Exodo 40 - Tagbanwa

Ipagsekat nat AMPUꞌANG DIYUS nga ipatindeg na i Tabirnakulu

¹ Maat siꞌ it AMPUꞌANG DIYUS it ki Moises,

² “Kat intrada it uꞌnang bulan, ipatindeg mu na i Tabirnakulu ngaytu, nga itu nay papagsugi-sugidan nga balay.

³ Iduꞌun mu it seled ya i Kaban ngaytut Pakiꞌupakat bawnga lingben mu it kurtinaꞌ ngayan.

⁴ Ipasled mu i lamisaan baw gayen-gayenen mu nga pandaꞌtun it kumpur inaat ku nga idaꞌtun mu asan it sagpaw ya. Ipasled mu gasiꞌ i titidawan baw ayusun mu i mga tidaw nga buwat-buwat ya.

⁵ Iyan bulawan nga papangantengan it kamangyan, asan i betangan mut patuꞌ it paglilingben ngayan nga Kaban it Pakiꞌupakat. Bawnga kurtinaꞌan mu nay salakwatan it Tabirnakulu ngaytu.”

⁶ Ipiyasigi it AMPUꞌANG DIYUS i munaꞌaw ya, nga magꞌaat, “Iyan tumbaga ngayan nga papangantengan it ipagsamba, asan i betangan mu it sarungaan it Tabirnakulu ngaytu nga patuꞌ it salakwatan ya.

⁷ Ibtang mu gasiꞌ kat piyagtengaꞌan it papangantengan ngaytut ipagsamba baw Tabirnakulu i palangganaꞌ baw betangan mut danum.

⁸ Pagkaꞌman mu, kaliputputun mu nat mga kurtinaꞌ baw ikabit mu nay kurtinaꞌ it salakwatan ya.

⁹ Bawnga pisiꞌen mu i lana nga ipagpaꞌid, ka paꞌidan mu i Tabirnakulu ngaytu, pati muꞌsang mga buwat-buwat baw kagamitan ya. Atkaytu i buwaten mu isaꞌun, muꞌsa ngaytu, ega na babasta-bastaen, in daꞌga ipiyasiguru nga kat AMPUꞌANG DIYUS na.

¹⁰ Bawnga isunud mu nga paꞌidan i papangantengan ngaytut ipagsamba baw mga kagamitan ya, isaꞌun magꞌega basta-basta nga banar.

¹¹ Paꞌidan mu gasiꞌ it lana ngaytu i palangganaꞌ baw magtitindeg nga dadaꞌtunan ya, isaꞌun ega gasiꞌ basta-basta, in daꞌga ipiyasiguru nga kat AMPUꞌANG DIYUS gasiꞌ.

¹² Si Aaron baw mga anak ya nga lalaki, tabanen mu sira asat salakwatan it Tabirnakulu, bawnga panlimpiyuꞌun mu sirat danum duꞌun.

¹³ In nalimpiyuꞌ mu na, isꞌul mu nat ki Aaron i ega ngayan basta-basta nga pakayan ya baw paturuꞌan mu gasiꞌ kanya it lana. Kat atkaytu nga buwat mu it kanya, ipasiguru mu kanya nga sasirduti nga magsirbi it aken.

¹⁴ Papaꞌadeꞌdengen mu gasiꞌ i mga anak ya. Papakayan mu gasiꞌ.

¹⁵ Baw paturuꞌan mu gasiꞌ sirat lana, nga subung it binwat mu it amaꞌ nira, isaꞌun makasirbi gasiꞌ sirat aken kat katengdanan naga nga sasirduti. Ta sabap it paturuꞌan mu sirat lana, maneꞌteꞌ i pagkasasirduti nira, subliyen naga it anak-inapuꞌ nira.”

¹⁶ Ta, binwat ni Moises i muꞌsa ngayti nga kumpur ipiyagꞌurdin ngaytit AMPUꞌANG DIYUS.

¹⁷ Egay beken, Tabirnakulu ngayti, ipiyatindeg nira it intrada it uꞌnang bulan it ikadwang taꞌun garing it pagkalꞌid nira ngayti duꞌut Egipto.

Pagkaꞌman it Tabirnakulu ngayti, siyakep nat kabantugan it AMPUꞌANG DIYUS

³⁴ Pagkaꞌman it Tabirnakulu ngayti, siyakep na it kunum ngayti nga magpanguꞌna it panaw nira. Talagang napnuꞌ na it magsilaw na nga kabantugan it AMPUꞌANG DIYUS.

³⁵ Ega paꞌ magkasled si Moises sabap it kunum ngayti nga magbubuꞌtung it Tabirnakulu baw yanayti, napnuꞌ na ngaytit kabantugan it AMPUꞌANG DIYUS.

³⁶ Ta garing kayti, panaw it mga Israelita ngayti, magpanaw ga sirang magpadibwat i kunum ngayti nga subuk magtitindeg duꞌut sagpaw it Tabirnakulu.

³⁷ In ega magpadibwat i kunum ngayti, ta ega mamagpanaw sira. Pagꞌelaten nira nga pirmi i kunum ngayti nga padibwat bawnga mapanaw sira.

³⁸ Yay matuud, kaꞌlay it panaw it mga Israelita ngayti, kat mata nira nga muꞌsa i kunum ngaytit AMPUꞌANG DIYUS. In aldawun, magkalawag nira nga patuꞌ naga it Tabirnakulu ngayti. In delemen, subung siꞌ it apuy i kunum ngayti. Pirmi nga magkaltegan nira i imandaꞌan ngayti nga kaꞌiba-iba nira i AMPUꞌANG DIYUS.