Efeso 3 - Tagbanwa

Manigsirbi si Pablo it Ampuꞌang Diyus kat ikagayen it mga taw nga ega Judio

¹ Aypaꞌ sabap it muꞌsa ngaytung ituꞌun, sigi talagang panalangin ku pasar it imyu, aku nga si Pablo nga pagpipirisuun sabap it pagsirbi ku it ki Cristo Jesus kat ikagayen mi nga taw nga ega Judio.

² Siguru pagꞌuꞌrutan mi na i katengdanan ku ngaytu nga ipiyakargut Ampuꞌang Diyus it aken nga manigpangadal aku kat mga bangsa nga ega Judio it pasar it kaꞌildaw ya.

³ Nabaritaꞌan mi siguru nga may subuk ilimbaw nat Ampuꞌang Diyus it aken nga esang tagu-taguꞌ nga pabetang-betang ya. (Subung nat nakapaꞌyag ku na nga lagit dekeyeꞌ kat nakasurat ku na,

⁴ nga in basaen mi mamuyaan mi in sang unuy kasepsep ku it tagu-taguꞌ ngaytung paꞌiguꞌ-iguꞌ pasar it ki Cristo.)

⁵ Itung paꞌiguꞌ-iguꞌ, ega ipiyaꞌrut it Ampuꞌang Diyus kat mga taw it tagnang mga timpu temed kayti, kat tabang it Espiritu Santo nga ipiyapasarum ya duꞌun it bilug nira, ipiyatantu ya na kat mga piniliꞌ ya nga apustul baw prupitaꞌ.

⁶ Ta, ituytu i pabetang-betang ngaytung paꞌaaten, nga iyan mga taw nga ega Judio, kat pagtanggap nirat Magayen ngaytung Baritaꞌ, kasbung na sirat mga Judio nga may kabagiꞌan nat ildaw ngaytung subray basta nga garing duꞌut Ampuꞌang Diyus. Kakabit gasiꞌ sira it sang kabilu-bilugan nga bilug ni Cristo Jesus, baw sabap it pakilagpit nirat kanya, sira gasiꞌ i tumanggap it muꞌsang isiyanggup it Ampuꞌang Diyus nga kagayenan.

⁷ Talagang kat kaꞌildaw it Ampuꞌang Diyus it aken baw kat keseg it guna ya, binwat ya aku nga manigsirbi ya kat pangadal ku it Magayen ngaytung Baritaꞌ.

⁸ Kalililuꞌan talagaytu ka maski piyakatimawaꞌ nga taawan it Ampuꞌang Diyus, akuy timawaꞌ pat kanya. Takaꞌ maski atkayan, kat kadakulat ildaw ya, napakay ya naga aku nga binggayan it itung buwaten, nga ipangadal ku duꞌun it mga taw nga ega Judio i pasar it kagayenan nga magkapisiꞌ duꞌun it ki Cristo, kagayenan nga bastanting-bastanti baw ega pagtaꞌseben it pikiran.

⁹ Baw ipiyakarguꞌ ya gasit aken i buwat nga ipaꞌyag ku kat muꞌsang taw in magꞌuꞌunu matuman ya i pabetang-betang ya nga garing pat ega pay banwa ipagtagu-taguꞌ ya, kanya nga nagguna it muꞌsa.

¹⁰ Ka iyan mga magpamegbeg baw may pudir duꞌut lawang, in maltegan nira i pagꞌesa-esa it mga bangsat taw nga magsarig baw magpamayaꞌ nat ki Jesus, matanyag it kanira i kasepsep it Ampuꞌang Diyus it muꞌsang bagay baw kagayen it mga pabetang-betang ya.

¹¹ Mga pabetang-betang ya ngaytu, garing pat ega pay banwa, baw ipagpatuman kayti it ki Cristo Jesus nga Ampuꞌan tami.

¹² Sabap it pakilagpit tami it ki Cristo ngaytu, nga ituy liꞌwan it pamayaꞌ tat kanya, magkaꞌadap tami na duꞌut Ampuꞌang Diyus ka ega nay maski unu nga lesa. Magkadiritsu ta na duꞌut kanya i maski unu nga kusugiden it masagyay nakem tami nga ega nay pagpangangaliꞌan.

¹³ Aypaꞌ pagꞌangut-angutun kut imyu nga ega ikaranggat pamayaꞌ mi i mga kakuriꞌan nga paglabayen ku sabap it imyu, ka ipagsugid ku nga kat ikabantug mi tu.

Mga ipagpanalangin ni Pablo kat ikagayen it mga taga Efeso

¹⁴ Aypaꞌ, sabap it ega basta-basta ngaytung ildaw it Ampuꞌang Diyus nga Amaꞌ tami, talagang ipagpanluud ku na duꞌun it kanya,

¹⁵ kanya nga piyakaꞌAmaꞌ it muꞌsang mga inanak ya, kat langit na baw situ pat banwa, nga pagpangaranan nat pamalay-balay ya.

¹⁶ Ipagpanalangin ku duꞌut kanya nga garing kat kadakulat kabantugan ya nga egay kaꞌbusan, sana begayan ya kamut kaksegan it nakem, nga magꞌeꞌget talagay pamayaꞌ mi kat tabang it magsasarum nga Espiritu Santo.

¹⁷ Baw gasiꞌ nga, sabap it pagsarig baw pamayaꞌ mi ngaytu, manakenaꞌ si Cristo asan it nakem mi. Ipagpanalangin ku gasiꞌ nga subuk maggagamut baw magrurugsuk i kararas baw pagmaꞌal mi,

¹⁸ isaꞌun sang kamuwan it muꞌsang mga taawan it Ampuꞌang Diyus i begayan it Ampuꞌan nga matantuwan mi nga banar in sang unu nga ega babasta-bastaen baw kabantug i raras ni Cristo it aten.

¹⁹ Baw sana subraꞌ nga malabayan mi baw taꞌseben i nakem mi sabap it raras ya ngaytu, lamang ega ngaytu magkatangked-tangked it taw i kapuꞌsaan ya, isaꞌun makumplituwan kamu it kakayaan nga ikaguru it muꞌsang ipagpaguru it Ampuꞌang Diyus it imyu nga adat ya.

²⁰ Aypaꞌ, kaꞌilangan, talagang bantugun tami i Ampuꞌang Diyus ngaytu, kanya nga magkabwat it bastanting-bastanti baw subrang-subraꞌ kat muꞌsa nga pagꞌangutun ta duꞌut kanya, u kat maski pagpikiren ta, sigun kat guna ya ngaytu nga paglabayen ta kat pangaꞌgenan tami.

²¹ Eeꞌ baꞌ, bantugun kanya it egay kaskedan seked it kaꞌnu-kaꞌnu sabap it kabantugan ya nga magkamuyaan kat kumpur mga taawan ya baw magkamuyaan gasiꞌ duꞌun it ki Cristo Jesus. Kamatuudan tu.