Deuteronomio 10 - Tagbanwa

¹² Maat siꞌ ni Moises, “Bangsa nga Israel, itu i kaꞌirgan it AMPUꞌANG DIYUS mu nga ugaliꞌen mu. Galangen mu kanya it may iꞌlam baw mangaꞌgenan uyun kat kaꞌirgan ya. Maꞌalen baw sirbiyan mu kanya it ega desang awam, in daꞌga kat nakem mu nga tingled.

¹³ Baw sunudun mu i muꞌsang mga urdin baw pabetang-betang it AMPUꞌANG DIYUS nga ipagtulduꞌ ku it imu kayti, nga kat ikagayen muytu nga muꞌsa.

¹⁴ Kamu nga mga Israelita, panawun it pikiran mi nga langit, banwa, baw muꞌsang betang nira, kat AMPUꞌANG DIYUS nga muꞌsa.

¹⁵ Temed kiyayliyan baw miyaꞌal ya i mga kagiyaringanan mi. Baw kamu nga mga tungtung-inapuꞌ nira, piniliꞌ ya kat tengaꞌ it kadaklan it bangsa.

¹⁶ Aypaꞌ kayti, kaꞌilangan nga talagang masunud kamu it kanya. Indiꞌan mi nay adat mi ngayan nga kabalisuꞌut baw kapiyasngel.

¹⁷ Sabap AMPUꞌANG DIYUS mi, kanya lamang i piyakamataꞌas kat muꞌsang pagtaꞌwagan it taw. Kanya i Ampuꞌan it muꞌsang mga agalen. Kanya i Ampuꞌang Diyus nga piyakamataꞌas, landaw nga gunaan baw subrang mabantug. Talagang surubung i leteg yat taw, egay pagbidaꞌen ya, baw ega magkabgayan it pabur.

¹⁸ Ipagbegay yay kataldengan kat mga ilu-ilu baw mga balu. Sakep nagat kararas ya i mga nandayuꞌ situt aten baw pagbegayan ya naga it pangangaꞌilangan nira.

¹⁹ Aypaꞌ kamu gasiꞌ, rarasan mi i mga dayuꞌan situt imyu, sabap dayuꞌan kamu nagay imyu, iyan duꞌun kamu pat Egipto.

²⁰ Ta, siguruun mi nga galangen mi it may iꞌlam i AMPUꞌANG DIYUS mi. Teꞌteꞌan mi kanya, baw kanyang ngaran lamang i sangpiten mi in magsanggup kamu.

²¹ Kanya lamang i talagang bantugun mi. Kanya i Ampuꞌang Diyus mi. Kanya lamang i minwat it muꞌsa ngayti nga kalililuꞌang bagay nga nagpasar kat mata mi.

²² Pitung puluꞌ lamang i mga kagiyaringanan tami, pagpaꞌaduꞌun nirat Egipto, temed kayti piyadakel kamu nat AMPUꞌANG DIYUS mi, subung nat kadakel it bituꞌun duꞌut langit.”