Colosas 4 - Tagbanwa

¹ Kamung mga agalen, kaꞌilangan nga mataldeng i muꞌsang pabetang mi it mga uripen mi, nga ega masyadu kamung maꞌigpit. Dedemdemen mi nga, maski agalen kamu na, may piyakaꞌagalen mi paꞌ duꞌun it langit.

Mga beken paꞌ nga munaꞌaw

² Itu paꞌ gasiꞌ i beken nga ipagꞌaat kut imyu, mapiyaꞌres kamu kat panalangin, baw in magpanalangin kamu mapiyasalamat kamung mga taw. Pagpipikiren mit magayen i pagꞌampangen mi kat panalangin, ega maat magbasta-basta lamang.

³ Baw kada magpanalangin kamu, pagsangpiten mi gasiꞌ kami. Angutun mi nga abriyan kamit Ampuꞌang Diyus it dalan nga makapasigi namen nagat pangadal i ampang ya pasar it karibriyan duꞌut ki Cristo. Tagnaꞌ, madlem paytu, temed kayti ipiyaꞌrut ya nang banar. Sabap it pangadal ku it itung mga bagay pagpipirisuun aku na.

⁴ Temed maski atkayan, ipanalangin mi nga makapangadal ku it maꞌyag, uyun kat dapat ku nga buwaten.

⁵ Magpakanakman kamu nga iyan baꞌ, egay magkasudi-sudi it mga ega paꞌ magpasakep it ki Cristo. Baw kada pagbegayan kamut Ampuꞌan it rugar, sagyaan mit ipagpanglang i ampang ya duꞌun it kanira.

⁶ Pikiren mit magayen in unuy ipagsugid mi isaꞌun dakulay mapulus nira kat ikagayen nira. Ka in atkayan maꞌrutan mi na i magayeng itubag mi kat ingkut it maski siyu.

Mga pangiyaꞌpusang pangumusta

⁷ Ta, in pasar it kabetangan ku sini, si Tiquico na ngaytung pagmaꞌalen tami nga sulsug kat pamayaꞌ i tumuturan asat imyu. Kanyay magkasarigan ku nga katabang baw kasubung ku nga manigsirbi it Ampuꞌan.

⁸ Piyapaꞌasan ku yan kanya it imyu isaꞌun maꞌrutan mi i amen nga kabetangan sini, isaꞌun ega masyadung maguluy ulu mi sabap it amen.

⁹ Iba ya ngaytung si Onesimo, esa gasing pagmaꞌalen tang sulsug kat pamayaꞌ nga magkasarigan, baw taga asan nagat imyu. Sira na ngaytung duwa i tumuturan asat imyu it muꞌsang bagay-bagay sinit amen.

¹⁰ Pagkumustaen kamu ni Aristarco nga iba ku sinit pirisuwan, baw si Marcos nga tagsa ni Bernabe. (Pasar it ki Marcos ngaytu may tiyanggap mi nga lagi nga tugun. Istimaren mi kanyat magayen in kaꞌnu-kaꞌnuy iꞌabut ya asat imyu.)

¹¹ Pagkumustaen kamu gasiꞌ ni Jesus nga panggetaꞌ it kanya, Justo. Sira lamang ngaytung tulu i mga namayaꞌ nga Judio nga kaꞌibaan ku it magpangadal pasar it kaꞌadiꞌan it Ampuꞌang Diyus. Talagang pagsagyaan kuy tabang nirat aken.

¹² Iyan kabanwa mi ngaytung si Epafras, nga esa gasing manigsirbi ni Cristo Jesus, magkumusta gasit imyu. Talagang papaꞌres nay panalangin yat imyu asan nga magmapaꞌgen i pagsarig mit Ampuꞌan baw magpamayaꞌ kamu it ustung pamayaꞌ, nga magkasepsepan mi nga banar i kaꞌirgan ya.

¹³ Ipagpamatuud ku nga talagang dakulay paꞌres ni Epafras ngaytu sabap it imyu baw sabap gasiꞌ it mga taga Laodicea baw taga Hierapolis nga mga magpamayaꞌ.

¹⁴ Beken pang magpangumusta it imyu, pagmaꞌalen tang duktur nga si Lucas, baw si Demas gasiꞌ.

¹⁵ Iꞌaat mit mga sulsug ta kat pamayaꞌ nga asat Laodicea nga pagkumustaen ku sira, subung naga si Nimfa baw kadakel it namayaꞌ nga asat balay yay pagtingpedan.

¹⁶ Pagkabasa mi it surat ngaytu, ipabasa mi gasiꞌ it mga magpamayaꞌ nga asat Laodicea, baw basaen mi gasiꞌ i surat nga ipiyataban ku duꞌut kanira.

¹⁷ Baw tugun ku nga iꞌaat mi it ki Arquipo, sarungaen yat magayen i buwaten nga ipiyakarguꞌ it Ampuꞌan it kanya isaꞌun maꞌayaw yay muꞌsa.

¹⁸ Talagang aku nga si Pablo i tagsurat kaytu, kamatuudan panunuratan ku na i pangumusta ku ngaytut imyu. Dedemdemen mi kat panalangin i kakuriꞌan ku sinit pirisuwan. Ipagpanalangin ku nga sana asat imyu nga pirmi i ildaw it Ampuꞌang Diyus.