Exodo 5 - Tagbanwa

Miyadap na Moises duwa ni Aaron it adiꞌ temed makuriꞌ i liꞌwan ya

¹ Bawnga naꞌaduꞌun na na Moises duwa ni Aaron it adiꞌ it Egipto. Pagꞌabut nira, maat nira, “Kagalang-galang nga Adiꞌ, maat it AMPUꞌANG DIYUS namen nga mga Israelita, ‘Ipalugut mu i mga taawan ku ngaytu nga paꞌaduꞌun it rugar nga kapupuyangtan, ka pistaꞌan nira aku.’”

² Temed maat i tubag it adiꞌ ngayti, “Ay siyuy AMPUꞌANG DIYUS? Siyu kanya nga magꞌurdin-urdin it aken nga ipalugut ku nga mapanaw i mga Israelita? Egay kilala ku nga paꞌaaten ngayan nga AMPUꞌANG DIYUS. Talagang ega, ega maat ipasugu-sugut ku nga mapanaw i mga Israelita ngaytu!”

³ Maat siꞌ na Moises, “Talagang nagpakikita it amen i Ampuꞌang Diyus namen nga mga Hebreo. Aypaꞌ asi-asi pat imu, ipalugut mu na kami it mapanaw. Tulung aldaw tuy panawan namen ngaytu duꞌut rugar nga kapupuyangtan ka muwat it ipagsamba duꞌun it AMPUꞌANG DIYUS namen. Ka in daꞌga mabwat namen i atkayti, paꞌabutan ya kami it sarut u maski kamataynen.”

⁴ Temed iyan gay itiyubag it adiꞌ ngaytit Egipto it kana Moises, duwa ni Aaron, “Ay unuka paglingaꞌgen mi i mga taw? Unuka pagsasawun mi i buwat nira? Sigi, muliꞌ kamu na duꞌut mga buwaten mi.

⁵ Subraꞌ kamu na nga dakel nga mga Hebreo, baw pagꞌatrasuun mi nay buwat nira,” maat i paꞌugdun ya.

⁶ Aypaꞌ iti nga laging aldaw ipiyatawag it adiꞌ ngayti i mga taga Egipto ngayti nga magpamaalaꞌ baw mga kapatas nga Israelita. Pagkatingped nira, ipiyagꞌurdin ya, nga maat ya,

⁷ “Iyan mga manigbuwat ngayan, ega na gastuꞌan mi it kuꞌut nga ipagtimplaꞌ nirat pagpadsenen nira ngayan nga lugtaꞌ nga ipagbuwat-buwat it balay. Pabayaꞌan mi sira nga sira nay mamisiꞌ it gamiten nira.

⁸ Temed siguruun mi nga kadakel it ipagbuwat-buwat ngayti nga buwaten nira, subung naga it tagnaꞌ ngayti. Ega pakurangan it maski sangbat. Mamaggarus lamang yan sira, aypaꞌ yan mamagpamꞌun it manamba sirat Ampuꞌang Diyus nira.

⁹ Igpitan mi it kamatuudan i pabwat it kanira isaꞌun daꞌga nay rugar nira nga kapagneg it in unu-unu ngayan nga kalukuwan nga pagsugiden.”

¹⁰ Pagkatupus it adiꞌ it kumpur kuꞌaaten ya, namagpanaw nay mga magpamaalaꞌ ngayting mga taga Egipto baw mga kapatas ngayti. Ipiyanugid-sugid na nira duꞌun it kadakel it mga Israelita. “Kayti,” maat nira, “atkayti siꞌ i inaat it adiꞌ, nga daꞌkamu na gastuꞌan it kuꞌut.

¹¹ Kamu nay baalaꞌ mamisiꞌ it paggamiten mi in ari may maparagan mi, temed iyan kadakel it pagpadsenen mi ngayang lugtaꞌ, subung naga it kadakel it tagnaꞌ ngayti.”

¹² Ta it atkayti, nanlekep-lekep nay mga Israelita ngayti it banwa nga Egipto, panulus nira lamang it dagami, nga yanay gamiten nira.

¹³ Talagang pagꞌapuraꞌen sira nga banar it mga magpamaalaꞌ. Ipagreges it kanira nga makapadsen nagat lugtaꞌ nga kadakel, subung nagat tagnaꞌ ngayti nga paggastuꞌan paꞌ sira it kuꞌut.

¹⁴ Basta magkurang i magkabwat nira, pagbalbagen it mga magpamaalaꞌ ngayti i mga kapatas ngayting mga Israelita, pagꞌaaten paꞌ nira nga, “Unuka kurang i pagbuwaten it mga taw, ka ega na subuk tagnaꞌ?”

¹⁵ Aypaꞌ nangablaꞌ i mga kapatas ngayti duꞌun it adiꞌ. Maat nira, “Kagalang-galang it imu, unuka pagꞌatkaytuun mu na kami?

¹⁶ Unu na nga magsisigi pay pabwat it amen it pagpadsenen nga lugtaꞌ it daꞌkami na paggastuꞌan it kuꞌut? Bawnga pagbalbagen kami paꞌ, it ega naga salaꞌ namen, in daꞌga kat mga taawan mu naga.”

¹⁷ Katubag i adiꞌ ngayti, “Magarus kamung banar! Ega lamang kubwat kamu, aypaꞌ pagꞌingeꞌreten mi nga ipalugut ta kamu nga mapanaw ka sumamba kamut AMPUꞌANG DIYUS mi.

¹⁸ Ala! Muliꞌ kamu duꞌun it buwaten mi! Talagang daꞌkamu na gastuꞌan it kuꞌut, temed dapat nga kadakel it padsenen mi nga lugtaꞌ, subung naga it kadakel it pagbuwaten mi ngaytit tagnaꞌ.”

¹⁹ Natantuwan it mga kapatas ngayti i kakuriꞌ it kabetangan nira it inaat na ngayti sira nga buwaten nira subung nagat tagnaꞌ ngayti, ega pakurangan.

²⁰ Pagꞌuliꞌ nira nga garing ngayti duꞌun it adiꞌ, naragpangan nira si Moises baw si Aaron. Magꞌelat i duwa ngayti it kanira.

²¹ Pagkalteg it mamagꞌuliꞌ ngayti, maat nira, “Talagang tiksaꞌen kamu it AMPUꞌANG DIYUS sabap it binwat mi ngaytut amen kayti! Ta unu paꞌ kayti it nabwatan mi nay adiꞌ baw mga taawan ya it patikdan nirat sariyen kami naytut pangimatay nira!”

Piyapaꞌgen it AMPUꞌANG DIYUS i sanggup ya nga iribri ya i mga Israelita nga mga taawan ya

²² Ta, nanalangin siꞌ si Moises duꞌut AMPUꞌANG DIYUS. Maat ya, “Agalen ku, unuka atkaytu nga pagpakuriꞌan mu i mga taw ngaytu? Unuka tiyaꞌeg mu aku situ?

²³ Naꞌaduꞌun aku na it adiꞌ baw isiyugid kuy kumpur ipiyagꞌaat mu. Ta unupat gimnaring sikayan, subraꞌ na nga pagꞌigpitan yay mga taw ngaytu. Baw subung it ega nagay binwat mu nga tabang mu it kanira.”