Efeso 6 - Tagbanwa

Magayen nga ugaliꞌen it mga giyaringan baw anak

¹ Ta kamu nga mga mangaꞌwaꞌ, sumunud kamu it mga giyaringan mi, ka ituy tamaꞌ nga pagbuwaten it mga magpamayaꞌ it Ampuꞌan nga si Jesus.

² Dedemdemen mi i urdin ngayan it Ampuꞌang Diyus nga magꞌaat, “Galangen mu i amaꞌ baw inaꞌ mu.” Talagang impurtantiꞌ i itung urdin baw in sunudun ta sakpen ta it magꞌuꞌuyut nga sanggup ya nga magꞌaat,

³ “isaꞌun pirming magpanggayen i kabetangan mu baw paꞌlayen ka situt banwa.”

⁴ Ta kamu nga mga giyaringan, subraꞌ na in mga lalaki, inturun mi nga ega kamaliꞌ i padisir mi it mga anak mi, nga magkaskedan na sira baw mandalaꞌ. In daꞌga yay magayen, padakulaꞌen mi sira it pirming pagtulduꞌan it kaꞌirgan it Ampuꞌan, baw pagtaldengen i muꞌsang pagbuwaten nirang kamaliꞌ, uyun naga kat kaꞌirgan it Ampuꞌan ngaytu.

Magayen gasiꞌ nga ugaliꞌen it mga uripen baw mga agalen

⁵ Ta kamu gasiꞌ nga mga uripen, kaꞌilangan nga sunudun mit ustuꞌ nga pagsunud i mga agalen mi situt banwa. Sunudun mit may kamatuudang paggalang it kanira, ega bete-beteꞌ lamang, nga subung bat si Cristo i pagsirbiyan mi.

⁶ Ega maat paꞌresan mi lamang i pagsunud mi in pagleltegan kamu ga it agalen mi isaꞌun sagyaan nira kamu. Sana may maglelteg it daꞌga, talagang iyan nay ipagpadaꞌeg mi kat nakem mi, ega na lamang agalen mi i pagsirbiyan in daꞌga si Cristo, baw masagyang-masagya kamu na nga magbuwat it kaꞌirgan it Ampuꞌang Diyus.

⁷ Talagang iyan i magayen, magsirbi kamu it masagyay nakem mi nga subung it Ampuꞌan i pagsirbiyan mi, ega na taw lamang.

⁸ Pagdedemdemen mi nga talagang tumbasan it Ampuꞌan i kada magayen nga pagbuwaten it maski siyu, uripen u daꞌga.

⁹ Kamu gasiꞌ nga mga agalen, magayen kamu naga kat mga uripen mi. Ega taa-tatap agumaꞌen mit maraꞌe-raꞌet, sabap magkaꞌrutan mi nga surubung kamu nga uripen it esa-esay agalen mi nga duꞌun it langit nga egay pagbidaꞌen ya.

Iyan ipiyagꞌildaw nga pangabal nga ipagꞌindaꞌeg tami it ki Satanas

¹⁰ Ta, mga pangiyaꞌpusang sugi-sugid ku, paꞌresan mi kat pangaꞌgenan mi i egay kalandaw nga guna it Ampuꞌan isaꞌun mapaꞌgen nga pirmi i pamayaꞌ mi.

¹¹ Magayen, pirmi nga paggamiten mi i muꞌsang ipiyagꞌildaw it Ampuꞌang Diyus it aten isaꞌun malabanan mit magayen si Satanas kat muꞌsang pangakal yat imyu. In ipasbung tat pangabal it sundaluꞌ, itu nga ipiyagꞌildaw it Ampuꞌang Diyus i subuk pangabal ta.

¹² Ka iyan mga maglaban it aten, ega kasubung tang mga taw lamang, in daꞌga mga ega mabilang nga maraꞌe-raꞌet duꞌut lawang, mga magpanlud baw daꞌga nga may dakulang kiyaꞌrutan baw pudir duꞌut kanya-kanyang pagsasakpan situt banwa. Siray magpamaalaꞌ it kadleman nga duꞌun magpangaꞌgenan i katataawan situt sinirungat langit.

¹³ Aypaꞌ kaꞌilangan talaga nga isꞌul mi i muꞌsa ngaytung pangabal nga ipiyagꞌildaw it Ampuꞌang Diyus it aten, isaꞌun in kaꞌnu-kaꞌnu sulungun kamu it kalaban mi ngaytu, malabanan mit kaꞌustuꞌan, tananan kamu nga magtitindeg kamu naga it pagayen-gayen.

¹⁴ Aypaꞌ ka pirmi kamu nga magꞌaꞌalistu. Iyan i piyakasambut mi, kamatuudan nga bulun kat muꞌsang pagbuwaten baw pagꞌampangen mi. Iyan pangaꞌgenan nga mataldeng, iyan i bilang kanukal it deꞌgan mi, nga pagkakabitan gasit sambut mi.

¹⁵ Iyan ega basta-bastang kaꞌimbengan it nakem nga liꞌwan it pamayaꞌ mi it Magayeng Baritaꞌ, iyan i bilang pansundaluꞌ nga sapatus mi isaꞌun simpan talagay mga aꞌay mi, ega dumarasay.

¹⁶ Baw ega matuduꞌ i taming mi nga ituy mapaꞌgen nga pagsarig baw pamayaꞌ mi it Ampuꞌang Diyus baw muꞌsang mga sanggup ya. Kat itu ngaytu, magkapareng mi nay muꞌsang magdedleg nga panaꞌ it Gimpuꞌut Karaꞌe-raꞌetan.

¹⁷ Pagdedemdemen mi nga pirmi i karibriyan mi ka yay piyakakatupung mi. Baw iyan piyakabasiꞌ mi nga iꞌindaꞌeg it mga kalaban mi ngaytu, mga ampang it Ampuꞌang Diyus nga ampangen mi kat tabang it Espiritu Santo.

¹⁸ Muꞌsa ngaytu, buwaten mi tu kat keseg it panalangin. Magayen, kat panguꞌna it Espiritu Santo, mapiyanalangin kamu nga pirmi kat muꞌsang kalasit panalangin. Sarungaen mit magayen i itung buwat, paꞌresan, ega palubay-lubay. Baw sana muꞌsang mga magpamayaꞌ i ipagpanalangin mi.

¹⁹ Baw pati aku, sana ipagpanalangin mi naga gasiꞌ nga begayan akut Ampuꞌang Diyus it tamaꞌ nga pagꞌampangen, isaꞌun magmaꞌiseg i nakem ku nga makapaꞌyag ku i tagu-taguꞌ ngaytu nga Magayeng Baritaꞌ nga ipiyaꞌrut nat Ampuꞌang Diyus.

²⁰ Sabap kat pangadal it Magayen ngaytung Baritaꞌ, piyakarguꞌan akut Ampuꞌang Diyus it katengdanan ku, baw yay ipiyagkakadina ngaytut aken sinit pirisuwan. Aypaꞌ, kaꞌilangan, ipagpanalangin mi nga makapangadal ku naga it may pagmaꞌiseg it nakem, uyun kat dapat ku nga buwaten.

Pangiyaꞌpusan nga sugi-sugid

²¹ Ta, si Tiquico nga pagmaꞌalen tami nga sulsug kat pamayaꞌ baw magkasarigan nga manigsirbi it Ampuꞌan, kanya i tumuturan asat imyu it muꞌsang bagay pasar it kabetangan ku baw magkabwat ku sini.

²² Piyapaꞌasan ku yan kanya it imyu isaꞌun matantuwan mi nga banar i kabetangan namen sini, baw isaꞌun mapakseg ya i nakem mi.

²³ Ipagpanalangin ku nga sana ibgay it imyu it Diyus Amaꞌ baw Ampuꞌan nga si Jesu-Cristo i pagꞌurunyun nga kat ikaꞌimbeng it pakiꞌiba-iba mi nga sang sulsugan. Sana padakulaꞌen gasiꞌ i raras mi it esa may esa baw papaꞌgenen i pamayaꞌ mi.

²⁴ Ipagpanalangin ku gasiꞌ nga subraꞌ nga begayan it ildaw it Ampuꞌang Diyus i muꞌsa nga may kamatuudang pagmaꞌal it Ampuꞌan tami nga si Jesu-Cristo.