Colosas 3 - Tagbanwa

Yanay paꞌresan ta, panlangit nga pangaꞌgenan

¹ Ta, it kamu, iba na ni Cristo it inggen it paꞌuliꞌ, aypaꞌ ka iyan i pirming paꞌresan mi, mga panlangit nga bagay nga pagsagyaan ya, kanya nga magꞌaꞌdung na kat iwanang ayun it Diyus Amaꞌ duꞌut langit.

² Eeꞌ baꞌ, pagpipikiren mi nga pirmi i mga panlangit nga bagay, ega na maat mga bagay nga situt banwa.

³ Dedemdemen mi nga nakaꞌuyut kamu nat kamataynen ni Cristo baw iyan baꞌgung kaꞌgenan mi, magdadawaꞌ paꞌ nga sekel ni Cristo duꞌut Ampuꞌang Diyus.

⁴ Takaꞌ in maꞌbut na nga itanyag na i kabantugan ni Cristo, kanya nga puꞌun it kaꞌgenan ta ngaytu, duꞌun matanyag gasiꞌ i aten nga kabantugan ka mabagiꞌan tami.

⁵ Aypaꞌ ipaꞌalaid na asat imyu i muꞌsang maraꞌway nga adat situt banwa nga subuk muꞌsang kalasit pamakun duꞌun it ega asawa mu, baw maski unu nga adat, pagpikiren, u kaꞌiꞌirgan nga maraꞌway. Indiꞌan mi na gasiꞌ i adat nga maꞌingarum, ka in mga kusas situt banwa i pirming pagpipikiren, subuk kusas nay pagsambaen ta, ega na Ampuꞌang Diyus.

⁶ Baw magkaꞌrutan ta nga mabut i aldaw nga rigaen it Ampuꞌang Diyus it ega makatindeg i muꞌsang mamagbuwat it mga itu ngaytu.

⁷ Ta kamu gasiꞌ, katꞌesa atkayan pay pangaꞌgenan mi ka pagbebegbegan paꞌ it maraꞌway ngaytung pagbuwaten.

⁸ Temed kayti ibuntal mi na kat pangaꞌgenan mi i pakitabug baw kaꞌiseg kat masigkataw nga yay pagpanggaringan it kupanggated kamut kanira. Indiꞌan mi na i pangampang-ampang it beken. Ega na dapat regda-regdaen i maꞌiba mi.

⁹ Kamung mga namayaꞌ na, ega na ambutan mi i masigkataw mi. Ka in ipasbung tat pakayan, limbas mi na i singkadan mi nga karaꞌe-raꞌetan it tagnaꞌ.

¹⁰ Baw kayti magpapakay kamu nat baꞌgu nga ireg sugiden, mga adat mi, pagbaꞌguun it Ampuꞌang Diyus ka pagpadakulaꞌen ya nga banar i kasepsep mi it adat baw kaꞌirgan ya nga iyan i ipagpaꞌadat yat imyu.

¹¹ Kat baꞌgu ngaytung pangaꞌgenan ta ega naytuy piyagbelagan, Judio u ega Judio, tiyuriꞌan u ega tiyuriꞌan, mga taga beken nga banwa nga belag i ampang baw adat, mga maꞌiꞌiseg nga mga taw nga egay maski unu nga inadalan, mga uripen baw daꞌga uripen. Ega impurtantiꞌ in unuy duguꞌ it taw u in unuy kabetangan nira. Iyan lamang i impurtantiꞌ, si Cristo, in magpamayaꞌ tami it kanya u ega. Kanya i subrat muꞌsa baw magsasarum kanya kat muꞌsa nga magsarig baw magpamayaꞌ it kanya.

¹² Aypaꞌ kamu nga piniliꞌ it Ampuꞌang Diyus, paribasay pagrarasan ya kamu baw subuk ipiyapinpin ya nga mga taawan ya na, kaꞌilangan masakit kat nakem mi i makuring kabetangan it mga maꞌiba mi baw maꞌildaw kamu it kanira. Baw gasiꞌ mapiyababaꞌ kamu na, nakman kamu nang nakman, baw ega makusked.

¹³ Magpasi-pasinsiyaen kamu na it maꞌiba mi, nga pagsagkaꞌen mi it magayen i nakem i kasalaꞌan nira asat imyu. In magꞌuꞌunu piyasinsiya ni Cristo i kasalaꞌan mit imyu, atkayan naga i pasinsiya mi it beken.

¹⁴ Subrat muꞌsa magsigraras kamu it esa may esa ka yay bilang pagkakabitan baw ipagkumplitu it muꞌsa ngaytung adat nga magayen.

¹⁵ Paꞌresan mi i ipagbegay ni Cristo nga pagꞌurunyun nga kat ikaꞌimbeng it pakiꞌiba-iba mi. Sabap yay pabetang-betang ya, nga magꞌurunyun tami nga banar, nga bilang sang kabilu-bilugan. Baw beken nga adaten mi, mapiyasalamat kamu nga pirmi duꞌun it kanya.

¹⁶ Iyan mga ampang ni Cristo, pasigi nga idawaꞌ mit magayen asat ulu mi, isaꞌun masepsepan mi nga banar. Kat kasepsep nga begay it Espiritu Santo it imyu, pirmi kamung magtuldu-tulduꞌun baw magsulag-sulagen it esa may esa. Subung naga i pagkantaꞌ mit mga ampang nga magbebtang duꞌut kasuratan nga pagpangaranan it Mga Awit, baw beken nga mga kantaꞌ nga ipagbantug mi it Ampuꞌan baw ikseg it pamayaꞌ mi. Makiyantaꞌen kamu nga ipagsugid i pagbantug baw pasalamat mi duꞌut kanya.

¹⁷ Ta, uliꞌan-uliꞌan it muꞌsa ngaytu, inturun mi nga muꞌsang pagbuwaten baw pagꞌampangen mi, kat ikasagya baw ikabantug it Ampuꞌan nga si Jesus, mga buwat baw ampang nga bagay it mga taw nga maglalagpit nat kanya. Baw pirmi nga pagpasalamatan mi duꞌut Diyus Amaꞌ i kadakulat kagayenan nga naꞌimyu na sabap it binwat ni Jesus ngaytu.

Mga magayen nga sunudun kat pamalay-balay it mga namayaꞌ na

¹⁸ Itu paꞌ i beken nga kuꞌaat kut imyu. Uꞌna, iyan mga babay, dapat nga pasakep kamu it asawa mi ka ituy bagay it mga maglalagpit nat Ampuꞌan.

¹⁹ Baw kamu nga mga lalaki, kaꞌilangan nga rarasan mit kamatuudan i babay nga inasawa mi, nga nakman kamung pirmi duꞌut kanya.

²⁰ Kamu gasiꞌ nga mga mangaꞌwaꞌ, sumunud kamu it mga giyaringan mi kat muꞌsang bagay nga ipagtulduꞌ nira, ka ituy kaꞌirgan it Ampuꞌan nga adaten it mga maglalagpit it kanya.

²¹ Kamu gasing mga giyaringan, subraꞌ na in mga lalaki, gayen-gayenen mi nga padisir it mga anak mi, ka in ega, barang manglug na i nakem nira.

²² Kamu gasiꞌ nga mga uripen, kaꞌilangan sunudun mit magayen i muꞌsang taꞌeg it imyu it mga agalen mi situt banwa. Ega maat paꞌresan mi i pagsunud mi in pagleltegan kamu ga it agalen mi isaꞌun sagyaan ya kamu. Yay magayen, sunudun mi sira it masagyay nakem kat kadakulat paggalang mi it Ampuꞌang Diyus.

²³ Sana, kat muꞌsang pagsirbi mi, pagsirbi nga ega alang-alang. Ipabetang mi nga Ampuꞌan i pagsirbiyan, ega desang masigkataw mi.

²⁴ Ka magkaꞌrutan mi na nga talagang may magayeng tumbas nga ibgay it Ampuꞌan it imyu kat pagdadarapaꞌen. Ituy tumbas nga magꞌaꞌareg ya kat muꞌsang mga anak ya. Ka si Cristo talaga i matuud nga pagsirbiyan mi nga Agalen.

²⁵ Takaꞌ in siyu-siyuy magsisigi paꞌ nga magbuwat it karaꞌe-raꞌetan, yay tumbas nga tanggapen ya, panriga. Egay piniliꞌan, rigaen it Ampuꞌang Diyus i muꞌsa.