Daniel 5 - Tagbanwa

Naltegan it adiꞌ nga si Belsasar i esang alima nga magsurat duꞌun it dingding it balay ya [539 B.C.]

¹ Kaꞌsa, nagpaꞌitsu it dakulaꞌ nga pagkaraꞌnen i adiꞌ it Babilonia nga si Belsasar. Iti nga pagkaraꞌnen, pasagya ya it mga taawan ya nga mataꞌas i katengdanan. Mga sang ribuy kadakel.

² Iyan maglangu-langu na si Belsasar, ipiyapisiꞌ ya i mga iꞌimnan ngayti nga bulawan baw pirak nga narangpasan it amaꞌ ya nga si Nabucodonosor duꞌun it Templo nga papagsambaang balay it Ampuꞌang Diyus nga duꞌun it Jerusalem. Ipiyapisiꞌ yay mga iti ngayti ka imnan nira na, sang siraan it mga matataꞌas ngayti i katengdanan duꞌun it kaꞌadiꞌan ya, baw mga asawa ya baw mga uripen nga inasa-asawa ya lamang.

³ Pagkapisiꞌ it mga bulawan baw pirak ngayti nga iꞌimnan nga narangpas duꞌun it Templo ngayti it Ampuꞌang Diyus nga duꞌun it Jerusalem, duꞌun nay piyaꞌabutan it pagkaraꞌnenan ngayti, ka pagꞌimnan nat kadakel ngayti duꞌun.

⁴ Buwat nirat mamagꞌinum ngaytit irimnun, magbantug sira gasiꞌ it mga pagbete-beteꞌen nira nga diyus nga bulawan, pirak, tumbaga, basiꞌ, kayu baw batu i binwat.

⁵ Sakaliꞌ nga may esang alima nga magsurat duꞌun it maputiꞌ nga dingding it balay ngaytit adiꞌ, nga duꞌun manggid it patuꞌ it titidawan. Talagang naltegan it adiꞌ ngayti i alima ngayti nga magsurat, lamang egay bibilug.

⁶ Nanlasiꞌ kanyat iꞌlam baw duwang aꞌay ya, yimnegyeg nat atna, nga ega na ipagkatindeg ya.

⁷ Nanggagaꞌuy nay adiꞌ ngayti nga timnaꞌeg nga pamisiꞌen i mga may kepetan nga manigmangmang, mamimintuꞌ baw mga may pananamayaꞌ. Pagsigꞌabut it mga makakaꞌrut ngayti, maat ya, “Kayti, siyu-siyuy makabasa it surat ngayan baw kapaꞌyag it aken i kaꞌulugan ya, papakayan ku kanya it mabakas nga pakayan, pabaliꞌgan ku pat baliꞌeg nga bulawan, baw buwaten ku paꞌ kanya nga ikatlung piyakapagbayaꞌen situt kaꞌadiꞌan ku.”

⁸ Natiꞌmes nga muꞌsa duꞌut adiꞌ ngayti i mga makakaꞌrut nga may kepetan, temed egay maski sang kataawan nga magkabasa it isiyurat ngayti u magkasugid it kaꞌulugan ya.

⁹ Ta, nagulu na nga banar i ulu it adiꞌ ngayti, baw nanlasiꞌ na kanyat ereꞌeret. Pati mga matataꞌas ngayti i mga katengdanan, libeg gasiꞌ nga banar i pikir nira.

¹⁰ Ta it atkayti, siminled duꞌun it pagkaraꞌnenan i balu na nga inaꞌ it adiꞌ nga si Belsasar, sabap it nagnegan yay pagrundingen it anak ya ngayti nga adiꞌ baw mga taawan ya ngayti. Miyampang kanya, nga maat ya, “Sana egay kaskedan it kaꞌgenan it adiꞌ. Ega naga atkayan nga guluun muy ulu mu baw magpanlalasiꞌ ka nat iꞌlam.

¹¹ Ka situt kaꞌadiꞌan mu ngaytu, may sang kataawan tu situ nga pagpanakman it ega basta-bastang mga diyus. Ka iyan timpu pat amaꞌ mu nga si Nabucodonosor, nagpalteg kanyat ega basta-bastang kiyaꞌrutan baw kasepsep ya nga subung it kaꞌrut it mga diyus. Aypaꞌ iyan nga taw, ipiyatindeg nat amaꞌ mu kat katengdanan nga kanya nay piyakapagbayaꞌen it muꞌsang may kepetan nga subung it mga makakaꞌrut nga mamimintuꞌ, manigmangmang, manigpaꞌyag it tagaynep baw mga may pananamayaꞌ situt Babilonia.

¹² Si Daniel yan i ngaran ya, takaꞌ piyangaranan it ki Beltsasar. Talagang natanyag nga mapikir kanya nga taw baw makaꞌrut, baw dakulaꞌ i kasepsep ya. Magkapaꞌyag ya i kaꞌulugan it mga pagtagaynepen, magkapintuꞌ ya i maski unu nga pintuꞌan, baw talagang maski unu nga magkalibegan it pikir, magkatungguwan ya. Aypaꞌ ipatawag mu si Daniel ngaytu ka ipaꞌyag yat imu i kaꞌulugan it isiyurat ngayan.”

¹³ Egay beken, ipiyatawag si Daniel ngayti. Pagꞌadap ya duꞌun, iningkut kanya it adiꞌ ngayti. “Unu,” maat ya, “ikaw nay si Daniel nga kaꞌuyutan it mga diyakepan it amaꞌ ku nga garing duꞌun it Juda?

¹⁴ Nabaritaꞌan ku nga pagpanakman ka it mga diyus. Mapikir ka kunuꞌ baw makaꞌrut, baw ega basta-bastay kasepsep mu.

¹⁵ Piyapaꞌasitu ku i mga makakaꞌrut nga manigmangmang ka, surat ngayan nga iyanꞌen, ipagpabasa kut kanira, baw ireg ku nga makapaꞌyag it aken i kaꞌulugan ya. Temed ega kaya nira.

¹⁶ Ta, it nabaritaꞌan ku nga talagang kaya mu nga ipagpaꞌyag i kaꞌulugan it mga bagay nga subung nat itu ngaytu, baw kaya mu gasiꞌ nga matungguwan i magkalibegan it pikir, aypaꞌ ka ipiyatawag ku ikaw. Ta kayti, in mabasa mu baw makapaꞌyag mu i kaꞌulugan it surat ngayan, talagang papakayan ku ikaw it mabakas nga pakayan, pabaliꞌgan ku ikaw it baliꞌeg nga bulawan, baw ipatindeg ku paꞌ ikaw nga ikatlung piyakapagbayaꞌen situt kaꞌadiꞌan ku ngaytu.”

¹⁷ Katubag si Daniel it adiꞌ ngayti, maat ya, “Ega kaꞌilangan ku nga begayan mu aku it maski unu. Ibgay mu na duꞌut beken i paꞌaaten mu ngayan nga itumbas mu. Basaen ku na lamang baw ipaꞌyag i surat ngayan.

¹⁸ Adiꞌ Belsasar, iyan amaꞌ mu nga si Nabucodonosor, piyapagꞌadiꞌ kanya it Ampuꞌang Diyus nga Piyakamataꞌas. Binggayan ya paꞌ kanya it talagang ega basta-bastang kabantugan baw kagalang.

¹⁹ Ta, sabap it kataꞌasan ngayti nga ibinggay it Ampuꞌang Diyus it kanya, muꞌsang taw, maski unu nga bangsa baw ampang, magyegyeg sirat iꞌlam in kat adapan ya. Yay matuud, ipagpaꞌimatay ya i maski siyu nga ireg ya, baw egnen gasiꞌ i ireg ya nga egnen. Ipagpataꞌas yay katengdanan it in siyu nga maꞌirgan ya baw ipagpababaꞌ ya gasiꞌ i iyan nga maꞌirgan ya nga ipababaꞌ.

²⁰ Temed iyan mapiyataꞌas-taꞌas na kanya, baw magpasubraꞌ-subraꞌ na, inawaꞌ kanyat Ampuꞌang Diyus kat pagkaꞌadiꞌ ya ngayti, baw naꞌawaꞌ i muꞌsang kabantugan ya.

²¹ Subuk inimugaw na kanya situt taawan baw pikir ya, giyantiyan nat pikir it ramu-ramu nga simarun. Yanay pagkaꞌnen ya, dikut, subung na it mga bakaꞌ, baw pagꞌemgen na kanyat namug. Talagang atkayan i kabetangan ya seked it kinilala ya nga Ampuꞌang Diyus nga Piyakamataꞌas i magbebegbeg it muꞌsa. Kanya ngaytu i magpaꞌadiꞌ it in siyuy ireg ya nga papagꞌadiꞌen.

²² Temed ikaw nga anak ya, Adiꞌ Belsasar, daꞌka nagpababaꞌ maski na maat magkaꞌrutan mu nagaytu.

²³ In daꞌga, nagpataꞌas-taꞌas ka ga, nga magpasaꞌli nat Ampuꞌang Diyus. Ka binwat mu, ipiyapisiꞌ mu i mga iꞌimnan nga garing duꞌun it balay nga papagsambaan it kanya, ka giyamit mi na nga imnan mit irimnun, sang kamuwan it mga matataꞌas nga taawan mu, mga asawa mu, baw mga uripen mu nga inasa-asawa mu lamang. Puyra pat itu ngaytu, nagbantug ka paꞌ it mga pagbete-beteꞌen nga diyus nga bulawan, pirak, tumbaga, basiꞌ, kayu baw batu i binwat. Mga itu ngaytu, ega naga mamagkalteg. Ega gasiꞌ mamagkagneg u mamagkaꞌrut. Temed iyan Ampuꞌang Diyus ngaytu nga magseskel it ginawa mu baw magbebegbeg it muꞌsang kaꞌgenan mu, talagang daꞌka magbantug it kanya.

²⁴ Aypaꞌ ka ipiyataban yay alima ngayan nga piyasurat ya situt dingding.

²⁵ Maat i surat ngaytu, ‘Mene, mene, tekel, parsin.’

²⁶ Ituy ireg sugiden kayan. Mene, pagbibilangen manay aldaw nga ikaꞌlay it pagkaꞌadiꞌ mu ngaytu, ka awaꞌen naytu it Ampuꞌang Diyus.

²⁷ Tekel, subung it tinimbang it Ampuꞌang Diyus i kagayen it adat mu, temed ta, kurang nga kurang ka.

²⁸ Parsin, tabtaben nay pagkaꞌadiꞌ mu ngaytu, ka kaꞌadiꞌan mu ngaytu nga Babilonia, sakpen nat Media baw Persia.”

²⁹ Pagkatupus it paꞌyag ngayti, isingkat it adiꞌ nga si Belsasar nga suꞌlan it mabakas nga pakayan si Daniel ngayti, pabaliꞌgan it baliꞌeg nga bulawan bawnga ipanugid-sugid duꞌun it kadadaklan nga kanya nay binwat nga ikatlung piyakapagbayaꞌen sikayting kaꞌadiꞌan.

³⁰ Temed ta, iti nga delem, inimatay nay adiꞌ ngayti nga si Belsasar.

³¹ Baw kaꞌadiꞌan ngayti it Babilonia, inagaw ni Dario nga adiꞌ it Media. Enem nga puluꞌ may duwa i idad ni Dario ngayti, pagkasakep yat iting kaꞌadiꞌan.