Exodo 20 - Tagbanwa

Ipiyaskel it Ampuꞌang Diyus it ki Moises i sang puluꞌ nga urdin

¹ Atkaytu na i inaat it Ampuꞌang Diyus duꞌun it kadakel ngayti.

² “Aku i AMPUꞌANG DIYUS mi, nga nagpaliꞌwan it imyu duꞌun it Egipto baw duꞌun it pagkaꞌuripen mi.

³ Kuydaw ka it may kilalaen baw sirbiyan mu nga maski unu nga ganti mu it aken.

⁴ Kuydaw ka it buwat it ladawan nga sambaen mu nga subung it ladawan it maski unu nga kat langit, kat banwa baw kat danum.

⁵ Kuydaw mu masalyaan it panluudan nga sambaen i mga iyan ngayan, ka aku nga AMPUꞌANG DIYUS mu, maꞌimun. Talagang rigaen ku i muꞌsa nga pablag it aken, pati mga anak nira seked it ikaꞌpat nga tungtung-inapuꞌ.

⁶ Temed seked it maski rinibu nga tungtung-inapuꞌ, ildawan ku sira nga magkayli it aken baw sumunud it mga urdin ku.

⁷ Kuydaw mu masalyaan it sumangpit i ngaran ku kat egay kapulusan u galang. Sabap aku nga AMPUꞌANG DIYUS mu, talagang rigaen ku i maski siyu nga sumangpit it ngaran ku it daꞌgay kakapulusan u galang.

⁸ Ega lipatan mu nga ibagiꞌ mu it aken i Aldaw it Kapaꞌnaan.

⁹ Seked lamang it enem nga aldaw i buwatan mu it mga buwaten mu.

¹⁰ Ikapitung aldaw, Aldaw na it Kapaꞌnaan. Ibagiꞌ mu na it aken nga AMPUꞌANG DIYUS i itung aldaw. Kat ikapitu ngaytu nga aldaw, kuydaw ka kasalya muwat it maski unu nga buwaten mu, pati anak mu, katabang mu, mga ayep mu baw maski ega kabilug mu basta asan kanya it pamalay-balay mu.

¹¹ Sabap seledat enem nga aldaw, kiyumplitu ku i mga kugunaen ku nga langit, banwa, dagat baw muꞌsang betang nira. Pagꞌabut it ikapitu ngaytu nga aldaw, ega nay binwat ku ka nakumplitu nay muꞌsa. Aypaꞌ ka ipiyablag ku na i itung aldaw, ka ipagpabetang ku nga ega basta-bastang aldaw.

¹² Galangen mu i amaꞌ baw inaꞌ mu, isaꞌun paꞌlayen ka duꞌun it banwa nga ibgay ku it imyu.

¹³ Kuydaw ka it pangimatay it masigkataw mu.

¹⁴ Kuydaw ka it pamakun duꞌun it ega asawa mu.

¹⁵ Kuydaw ka it panakaw.

¹⁶ Kuydaw ka it panistugu it egay matuud kuntraꞌ kat maꞌiba mu.

¹⁷ Kuydaw ka it kaꞌirak. Ega irakan mu i pamalay-balay it masigkataw mu. Ega irakan mu i asawa ya, mga uripen ya, mga ayep ya, u maski unu nga kusas ya.”

Ereꞌeret talagay iꞌlam it mga Israelita

¹⁸ Namagyegyeg it iꞌlam i mga Israelita ngayti, pagkagneg nira it pamsar it duldug ngayti baw tingeg ngaytit taburi, baw pagkalteg it kilat, pati tabuk ngayti duꞌun it bukid. Timnitindeg na lamang sira duꞌut pagtitindegan nira ngayti nga duꞌut ala-alaid.

¹⁹ Baw inupakat nira si Moises, nga maat nira, “Ikaw na i mampang, pagneg kami yan. Ega na Ampuꞌang Diyus ngayan, ka barang matay kami!”

²⁰ “Aaꞌ,” maat ni Moises it kanira, “ayaw kamut aliꞌ. Sukda-sukdan ya lamang bayan it imyu. Ireg ya lamang nga galangen mi kanya it may iꞌlam isaꞌun ega na muwat kamu it kasalaꞌan.”

²¹ Temed magꞌaliꞌ paꞌ i mga taw ngayti, duꞌun na lamang sira it ala-alaid ngayti. Si Moises na lamang ngayti i nagpatpad duꞌut kunum ngayti nga maꞌpal nga duꞌun i Ampuꞌang Diyus.