Esdras 7 - Tagbanwa

Ikadwang gurupu it mga nadakepan nga mga Judio nga namagꞌuliꞌ garing duꞌun it Babilonia [Mga 459 B.C.]

¹ Nagtaꞌlib i mga taꞌun bawnga, iyan adiꞌ it Persia nga si Artajerjes i adiꞌ na duꞌun it Babilonia, miyabut duꞌun it Jerusalem i esang taw nga pagpangaranan it ki Esdras.

^5b Esa kanya nga tungtung-inapuꞌ it puꞌun-puꞌun it mga Piyakamataꞌas nga Sasirduti nga si Aaron.

⁸ Ikalimang bulan it ikapitung taꞌun nga pagꞌadiꞌ ni Artajerjes i ipiyagꞌabut ni Esdras duꞌut Jerusalem ngayti.

¹⁰ Si Esdras ngaytu, ipiyasiguru ya i sadili ya kat pagꞌadal baw pagsunud it mga urdin it AMPUꞌANG DIYUS, baw kat panulduꞌ gasiꞌ it mga pagpaꞌiguꞌan it mga urdin ngaytu kat mga kabilug ya nga tungtung-inapuꞌ ni Israel.

^11a Ituy magbebtang duꞌun it surat nga ipiyagbegay it adiꞌ nga si Artajerjes duꞌun it sasirduti ngayti nga si Esdras paggaring ya nga muliꞌ na duꞌun it Jerusalem.

¹² “Si Artajerjes nga piyakamataꞌas nga adiꞌ i tagsurat kaytu. Ituy surat ku nga ipiyagbegay ku it ki Esdras, iyan sasirduti baw makaꞌrut nga banar nga manigpaꞌyag it mga urdin it Ampuꞌang Diyus nga duꞌun it langit.

¹³ Kayti ipagꞌurdin ku nga in siyu-siyu it mga Israelita situ i kubayaꞌ it imu duꞌun it Jerusalem, pati mga sasirduti baw mga katabang nira nga Levita situt pagsasakpan ku, mapakay nga mayaꞌ.

¹⁴ Aku baw pitu nga mga katimbang ku nga manigpadisir i magbegay it imu it pudir nga baꞌnawun mu, nga letganan in pagsunudun it kamatuudan it mga taga Juda baw Jerusalem i mga urdin it Ampuꞌang Diyus mu nga ipiyaskel it imu.

¹⁵ Tabanen mu na i pirak baw bulawan nga ipagbegay namen, aku baw mga pitu ngaytu nga katimbang ku. Ituꞌun ngaytu, begay nga ipagsamba namen it Ampuꞌang Diyus nga miniliꞌ it Jerusalem nga iyan i bilang taꞌidan ya.

¹⁶ Tabanen mu na gasiꞌ i kumpur ibgay it imyu it mga taga Babilonia nga pirak u bulawan, baw iyan buluntad nga begay it mga kabanwa mu baw mga sasirduti, nga egay beken nga pagꞌargan, balay ngayti nga papagsambaang balay it Ampuꞌang Diyus nira duꞌun it Jerusalem.

¹⁷ Ituꞌun ngaytu, yanay iꞌalang mu it mga tudu nga bakaꞌ, mga tupa, baw uꞌuybun it tupa nga buwateng panalisi duꞌun it papangantengan nga duꞌun it balay ngaytu it Ampuꞌang Diyus mi duꞌun it Jerusalem. Baw iꞌalang mu gasiꞌ it mga pangaꞌen baw pagꞌimnun nga ipagbegay dengan it pagbuwaten i mga panalisi ngaytu nga ipagsamba.

²¹ Baw kat muꞌsa nga mga manigkepet it pirak kat prubinsiya nga duꞌun it sedpan nga ayun it kadanuman it Eufrates, ipagꞌurdin ku kayti nga egay pagduwa-duwa ibgay mi i kumpur ipabgay it imyu ni Esdras ngaytu nga sasirduti baw manigpaꞌyag it mga urdin it Ampuꞌang Diyus nga duꞌun it langit.

²³ Muꞌsa nga ipagꞌurdin it Ampuꞌang Diyus nga duꞌut langit pasar it balay nga papagsambaan it kanya, kaꞌilangan paꞌresan mi nga sunudun, ka in daꞌga barang isgan ya kami nga sang anakan.

²⁵ Baw ikaw, Esdras, kat keseg it kamatuudan nga kasepsep nga ipiyagꞌildaw it imu it Ampuꞌang Diyus mu, patindeg ka it mga manigꞌukuman baw manigpamaalaꞌ it mga kabilug mu duꞌun it sedpan nga ayun it kadanuman it Eufrates, sira nga pagsasakpen it mga urdin it Ampuꞌang Diyus nga pagsirbiyan mu. Baw in siyu-siyuy egay uru-urut pasar it pagpasakep it mga urdin ngaytu, tulduꞌan mu sira.

²⁶ In siyu-siyu nga ega sumunud it mga urdin it Ampuꞌang Diyus mu, baw ega gasiꞌ sumunud it ipagꞌurdin ku ngaytu, egay pagduwa-duwa nga betanganan it ukuman nga maski kamataynen, u in daꞌga tabanen duꞌun it alaid nga banwa, panrangpasan, u pirisuun.”

²⁷ Pagkatanggap ku it surat ngayti, kaꞌampang aku, “Bantugun i AMPUꞌANG DIYUS it mga kagiyaringanan tami, sabap it piyanakman ya i adiꞌ ngaytu nga pagayenen i balay nga papagsambaang balay it AMPUꞌANG DIYUS duꞌun it Jerusalem.

²⁸ Talagang tiyabang aku it AMPUꞌANG DIYUS, aypaꞌ ka nasagyaan aku it adiꞌ ngaytu, mga katimbang ya nga manigpadisir, baw muꞌsa nga matataꞌas nga punuꞌan situt kaꞌadiꞌan ya ngaytu.” Ta, sabap it itu ngaytu, nagmaꞌiseg i nakem ku bawnga dakel kat mga matataꞌas nga ginuꞌu it mga kabilug ku nga tungtung-inapuꞌ ni Israel i nakumbinyu ku nga muliꞌ na nga kaꞌibaan ku.