Esdras 6 - Tagbanwa

Naparagan naga i isiyurat nga urdin ni Ciro

¹ Egay beken, ipiyaꞌimuyaꞌ it adiꞌ ngayti nga si Dario i muꞌsa nga pagdadawaꞌan it mga kasuratan pasar it Babilonia.

² Duꞌun it pagkukutaꞌen nga siyudad it Ecbatana, nga duꞌun it prubinsiya it Media, naparagan i esang kasuratan nga magꞌaat i magsusurat,

³ “Kat uꞌnang taꞌun nga pagꞌadiꞌ it adiꞌ nga si Ciro, nagbuwat kanya it esang urdin pasar it papagsambaang balay it Ampuꞌang Diyus nga duꞌun it Jerusalem. Magꞌaat i ipiyagꞌurdin ya, ‘Kaꞌilangan nga ipatindeg sit sumaꞌup i Templo, isaꞌun duꞌun naga i pagbuwatan baw pagꞌantengan it pasalamat baw panalisi nga ipagꞌangut it kapasinsiyaan. Iyan i kadibwat ya, enem nga pulung parasikwan, atkayan naga i kalayaw ya.

⁴ Iyan dingding ya, kada tulung lapis i dadakulang batu panngaꞌan it tablaꞌ. Muꞌsa nga gastuꞌun, pisiꞌen duꞌun it pundu it adiꞌ.

⁵ Baw iyan garamiten duꞌun it Templo ngaytu nga duꞌut Jerusalem, nga bulawan baw pirak i binwat, nga riyangpas ni Nabucodonosor, kaꞌilangan nga iꞌuliꞌ naga nga muꞌsa duꞌun it kanya-kanyang rugar duꞌun it Templo ngaytu nga buwaten, nga papagsambaan nga balay it Ampuꞌang Diyus.’”

⁶ Ta, pagkabasa it urdin ngayti it adiꞌ it tagnaꞌ nga si Ciro, egay beken, nagpataban i adiꞌ ngayti nga si Dario it surat, nga magꞌaat i ipiyagꞌurdin ya, “Tatnai, nga gubirnadur it muꞌsang rugar kat sedpan nga ayun it kadanuman it Eufrates, baw katimbang mu nga si Setar-boznai, baw mga taawan mi, iyanꞌen nga pagbuwaten, ega pasilabtan mi.

⁷ Pataꞌnan mi lamang i gubirnadur it mga Judio baw mga magpamaalaꞌ it pabwat ngayan isaꞌun makapatindeg siꞌ kat pagtitindegan ya nga lagi i Templo ngayan nga papagsambaang balay it Ampuꞌang Diyus.

⁸ Baw kayti, ipagꞌurdin kut imyu nga tumabang kamu it mga gastuꞌun nira. Pisiꞌen mi kat pundu nga ipagpabgay mi it mga sinakepan mi kat sedpan nga ayun ngayan it kadanuman it Eufrates, baw begayan mi i mga mamagbuwat ngayti it in unuy pagkaꞌilanganen nira isaꞌun ega maꞌatrasu i buwat.

¹¹ In siyu-siyuy sumutil it mga urdin ku ngaytu, buwaten it kanya, awaꞌan i balay ya it sang batuy pakseg, irugsuk, taraꞌisan i kiyaꞌpusan, bawnga ibegsak na duꞌun i simnutil ngayti, langkuy ranggaꞌen na i balay ya it egay maski unu nga ipaꞌped.

¹² Baw pagꞌiꞌinawaren ku nga, iyan Ampuꞌang Diyus ngaytu nga miniliꞌ it Jerusalem nga iyan i patindegan it balay nga papagsambaan it kanya, ranggaꞌen ya i in siyu nga adiꞌ u bangsa nga mangaas nga baꞌguun ya i itu nga urdin u rumanggaꞌ it Templo ngayan nga pagbuwaten. Aku nga adiꞌ nga si Dario i nagꞌurdin kaytu. Muꞌsa ngaytu, kaꞌilangan ega magduwa-duwa sunudun it kamatuudan.”

Ipiyasigi i buwat it Templo ngayti seked it naꞌman [Mga 516 B.C.]

¹³ Ta, iting urdin, pagkatanggap it gubirnadur nga si Tatnai, si Setar-boznai, baw mga katimbang nira, siyunud nira nga matuud.

¹⁴ Egay beken, ipiyasigi it mga ginuꞌu it mga Judio i buwat ngayti it Templo. Baw talagang nanggayen i buwat ka pirming pagpaksegen i nakem nira it pangadal it duwa ngayting prupitaꞌ nga si Ageo baw si Zacarias nga apuꞌ ni Iddo. Aypaꞌ naꞌman niray Templo ngayti uyun kat inaat it Ampuꞌang Diyus, baw uyun kat mga ipiyagꞌurdin it mga adiꞌ ngayti it Persia nga magsasakep it Babilonia nga si Ciro, si Dario, baw si Artajerjes.

¹⁵ Naꞌman niray Templo ngayti kat ikatlung aldaw it bulan it Adar, kat ikaꞌnem nga taꞌun it pagꞌadiꞌ it adiꞌ ngayti nga si Dario.

¹⁶ Pagkaꞌman, binwat it mga sasirduti, mga Levita, baw muꞌsang kaꞌibaan nira ngayti nga namagkaꞌuliꞌ nga dakepan, ipiyasiguru nat masagyang-masagya i Templo ngayti kat pagsamba it Ampuꞌang Diyus.

¹⁷ Giyamit nira nga ipagsamba nga pasalamat, sang gatus i tudu nga bakaꞌ, duwang gatus i lalaki nga tupa, baw epat nga gatus i mga uꞌuybun naga it tupa. Ta, panalisi nga ipagꞌangut it kapasinsiyaan it kasalaꞌan it muꞌsang bangsa nga Israel, giyamit nira, sang puluꞌ may duwa i mga mandangan, nga kada esa, papatu-patuꞌ it sang puluꞌ may duwa ngayti nga kuyunang mga tungtung-inapuꞌ ni Israel.

¹⁸ Iyan gasiꞌ i binwat nira, giyurupu-gurupu nira i mga sasirduti baw mga Levita kat kanya-kanyang buwaten baw ipangatengdanan nga aldaw it pagsirbi nirat Ampuꞌang Diyus duꞌun it Templo ngayti, nga uyun duꞌun it ipiyagꞌurdin naga ni Moises.