Esdras 3 - Tagbanwa

Ipiyatindeg siꞌ i papangantengan nga kat Ampuꞌang Diyus baw ipiyapanaw siꞌ i dalan it ipagsamba it kanya

¹ Ta, pagkaꞌbut it ikapitung bulan, nga nakatiꞌen-tiꞌen siꞌ i mga Israelita ngayti kat kanya-kanya nagang lansangan, binwat nira, nagtingped sirang muꞌsa duꞌun it Jerusalem.

² Pagkatingped, biyaꞌgu na nira i papangantengan nga pagꞌantengan it mga pagbuwaten nga ipagsamba nira it Ampuꞌang Diyus it bangsa nira nga Israel, uyun kat magsusurat duꞌun it mga urdin nga ipiyaskel it ki Moises nga manigsirbi it Ampuꞌang Diyus it tagnaꞌ. Kat buwat nira ngayti, piyanguꞌnaan sira ni Jesua nga anak ni Josadac, mga kaꞌibaan ya nga sasirduti, baw si Zorobabel nga anak ni Sealtiel, kaꞌuyutan it beken nga mga kaduguꞌan ya.

³ Ipiyatindeg nira i papangantengan ngayti kat pagtitindegan ya nagang lagi. Bawnga, paribasay magꞌiꞌlam sira it mga beken nga bangsa kat linibut nira, meyag-mapun, magꞌanteng sira it mga pagbuwaten nga ipagsamba duꞌun it AMPUꞌANG DIYUS.

⁶ Garing it uꞌnang aldaw it ikapitu ngayting bulan, maski ega paꞌ nagpapuꞌun sirat patindeg it Templo, mamagꞌanteng na sira it mga pagbuwateng ipagsamba nira it AMPUꞌANG DIYUS.

Nagpapuꞌun na sirat patindeg it baꞌgung Templo [Mga 535 B.C.]

⁷ Ta, yan piyapuꞌnan na nira nga ipatindeg nay Templo, binwat nira, minggay sirat pirak nga itangdan it mga maniglinuꞌ nga pagayen it mga batu, baw duꞌun it mga karpintiru. Baw minggay gasiꞌ sirat pangaꞌen, pagꞌimnun, baw lana it olibo duꞌun it mga taga Tiro baw Sidon, nga ipagtukar it mga kayu nga sedro nga gumaring duꞌun it Talun it Libano. Inupakat nira nga, garing duꞌun it Libano, ipaltaw i mga kayu ngayti baw guyudun it barkuꞌ nga padungguꞌ duꞌun it Joppe, uyun kat paꞌintulut it adiꞌ it Persia nga si Ciro.

⁸ Iyan ikadwa na nga bulan it ikadwa nira na nga taꞌun it pagkaꞌuliꞌ nira ngayti duꞌun it Jerusalem nga patindeg it baꞌgung Templo, piyapuꞌnan na niray iting buwaten. Piyanguꞌnaan sira ni Zorobabel nga anak ni Sealtiel, baw ni Jesua nga anak ni Josadac. Katabang nira nga minwat, mga sasirduti, mga Levita, baw muꞌsa nga mga kabanwa nira nga miyuliꞌ naga duꞌun it Jerusalem nga nadakepan ngayti. Iyan mga Levita, gimnaring kat idad nga duwang puluꞌ padibwat, iyan i ipiyatindeg nira nga mamaalaꞌ it buwaten ngayti.