Esdras 1 - Tagbanwa

Kat panakem it Ampuꞌang Diyus ipiyagꞌurdin it adiꞌ nga si Ciro nga kaꞌuliꞌ na i mga Judio duꞌun it sadili nira nga banwa [Mga 537 B.C.]

¹ Iyan uꞌnang taꞌun it pagꞌadiꞌ duꞌun it Babilonia ni Ciro nga adiꞌ it Persia, piyanakman kanya it AMPUꞌANG DIYUS it ipapanaw ya nga urdin kat muꞌsang sinakepan ya. Nagꞌabut tu isaꞌun matuman i inampang it AMPUꞌANG DIYUS it tagnaꞌ nga ipiyasugid ya it prupitaꞌ nga si Jeremias. Egay beken, ipiyasurat it adiꞌ ngayti i ipapanaw ya nga urdin ya nga magꞌaat,

² “Ituy ipagsugid ni Ciro nga adiꞌ it Persia, Iyan AMPUꞌANG DIYUS nga duꞌun it langit, ipiyagꞌildaw ya it aken nga masakep ku i muꞌsang bangsa situt sinirungat langit. Baw ipiyagꞌaat yat aken nga kaꞌilangan nga pabwat aku it balay nga papagsambaan it kanya duꞌun it Jerusalem nga duꞌun it Juda.

³ Aypaꞌ ka in siyu-siyu nga mga taawan it Ampuꞌang Diyus ngaytu, sana ildawan ya kamu, ka pagpaꞌintulutan ku na kamu nga muliꞌ na duꞌun it Jerusalem nga sakep it Juda, ka ayusun mi naga i Templo nga papagsambaan mi nga balay it AMPUꞌANG DIYUS ngaytu it bangsa mi nga Israel, kanya nga kamatuudan nga Ampuꞌan.

⁴ Baw in siyu-siyu it mga taawan ya i patuduꞌ situ ka magkayli nat kanya-kanyang pagtataꞌidan, kaꞌilangan nga tumabang sira it mga kabanwa nira ngaytu nga muliꞌ. Begayan nira sira it mga pirak, bulawan, baw in unu pay beken nga pagkaꞌilanganen nga subung it mga ayep, puyra it buluntad nga tabang nira kat ikaꞌayus it Templo ngayti duꞌun it Jerusalem nga papagsambaan mi nga balay it Ampuꞌang Diyus mi.”

Uꞌnang gurupu it mga dakepan nga Judio nga namagꞌuliꞌ garing duꞌun it Babilonia

⁵ Ta, it atkayti, namagꞌitsu na i mga ginuꞌu kat mga kuyunang mga tungtung-inapuꞌ ni Juda baw ki Benjamin. Namagꞌitsu gasiꞌ i mga sasirduti, mga Levita, baw muꞌsa nga piyayaꞌngan it Ampuꞌang Diyus i nakem nga muliꞌ duꞌun it Jerusalem ka tumabang it ipatindeg siꞌ ngayti nga papagsambaan nira nga balay it AMPUꞌANG DIYUS.

⁶ Tiyabang sira nga matuud it mga kabanwa nira nga patuduꞌ. Binggayan sira it mga pirak baw bulawan. Binggayan paꞌ gasiꞌ sira it mga beken nga kaꞌilangan baw mga ayep, puyra it mga buluntad nga ipagbegay kat ikaꞌayus it Templo.

⁷ Baw iyan mga garamiten duꞌun it Templo nga riyangpasan it adiꞌ nga si Nabucodonosor it tagnaꞌ, nga ipiyagduꞌun ya nat papagsambaan it mga pagbete-beteꞌen ya nga diyus duꞌun it Babilonia, ipiyaliꞌwan nga muꞌsa it adiꞌ ngayti nga si Ciro.