maat ni Moises, “in dedelem mana, isaꞌun maꞌrutan mu nga egay makasbung it AMPUꞌANG DIYUS namen.

¹¹ Magliꞌid nayay mga baꞌak ngayan kat balay mu baw duꞌut babalayan it mga taawan mu, yamanay maꞌped, duꞌut danum it Nilo.”

¹² Ta miyuliꞌ na na Moises duwa ni Aaron. Ipiyanalangin na nira duꞌun it AMPUꞌANG DIYUS nga awaꞌen ya nay mga baꞌak ngayti nga pabetang-betang ya duꞌun it adiꞌ ngayti.

¹³ Binwat naga it AMPUꞌANG DIYUS i inangut ngayti ni Moises. Miyatay nay muꞌsang mga baꞌak duꞌut mga babalayan, duꞌut mga kamaꞌyagan baw duꞌut mga kaꞌuꞌumaan.

¹⁴ Ipiyamagkambung nay patay ngayti nga mga baꞌak, unupat miyuyuk i sang kabanwaan.

¹⁵ Temed iyan namuyaan it adiꞌ ngayti nga naꞌawaꞌ nay iting kakuriꞌan, nagpategas siꞌ kanya. Ega siꞌ nagpagneg kanya it kana Moises duwa ni Aaron, subung naga it inaat ngayti it AMPUꞌANG DIYUS.

Neknek siꞌ i nanalakep

¹⁶ Inaat siꞌ it AMPUꞌANG DIYUS it ki Moises, “Aaten mu siꞌ si Aaron nga iptat ya i sungkud ya ngayti baw pakpaken yay lugtaꞌ. Bawnga duꞌun it muꞌsang Egipto, muꞌsang kapu-kapu duꞌun, magbalyu na nga neknek.”

¹⁷ Siyunud siꞌ nira i inaat ngayti. Iyan ipintat ni Aaron i alima ya nga magseskel it sungkud baw piyakpak ya nay lugtaꞌ, nagbalyu nga matuud nga neknek i muꞌsang kapu-kapu duꞌut Egipto. Taw baw ramu-ramu, pagnekneken na.

¹⁸ Siyukdanan naga gasiꞌ it mga may kepetan ngayti i atkayti, temed egay kaya nira nga pabalyuun nga neknek i kapu-kapu. Talagang magkakuriꞌan i katataawan ngayti, pati mga ramu-ramu, sabap it neknek ngayti.

¹⁹ Ta it atkayti, inaat it mga may kepetan ngayti i adiꞌ, “Itu ngaytung kaꞌulugan, buwat ga it esang diyus nga gunaan.” Temed sigi nga pagmategas it adiꞌ ngayti. Ega naga nagpagneg, subung it inaat ngayti it AMPUꞌANG DIYUS.

Langaw siꞌ i simnubli

²⁰ Inaat siꞌ it AMPUꞌANG DIYUS si Moises, “Maꞌadlem ka dedelem, ka kitaen mu siꞌ i adiꞌ in padanum kanya. Isugid mu siꞌ duꞌut kanya i ampang ku ngaytu nga magꞌaat, ‘Maat it AMPUꞌANG DIYUS, ipalugut mu na nga mapanaw i mga taawan ku ka sumamba sira it aken.

²¹ Temed in ega paꞌ ipalugut mu, langaw siꞌ i mipnuꞌ it babanwaan mi ngaytu, sadili mu nga pamalay-balay baw kat mga taawan mu. Langawun nay mga bilug mi baw ta, pati lugtaꞌ lekpen gasiꞌ.

²² Temed kat aldaw ngayan, belag i pabetang ku it rugar it Gosen nga pagtataꞌidan it mga taawan ku. Egay maltegan nga maski sang batu nga langaw duꞌun, isaꞌun maꞌrutan mu nga aku nga AMPUꞌANG DIYUS i magbebegbeg it pati banwa mi ngaytu.

²³ Bidaꞌen ku nagay akeng taawan baw taawan mu. Buwaten ku dedelem i kalililuꞌan ngaytung bagay.’”

²⁴ Ta binwat nga matuud it AMPUꞌANG DIYUS i inaat ya ngayti. Mugdak makang matuud i langaw, uratan i lawang. Siminled sira duꞌut mga kababalayan, duꞌun it balay it adiꞌ, mga katimbang ya, baw muꞌsang mga taga Egipto. Talagang dakulang karanggaꞌan duꞌun it muꞌsang banwa nga Egipto.

²⁵ Aypaꞌ ipiyapisiꞌ siꞌ it adiꞌ ngayti si Moises baw si Aaron. Maat ya, “Sigi, sumamba kamu nat Ampuꞌang Diyus mi temed situ nagat itung banwa.”

²⁶ Temed katubag si Moises, “Ega bayan mapakay nga situt Egipto i pagbuwatan namen it pagsamba namen ngaytu ka amen ngaytung pagsamba duꞌut ameng pagsirbiyan nga AMPUꞌANG DIYUS namen, talagang pagraꞌwayeng banar it mga taga situ. In situ i buwatan namen it tuluꞌ nira, siguradung imatayen nira kami it buntalan it batu.

²⁷ Aypaꞌ kaꞌilangan mapanaw kami seledat tulung aldaw, duꞌut rugar nga kapupuyangtan. Bawnga duꞌun i sambaan namen it AMPUꞌANG DIYUS namen, nga subung it ipiyagꞌurdin ya.”

²⁸ Inaat siꞌ it adiꞌ ngayti, “Ipalugut ku na kamu nga paꞌaduꞌun it rugar nga kapupuyangtan nga manamba it AMPUꞌANG DIYUS mi, temed kaꞌilangan ega naga paꞌalaid kamu. Ta sigi, panalanginan mu na aku.”

²⁹ Maat i tubag ni Moises, “Pagkaliꞌwan ku situ, manalangin aku duꞌut AMPUꞌANG DIYUS, bawnga dedelem magliꞌid na situt imyu nga muꞌsa i mga langaw ngaytu. Temed ta, siguruun mu nga ega desang pandaya-dayaꞌ mu, nga ega naga ipalugut mu kami nga mapanaw.”

³⁰ Pagkatupus kayti, nanliꞌwan na si Moises bawnga nanalangin duꞌun it AMPUꞌANG DIYUS.

³¹ Binwat nga matuud it AMPUꞌANG DIYUS i inangut ngayti ni Moises. Liminꞌid nagay muꞌsang mga langaw ngayti. Egay maski sangbat nga naꞌped.

³² Temed atkayti nagang atkayti, nagpategas nagay adiꞌ. Ega naga piyalugtan yay mga Israelita it mapanaw.