Exodo 35 - Tagbanwa

Ipiyagsugid ni Moises duꞌut mga taw i pamwat it ipagpabwat ngaytit kanira it Ampuꞌang Diyus

⁴ Inaat siꞌ ni Moises i kadakel it mga Israelita ngayti. Maat ya, “Itu siꞌ i ipiyagꞌurdin it AMPUꞌANG DIYUS.

⁵ In siyu i magꞌireg megay duꞌun it AMPUꞌANG DIYUS kat mga betang ya, magbegay kamu na duꞌun it kanya. Mga itu may itu i mapakay nga ibgay mi, bulawan, pirak baw tumbaga,

⁶ benang nga maluꞌnaw, indilibelen baw madarag, pirmira nga abel, bulbul it kambing nga pagbubwaten na,

⁷ anit it tupa nga lalaki nga liyuuꞌ it madarag, baw iyan pirmira nga kulit it ramu-ramu kat dagat, baw tablaꞌ nga akasya.

⁸ Mapakay gasiꞌ nga ibgay mi i lana nga magkatidaw, babangluun nga ipagragiꞌ it lana nga ipagpaꞌid, baw iyan mabanglu nga ipagragiꞌ duꞌun it kamangyan.

⁹ Beken paꞌ nga ibgay mi, mga marerga nga pagminaꞌen nga batu nga subung it kornalina baw mga beken, nga ipagtakin duꞌut mga piyakabadyuꞌ it sasirduti nga pagpangaranat efod baw pektoral.

¹⁰ Tiꞌmesen mi i muꞌsang makakaꞌrut muwat it atkaytung buwat, kumpur ipiyagꞌurdin ngaytut AMPUꞌANG DIYUS nga buwaten.

¹¹ Ka sira i pabwaten it Tabirnakulu ngaytu baw muꞌsang kagamitan duꞌun. Itu may itu ngaytu i buwaten nira. Balay ngaytu nga magkapuru-purun, mga piyakaꞌatep ya, mga buwat-buwat kat dibwat, mga kakabitan baw pakpetan it kanira, mga piyakaꞌarigi ya baw mga uꞌulbudan it arigi ngaytu.

¹² Kaban ngaytut Pakiꞌupakat baw mga papasaꞌnan ya. Saꞌeb ya nga pagpangaranat Magkaꞌangutan it Ildaw nga Kapasinsiyaan baw kurtinaꞌ nga ilingeb it Kaban ngaytu.

¹³ Lamisaan nga dadaꞌtunan it tinapay nga ipasalamat duꞌun it Ampuꞌang Diyus, mga papasaꞌnan it lamisaan ngaytu baw muꞌsang kagamitan ya.

¹⁴ Tidaw nga nagsanga-sangaen, mga kagamitan ya baw lana nga ipagbetang it titidawan ngaytu.

¹⁵ Papangantengan it kamangyan baw papasaꞌnan ya. Lana nga ipagpaꞌid baw kamangyan gasiꞌ. Kurtinaꞌ nga ikurtinaꞌ it salakwatan it Tabirnakulu.

¹⁶ Tumbaga ngayang papangantengan, pati daꞌta-daꞌtag ya nga tumbaga naga, mga papasaꞌnan baw beken pang kagamitan nga kaꞌuyutan it papangantengan ngaytu. Papangugasan nga palangganaꞌ nga tumbaga baw magtitindeg nga dadaꞌtunan ya.

¹⁷ Mga kurtinaꞌ nga ikaliputput it Tabirnakulu ngaytu baw kurtinaꞌ nga piyakatalaꞌep ya, mga piyakaꞌarigi nga pagkabitan it pakpetan it mga kurtinaꞌ ngaytu, pati mga uꞌulbudan it mga piyakaꞌarigi ngaytu.

¹⁸ Mga ipagrugsuk nga pakpetan it lubid nga ipagtaꞌgen it Tabirnakulu baw magkakaliputput ngaytung mga kurtinaꞌ.

¹⁹ Pati mga ega basta-bastang pakayan ni Aaron baw mga anak ya nga yay pagpakayen nira in magseled sira duꞌun it Tabirnakulu nga magsirbi it aken kat katengdanan nira nga pagkasasirduti.”