Exodo 27 - Tagbanwa

Pamwat it Papangantengan

¹ “Itu gasiꞌ i buwaten mi, papangantengan nga kayu nga akasya nagay buwaten. Tulung parasikwan i katagbaw ya. Limang parasikwan i kaꞌabwat, atnagay kalayaw.

² Asat sagpaw it mga kantu ya buwaten i subuk tanduk. Randun i pamwat. Bawnga lulupan i muꞌsa it tumbaga.

³ Magbuwat kamu gasiꞌ it mga kagamitan it papangantengan ngaytu, purus tumbaga i buwaten, nga subuk berebtangan it abu, mga pala, mga karung, mga subuk sarapang baw pugun.

⁶ Muwat kamu it mga papasaꞌnan nga lampung. Akasya nagay buwaten baw lulupan mi tu it tumbaga.

⁷ Iruꞌuk mi i mga lampung ngaytu asat ipiyatalinga mi nga asat mga kantu it papangantengan ngaytu ka yay papasaꞌnan ya.

⁸ Pamwat mi it papangantengan ngaytu, buwas i seled ya, baw buwaten, tablaꞌ nga akasya naga, subung naga it pabetang-betang nga ipagꞌaat ku it imu kayti situt bukid ngaytu.”

Mga tidaw duꞌun it Tabirnakulu ngayti, palinagan it susgu

²⁰ “Iꞌurdin mu it mga Israelita nga tumaban sira asat imu it pirmirang lana it buwat olibo isaꞌun delem-delem maglinag it susgu i mga tidaw duꞌut Tabirnakulu.

²¹ Puwistuꞌ it mga tidaw ngaytu, duꞌun it sangbat ngayan nga seled nga ayun kat liꞌwan it kurtinaꞌ ngayan nga magbabagiꞌ it seled, temed patuꞌ naga it paglilingben nga Kaban it Pakiꞌupakat. Si Aaron baw mga anak ya nga lalaki i magꞌarigra it mga tidaw ngaytu. Kada apu-apun, pagketan na, baw parngen mana in aldaw. Kaꞌilangan, maglinag it susgu duꞌut adapan it AMPUꞌANG DIYUS. Itung urdin, kaꞌilangan nga sunudun it mga Israelita seked it magtungtung-magꞌinapuꞌ.”