Exodo 10 - Tagbanwa

Apan siꞌ i miyabut nga salakep

¹ Bawnga inaat siꞌ it AMPUꞌANG DIYUS si Moises. Maat ya, “Paꞌaduꞌun ka siꞌ it adiꞌ, ka ipasigi ku pay pagmategas ya ngayan baw kat mga katimbang ya isaꞌun matuman kuy mga kalililuꞌang bagay nga kubwaten ku duꞌun it kanira.

² Baw gasiꞌ isaꞌun matuturan mi it mga anak-inapuꞌ mi in magꞌuꞌunu piyakuriꞌan ku i mga taga Egipto kat mga kalililuꞌan ngaytung bagay nga kimnegdan it kanira. Baw beken, isaꞌun maꞌrutan mi nga aku, AMPUꞌANG DIYUS nga matuud.”

³ Aypaꞌ naꞌaduꞌun siꞌ na Moises, duwa ni Aaron, it adiꞌ ngayti. Maat i inaat nira, “Pagnegan mu i ampang it AMPUꞌANG DIYUS namen nga mga Hebreo, nga magꞌaat, ‘Sang unu pay kaꞌlay bawnga pababaꞌ ka it aken? Kaꞌilangan ipalugut mu na nga mapanaw nay mga taawan ku ka sumamba sira it aken.

⁴ Temed in pategas ka paꞌ, ka ega paꞌ ipalugut mu, dedelem apan siꞌ i ipaꞌabut ku situt banwa mi ngaytu.

⁵ Talagang ereꞌeret nga tanip. Basta simnanap, ega na magkaltegan i lugtaꞌ. Iyan mga luwak nga ega naranggaꞌ it pagtedag ngaytit yilu baw mga egenen paꞌ nga kayu, ubsun nirat kaꞌen.

⁶ Imu nga balay baw mga balay it mga katimbang mu baw muꞌsang mga taga Egipto, mapnuꞌ talaga it mga apan ngaytu. Garing it tagnaꞌ paꞌ, ega pay nalabayan it mga kagiyaringanan mi nga subung it malabayan mi kayti.’” Pagkatupus it iting inampang, limniꞌwan na Moises duꞌut adapan it adiꞌ ngayti.

⁷ Inaat nat mga katimbang yay adiꞌ ngayti. Maat nira, “Sang unu pay kaꞌlay it kakuriꞌan tami sabap it itung taw? Ipalugut mu na nga mapanaw i mga taw ngayti ka sumamba it AMPUꞌANG DIYUS nira. Unu, ega paꞌ magkaltegan mu nga naranggaꞌ nay muꞌsang banwa nga Egipto?”

⁸ Aypaꞌ ipiyapisiꞌ it adiꞌ ngayti na Moises. “Sigi na,” maat ya, “manamba kamu nat AMPUꞌANG DIYUS mi. Temed siyu manggid i mapanaw it manamba?”

⁹ Timnubag si Moises, nga maat ya, “Muꞌsa kami nagay mapanaw, mangaꞌwaꞌen, magugurang, babay, lalaki, pati mga ayep namen, sabap it magpistaꞌ kami, nga pistaꞌan namen i AMPUꞌANG DIYUS.”

¹⁰ Mampang i adiꞌ ngayti, maat ya, “Ta sigi, baw sana ildawan kamu it AMPUꞌANG DIYUS ngayang paꞌaaten mi, basta palugtan ku naga kamu nga mapanaw kamung muꞌsa. Ka yay matuud, talagang ega ipalugut kut pabayaꞌen mi i mga asawa mi baw mga anak mi! Maꞌyag nga may antap it nakem mi nga ega magayen.

¹¹ Iyan lamang i papanawun, mga lalaki. Sigi na, manamba kamu nat AMPUꞌANG DIYUS, ka yay pagꞌangutun mi, temed iyan lamang, mga lalaki, i mapanaw.” Pagkatupus ya, piyaliꞌwan it adiꞌ ngayti na Moises duꞌut adapan ya.

¹² Aypaꞌ, inaat siꞌ it AMPUꞌANG DIYUS it ki Moises. Maat ya, “Iptat mu nay alima mu isaꞌun magsinabut nay mga apan duꞌun it muꞌsang Egipto. Ubsun nirat kaꞌen i kumpur naꞌped it yilu ngayti duꞌut mga uma.”

¹³ Siyunud siꞌ ni Moises i inaat ngayti. Piyaꞌyep it AMPUꞌANG DIYUS i deres nga garing duꞌut lebatan. Nagꞌapun baw naglinag i siyayasayan duꞌut Egipto. Pangyagan taban nat deres ngayti i ereꞌeret na nga tanip it apan.

¹⁴ Lingkep nira i muꞌsang banwa nga Egipto. Kada rugar, dakel nga dakel i apan. Garing it tagnaꞌ paꞌ seked it kaꞌnu-kaꞌnu, ega masubraꞌan i kadakel it iti nga apan.

¹⁵ Magpangitem i lugtaꞌ it kadakel it apan ngayti in sumanap sira. Imbus nirat kumaꞌen i muꞌsang mga luwak duꞌut uma, baw muꞌsang mga buwat kayu. Egay maski sangbat nga daꞌun nga naꞌped duꞌut muꞌsang banwa nga Egipto.

¹⁶ Ta ipiyadali-daliꞌ siꞌ it adiꞌ ngaytit papisiꞌ na Moises. Pagꞌabut nira, maat ya, “Nagkasalaꞌan aku siꞌ, nga kuntraꞌ kat AMPUꞌANG DIYUS mi baw kuntrat imyu.

¹⁷ Kayti pasinsiyaen mi naga aku it sumaꞌup. Manalangin kamu duꞌun it AMPUꞌANG DIYUS isaꞌun iriꞌen ya naga situt aken i ega ngaytu basta-bastang kakuriꞌan.”

¹⁸ Limniꞌwan na si Moises duꞌut adapan it adiꞌ ngayti bawnga nanalangin kanya duꞌut AMPUꞌANG DIYUS.

¹⁹ Ta piyaganti na it AMPUꞌANG DIYUS i deres. Garing na duꞌut sedpan, masbeg nga deres i gimnanti. Ipinrad na nga muꞌsa i mga apan ngayti. Duꞌun i pinradan nira it Madarag nga Dagat. Egay maski sangbat nga naꞌped duꞌun it muꞌsang Egipto.

²⁰ Temed ipiyasigi it AMPUꞌANG DIYUS i pagmategas it adiꞌ ngayti, aypaꞌ ega naga ipiyalugut yay mga Israelita nga mapanaw.

Diminlem it nagpintut i Egipto

²¹ Aypaꞌ inaat siꞌ it AMPUꞌANG DIYUS si Moises. Maat ya, “Ipatindeg mu siꞌ i alima mu isaꞌun demlem it nagpintut nang nagpintut i muꞌsang Egipto.”

²² Siyunud ni Moises i inaat ngayti. Diminlem nga matuud i muꞌsang Egipto. Seledat tulung aldaw nagpintut nat pandele-delem.

²³ Daꞌgay uru-urut it sang kataawan it iba ya, aypaꞌ seledat nakatlu ngayti egay liꞌi-liꞌid nira. Temed maꞌyag i duꞌut rugar ngayting pagtataꞌidan it mga Israelita.

²⁴ Ta it atkayti, ipiyapisiꞌ siꞌ it adiꞌ ngayti si Moises, ka maat ya, “Sigi na. Manamba kamu nat AMPUꞌANG DIYUS. Pati mga asawa mi baw mga anak mi, pabayaꞌen mi naga. Iyan lamang i ituduꞌ mi situ, mga ayep mi.”

²⁵ Temed maat i tubag ni Moises, “Kaꞌilangan naga nga ipalugut mu it amen, sabap kaꞌilangan may antengen nga ipagsamba namen duꞌun it AMPUꞌANG DIYUS namen.

²⁶ Yay matuud, tabanen namen nagay muꞌsang mga ayep namen, egay ipaꞌped. Ka in sumamba kami, kaꞌilangan may antengen namen duꞌun it AMPUꞌANG DIYUS, temed ega paꞌ magkaꞌrutan namen in ari manggid i mapakay ya. Maꞌrutan namen mana in duꞌun kami na.”

²⁷ Temed sabap it piyapategas na ngayti it AMPUꞌANG DIYUS i adiꞌ ngayti, ega naga maat ireg ya nga ipaliꞌwan sira.

²⁸ Egay beken, inimugaw it adiꞌ ngayti si Moises. “Sigi, liꞌwan!” maat ya. “Iyan siguruun mu nga daꞌka na madap situt aken! Ka yay matuud, kat aldaw nga pakikita ka sit aken, iyan nagang aldaw i ipatay mu!”

²⁹ “Aaꞌ, masunud yay imu ngayan,” maat ni Moises ngayti. “Talagang daꞌku na pakikita it imu seked it kaꞌnu-kaꞌnu.”