Esdras 5 - Tagbanwa

Siyulag it Ampuꞌang Diyus i mga Judio isaꞌun ipatabus nira i patindeg it baꞌgung Templo [Mga 521 B.C.]

¹ Kat iti nga timpu may duwa nga prupitaꞌ nga si Ageo baw si Zacarias, nga apuꞌ ni Iddo. Nagpapuꞌun sirat sumugid duꞌun it mga Judio ngayti nga magtataꞌid duꞌun it Juda baw duꞌun it Jerusalem it ampang nga ipagpasugid it kanira it Ampuꞌang Diyus it bangsa nira nga Israel.

Piyakseg i nakem ni Zorobabel nga tabusun naga i Templo it Ampuꞌang Diyus

² Ta, it atkayti, siyarunga na ni Zorobabel nga anak ni Sealtiel baw si Jesua nga anak ni Josadac i buwaten ngayti nga baꞌguun i Templo it Ampuꞌang Diyus duꞌun it Jerusalem. Mintras magbuwat sira, pagpaksegen i nakem nirang muꞌsa it duwa ngayting prupitaꞌ nga si Ageo baw si Zacarias.

Inimbistigar i mga Judio sabap it pagpatindeg nira ngayti it baꞌgung Templo

³ Ta, kat iting timpu, miyabut duꞌun it Jerusalem si Tatnai, nga kanyay gubirnadur it muꞌsang rugar kat sedpan nga ayun it kadanuman it Eufrates. Iba ya si Setar-boznai baw may beken paꞌ. Pagkalteg nira it Templo nga pagbuwaten, miningkut. Maat nira, “Siyuy miyurdin it imyu nga buwaten mi i Templo ngaytu baw pagayenen?”

⁴ Iningkut nira gasiꞌ in siyu may siyu i ngaran it mga mamagbuwat.

⁵ Temed, sabap it pagtatarimaen it Ampuꞌang Diyus i mga pagbayaꞌen it mga Judio ngayti, aypaꞌ ka ega naga biyawal sira, maski pasigi i patindeg nira ngaytit Templo. Ka, pikir ni Tatnai, ipaꞌrut daꞌan duꞌun it adiꞌ nga si Dario, baw elaten i tubag ya.

⁶ Aypaꞌ ka, binwat it gubirnadur ngayti nga si Tatnai, baw si Setar-boznai baw mga katimbang nira duꞌun, nagpataban sirat surat duꞌun it adiꞌ nga si Dario.

⁷ Magꞌaat i ibintang nira duꞌun it surat, “Paggalangen namen nga Adiꞌ nga si Dario, Pagꞌiꞌinawaren namen nga maꞌimbeng nga pirmi i kabetangan mu.

⁸ Kagalang-galang it imu, ipagpaꞌrut namen nga, kami, naꞌaduꞌun it prubinsiya it Juda. Ta, yay namuyaan namen duꞌun nga ipagpatindeg nira i Templo it Ampuꞌang Diyus nga landaw nga gunaan. Mga dingding it Templo ngaytu, pagbuwaten nga dadakulaꞌ nga mga lininuꞌ nga batu nga pagpanngaꞌan gasiꞌ it mga tablaꞌ. Talagang egay paꞌna nira it buwat, aypaꞌ ka madali-daliꞌ nga ikaꞌman.

⁹ Iningkut namen i mga pagbayaꞌen nira in siyu i miyurdin it kanira nga buwaten niraytu baw pagayenen.

¹⁰ Piyaruri namen gasiꞌ in siyu may siyu i ngaran it mga magpanguꞌna it kanira isaꞌun ipaꞌrut namen it imu, kagalang-galang nga Adiꞌ.

¹¹ Yay tubag nirat amen, maat nira, ‘Kami ngaytu, mga manigsirbi it Ampuꞌang Diyus, kanya nga magbebegbeg it muꞌsang langit baw banwa. Talagang pagbuwaten namen siꞌ tu it sumaꞌup i Templo ngaytu nga ipiyabwat nagat mga kagiyaringanan namen it esang mabantug nga adiꞌ it bangsa namen nga Israel it tagnaꞌ paꞌ nga timpu.

¹² Salaꞌ lamang, piyaꞌiseg it mga kagiyaringanan namen i Ampuꞌang Diyus ngaytu nga magbebegbeg it langit baw banwa. Aypaꞌ ka ipiyadakepan ya sira it iyan Caldeo nga si Nabucodonosor, nga adiꞌ it Babilonia. Riyanggaꞌ yay Templo ngaytu baw tiyaban ya sira nga dakepan duꞌun it Babilonia.

¹³ Temed iyan si Ciro nay adiꞌ it Babilonia, iyan uꞌnang taꞌun it pagꞌadiꞌ ya, nagpapanaw kanya it esang urdin nga mapakay nga buwaten namen naga i Templo ngaytu nga papagsambaan nameng balay it Ampuꞌang Diyus.’

¹⁵ Ipiyagꞌaat ya nga tabanen i muꞌsa ngayti duꞌun it Jerusalem ka iduꞌun siꞌ it Templo ngayti nga papagsambaan nirang balay it Ampuꞌang Diyus in nakapatindeg na nira, nga islun naga it pagtitindegan ya nga lagi.

¹⁷ Aypaꞌ, in beteꞌ mapakay lamang, kagalang-galang nga Adiꞌ, ipaꞌimuyaꞌ mu i mga pagsusuratan it mga bagay-bagay pasar it Babilonia, in unu matuud nga ipiyagꞌurdin it adiꞌ nga si Ciro nga buwaten i papagsambaang balay ngaytu it Ampuꞌang Diyus sinit Jerusalem. Bawnga pagꞌangutun namen gasiꞌ nga maꞌrutan namen naga in unuy kat nakem mu sabap it itu ngaytu.”