Exodo 15 - Tagbanwa

¹ Pagkamuya nira kayti, kimnantaꞌ na Moises baw muꞌsang mga Israelita ngayti it pagbantug nira it AMPUꞌANG DIYUS. Magꞌaat i kiyantaꞌ nira, “Talagang kantaꞌan kuytuy AMPUꞌANG DIYUS, ka ega basta-basta i pandaꞌeg ya. Mga kabayuꞌ baw mga sundaluꞌ it kalaban ya, subuk ibiyuntal ya lamang duꞌun it dagat.

² Gunaan i AMPUꞌANG DIYUS nga pagkantaꞌan ku. Kanya naga i nagribri it aken kat mga kalaban ku. Kanya naga i Ampuꞌang Diyus ku. Talagang bantugun ku kanya. Kanyay Ampuꞌang Diyus it giyaringan ku. Talagang bantugun ku i guna ya.”

Siyarasa it mga Israelita si Moises sabap it mapaꞌit i danum

²² Ega na naꞌlay, tiyaban na ni Moises i mga Israelita ngayti garing duꞌun it pagpangaranan ngaytit Madarag nga Dagat, naꞌaduꞌun i pamanaw nira it rugar nga kapupuyangtan nga duꞌut Shur. Tulung aldaw nay piyanawan nira, egay magkapsagan nira nga danum.

²³ Nakaꞌbut na sira it rugar nga pagpangaranat Mara. Ireg sugiden it iting ngaran, mapaꞌit, sabap it ereꞌeret nga paꞌit it danum duꞌun. Ega magkaꞌinum nira.

²⁴ Ta it atkayti, siyarasa it mga Israelita ngayti si Moises. Maat nira, “Ta unu naytuy imnun namen kaytu?”

²⁵ Ta it atkayti, nangabang si Moises duꞌun it AMPUꞌANG DIYUS. Itulduꞌ it kanya, peꞌtek it kayu. Egay beken, pinsiꞌ ni Moises bawnga ibiyuntal ya duꞌut danum ngayti. Ta, sakaling naꞌiriꞌ i paꞌit ya. Siyukda-sukdanan sira it AMPUꞌANG DIYUS duꞌun kayti baw may ipiyagꞌurdin ya it kanira.

²⁶ Maat ya it kanira, “In talagang tingled i nakem mi kat pagsunud mi it aken, nga buwat mi purus mataldeng kat panleteg ku, baw sunudun mi i muꞌsang mga urdin baw pabetang-betang ku, ega ipalabay ku it imyu i mga sarut nga ipiyapanaw ku duꞌun it mga taga Egipto. Aku ngaytu nga AMPUꞌANG DIYUS i Manigꞌubaꞌubat mi.”

²⁷ Sunud siꞌ nga naꞌbut nira, duꞌun it Elim. Duꞌun kayti may sang puluꞌ baw duwa nga katabudan baw pitung puluꞌ nga puꞌun i maglulwak nga palma nga magayeng pagkaꞌnen i buwaꞌ ya. Namagbalay-balay sira duꞌun kayti, duꞌun nat tepad it mga tabud ngayti.