Efeso 2 - Tagbanwa

Iyan mga maglalagpit it ki Cristo, binggayan nat baꞌgung kaꞌgenan

¹ Talagang kamu katꞌesa, kaꞌalimbawaan mi, subuk patay kat panleteg it Ampuꞌang Diyus kat kadakulat mga kasalaꞌan mi nga kuntraꞌ kat kaꞌirgan ya. Egay maski unu nga magpangbit kat nakem mi in pasar it pagkilala it kanya.

² Egay beken nga pagragaen mi it tagnaꞌ ngayti, karaꞌe-raꞌetan situt banwa ngaytu. Sabap kat iting timpu pagsasakpen kamu paꞌ it pagbayaꞌen it mga maraꞌe-raꞌet, sira nga magpupudir duꞌut lawang, iyan mga magpanlud baw daꞌga nga magbebegbeg it mga taw kayti nga magkuntraꞌ it Ampuꞌang Diyus.

³ Yay matuud, tagnaꞌ, atkayan nagay adat tami nga muꞌsa ka pagsunudun lamang i singkadan tang adat nga maraꞌe-raꞌet. Pagsumbayaꞌen i maraꞌe-raꞌet nga kaꞌirgan it bilug baw in unu nga kat pikiran. Aypaꞌ kat adat tami ngayti it tagnaꞌ, kaꞌuyutan tami talaga kat mga taw nga rigaen it Ampuꞌang Diyus, ka egay beken nga tumbas it aten nga taw nga makasalaꞌan.

⁴ Temed ta, talagang bastanting-bastanti i kaꞌildaw ngaytut Ampuꞌang Diyus baw subray basta i raras ya it aten.

⁵ Sabap maski subuk patay ta nang patay sabap it kasalaꞌan tami, subuk ipiyaꞌuyut ya na kita it ki Cristo nga inggen yat paꞌuliꞌ, nga begayan tami na it kaꞌgenang egay kaskedan. Talagang sabap lamang it ildaw ngaytut Ampuꞌang Diyus maribri tami kat panriga yat tagnang pangaꞌgenan ta.

⁶ Baw iyan piyaꞌuliꞌ ya si Cristo Jesus duꞌut langit nga piyaꞌdung duꞌut mabantug nga puwistuꞌ, subuk ipiyaꞌuyut ya gasiꞌ kita it kanya, nga kayti subuk magꞌaꞌdung tami gasiꞌ nga iba ya duꞌun it piyaꞌdungan ngaytit kanya duꞌut langit.

⁷ Binwat yaytu i atkaytu ka isaꞌun, garing kayti seked it kaꞌnu-kaꞌnu, ipatanyag ya i egay kasbung nga kabastantiyan it ildaw ya ngaytu nga ibinggay yat aten it begay-matag kat binwat ngaytu ni Cristo Jesus.

⁸ Talagang kaꞌildaw ngaytut Ampuꞌang Diyus, yanayan i puꞌun it naribri tami na kat panriga yat kasalaꞌan tami, sabap it pagsarig baw pamayaꞌ tami it ki Cristo. Baw maski pagsarig baw pamayaꞌ ta ngaytu, ipagbegay yat aten, egaytu maat kitay garing.

⁹ Aypaꞌ ega makapalandi-landi it maski siyu nga, sabap it kagayen it sadili yang buwat i karibriyan ya ngaytu.

¹⁰ Sabap iyan pagbaꞌgu it adat ta kayti, Ampuꞌang Diyus i garing kaytu. Ipiyalagpit ya kita duꞌut ki Cristo Jesus baw biyaꞌgu ya i pangaꞌgenan tami isaꞌun gamiten ta na kat buwat nga magayen, nga ipiyagꞌareg yang lagi it aten garing paꞌ it tagnaꞌ.

Mga maglalagpit it ki Jesus, subuk sang kadugu-duguꞌan na.

¹¹ Talagang panawun it pikir mi i tagnaꞌ nga kabetangan mi. Paribasay ega Judio kamu baw ega tiyuriꞌan aypaꞌ, pabetang it mga Judio it imyu, timawaꞌ nga ega mga taawan it Ampuꞌang Diyus. Sira kunuꞌ i mga taawan ya ka panaꞌwag it kanira, Mga Turiꞌ. Temed pagturiꞌ nira ngaytu, kat liꞌwan lamang it bilug nira, nga binwat lamang it taw.

¹² Demdemen mi nga kat timpu ngayting itiꞌen magbeblag kamu it ki Cristo. Daꞌkamu kaꞌuyutan kat mga Judio, nga sira i mga taawan it Ampuꞌang Diyus nga pagꞌildawan ya. Baw ega sakep kamu it mga pakiꞌupakat yat kanira nga magsugid it ega basta-bastang sanggup ya. Talagang tagnaꞌ paꞌ ngayti egay kagayenang pagꞌina-inawaren mi, baw egay uru-urut it paꞌaaten ngaytung Ampuꞌang Diyus.

¹³ Temed kayti, it maglalagpit kamu nat ki Cristo Jesus, ega na subung pat tagnaꞌ ngayti nga alaid kamu paꞌ kat Ampuꞌang Diyus. Kayti, kat keseg it duguꞌ ngayti ni Cristo nga ipiyaturuꞌ ya, ipiyaꞌadeꞌdeng kamu na.

¹⁴ Talagang, sabap it ki Cristo ngaytu, magkagayen tami na, kami nga mga Judio baw kamu nga ega Judio. Inesa-esa ya na kita ka piyaraw ya na i pagkuntra-kuntraꞌen tami nga yanay magkaꞌarbeng it aten, nga daꞌga ipagkapagꞌiba-iba tami.

¹⁵ Paribasay ipiyasalisi ya i sadili ya nga bilug, sikayan inawaꞌ ya na i dalan ngaytit pagsunud it mga urdin ni Moises, mga urdin nga magsugid it muꞌsang adaten kat rilihiyun namen nga mga Judio. Ta it atkayan nagbaraꞌ na nga subuk sang kaduguꞌan lamang kat panleteg it Ampuꞌang Diyus i muꞌsang magpamayaꞌ it ki Cristo, maski unuy bangsa nira. Inabriyan ya talaga i dalan it pagkagayen.

¹⁶ Ka sabap it kamataynen ya ngayti duꞌun it krus, tiyabtab ya na i pagkuntraꞌ it mga Judio baw mga bangsa nga ega Judio. Surubung nga piyapaꞌuliꞌ ya sira duꞌun it Ampuꞌang Diyus baw binwat nga subuk sang kabilu-bilugan na.

¹⁷ Limnampud kanya situt banwa ka ipiyangadal yat katataawan in magꞌuꞌunu makanira i matuud nga kaꞌimbengan it nakem, kamu nga mga ega Judio nga paꞌaateng alaid kat Ampuꞌang Diyus, baw kami nga mga Judio nga adeꞌdeng it kanya.

¹⁸ Ka sabap it ki Cristo ngaytu, surubung tami na kayti nga pagtanggapen it Diyus Amaꞌ in magpatpad tami duꞌun it kanya kat tabang it Espiritu Santo nga magsasarum situt bilug tami nga muꞌsa.

¹⁹ Aypaꞌ ega na subung kamu it dayuꞌan u belag pang bangsa nga ega mga taawan it Ampuꞌang Diyus, in daꞌga kabanwa kamu na it mga taawan ya ngaytu nga piniliꞌ baw ipiyapinpin ya kat beken nga taw situt sinirungat langit. Kaꞌuyutan kamu paꞌ it mga anak ya kat seled it pamalay-balay ya.

²⁰ Kabilangan it aten nga mga magpamayaꞌ, subuk balay nga may inunayan. Si Cristo Jesus i inunayan ngaytu nga kanya i magbegay it ega basta-bastang kabakdan i balay. Iyan mga apustul baw mga prupitaꞌ ya, sira i subuk mga arigi it balay ngaytu. Baw kamu na i subuk mga buwat-buwat yang beken.

²¹ Si Cristo i piyakpetan it muꞌsang mga buwat-buwat ngaytu. Nakapagkabit-kabiten sira talagat magayen baw, sabap it pakilagpit nira it Ampuꞌan ngaytu, sigi nga magdakulaꞌ i balay ngaytu, magbaraꞌ nang mabakas nga papagsambaan.

²² Baw sabap it pakilagpit mit ki Cristo, magkakabit kamu na gasiꞌ i imyu duꞌun, kaꞌuyutan it beken ngaytu nga buwat-buwat. Kitang muꞌsa i pagbuwaten ni Cristo nga magayeng pagtataꞌidan it Ampuꞌang Diyus kat pagpasarum it Espiritu Santo situt bilug ta.