Colosas 1 - Tagbanwa

^1-2 Mga sulsug namen kat pamayaꞌ nga asan it Colosas, wayan i surat namen, aku nga si Pablo nga esang apustul ni Cristo Jesus kat pabetang-betang it Ampuꞌang Diyus, baw si Timoteo nga sulsug ta gasiꞌ kat pamayaꞌ. Pagsuratan namen kamu nga maglalagpit nat ki Cristo, kamu nga mga ipiyapinpin it Ampuꞌang Diyus nga mga taawan ya na, nga magpamayaꞌ nga matuud it ki Cristo ngaytu. Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Ampuꞌang Diyus nga Amaꞌ tami.

Pasalamat ni Pablo baw panalangin ya pasar it mga taga Colosas

³ Kada ipagpanalangin namen kamu talagang pirmi kaming magpasalamat duꞌun it Ampuꞌang Diyus, kanya nga Amaꞌ it Ampuꞌan ta nga si Jesu-Cristo.

⁴ Sabap nabaritaꞌan namen i pamayaꞌ mi it ki Cristo Jesus ngaytu baw raras mi it muꞌsang mga kasulsugan mi kat pamayaꞌ.

⁵ Atkaytu i pagsarig baw pagmaꞌal mi ngaytu sabap pagsisiguruun mi i kagayenan nga magꞌaꞌareg it aten duꞌut langit, iyan kagayenan nga nasiguru mi kat Magayeng Baritaꞌ nga kamatuudan nga ipiyangadal it imyu it tagnaꞌ.

⁶ Egaytu lamang asat imyu i inabutan it kamatuudan ngaytu in daꞌga maglekep naytu it banwa. Baw paꞌari-ari nga pagꞌabutun ya magbaꞌguy adat it mga magpamayaꞌ, subung nagat imyu garing it uꞌnang pagkagneg mit ildaw ngaytut Ampuꞌang Diyus baw pagkatantu mi nga kamatuudan talagaytu.

⁷ Daꞌga baꞌ si Epafras i uꞌnang nanulduꞌ it imyu pasar it itu ngaytu? Kanya i pagmaꞌalen namen nga kaꞌibaan, nga esa gasing manigsirbi ni Cristo. Magkasarigan talaga kanya kat katengdanan ya ngaytu baw kanya i naꞌasat imyu nga bilang ganti namen.

⁸ Kanya i naꞌrutan namen it kadakulat raras mi it esa may esa kat tabang it Espiritu Santo.

⁹ Aypaꞌ garing it pagkabaritaꞌ namen kaytu, sigi nay panalangin namen pasar it imyu duꞌut Ampuꞌang Diyus nga sana panakman kamung banar it Espiritu Santo nga masepsepan mi talaga in unu may unu i uyun kat kaꞌirgan ya.

¹⁰ Ka in atkayan, makapangaꞌgenan kamu nat pangaꞌgenan nga kasasagyaan it Ampuꞌan, pangaꞌgenan nga bagay it mga maglalagpit it kanya, ka subuk magtumbud kat pangaꞌgenan mi i muꞌsang buwat nga magagayen baw magdudungag-dudungag i kasepsep mi it adat baw kaꞌirgan it Ampuꞌang Diyus.

¹¹ Ipagpanalangin namen gasiꞌ nga kat keseg it ega basta-bastang guna ya, sana begayan ya kamu nga magbastanting-magbastanti i keseg it pamayaꞌ mi, isaꞌun magkateꞌteꞌ kamu baw magkasagkaꞌ it kakuriꞌan it magayen i nakem.

¹² Baw masasagya kamu nga magpasalamat nga pirmi duꞌut Diyus Amaꞌ. Ka kamu gasiꞌ, binwat ya nga mapakay nga bagiꞌan it mga magagayeng bagay nga areg ya it muꞌsang piniliꞌ baw ipiyapinpin ya nga mga taawan ya na, sira nga magpangaꞌgenan na kat kaꞌyagan ya.

¹³ Ka ipiyagribri ya na kita kat pagsakep it kadleman, baw ipiyagꞌugad ya na kita kat pagsakep it pagmaꞌa-maꞌalen ya nga Anak.

¹⁴ Sabap it kamataynen it Anak ya ngaytu, ribri tami na kat panriga it Ampuꞌang Diyus sabap it kasalaꞌan. Ipiyasinsiya nat aten i muꞌsa.

Si Cristo, subray kataꞌasan ya it muꞌsa

¹⁵ Duꞌut ki Cristo ngayti ipiyalteg nat aten in magꞌuꞌunu i Ampuꞌang Diyus nga ega magkaltegan. Baw may kataꞌasan ya nga subrat kataꞌasan it muꞌsang mga giyunang bagay nga may ginawa, subung nagat kataꞌasan it panganay nga anak kat mga ariꞌ ya.

¹⁶ Sabap si Cristo talagay nagguna it muꞌsa ngaytu nga mga duꞌut langit baw situt banwa, iyan mga magkaltegan ta baw iyan nga, lamang ega magkaltegan, temed may dakulang keseg baw pudir duꞌut kanirang pagsasakpan. Talagang muꞌsang-muꞌsa, kanya naga i giyaringan baw kat ikabantug ya sirang muꞌsa.

¹⁷ Kanyay uꞌna-uꞌnat muꞌsang bagay baw kat pamegbeg ya magtinir sira it egay pagꞌugadan baw magpanunsun sira it in unuy ipiyabetang-betang ya it kanira.

¹⁸ Kanya i piyakaꞌulu it muꞌsang magpamayaꞌ it kanya nga kabilangan nira, sang kabilu-bilugan. Kat pagꞌegen yat paꞌuliꞌ inabriyan ya talaga i dalan it pagꞌegen ngaytut paꞌuliꞌ, baw kanya i puꞌun it kaꞌgenan ngaytu nga egay kaskedan. Aypaꞌ maꞌyag nga, kat muꞌsang-muꞌsa, kanya lamang i egay kasbung nga kataꞌasan.

¹⁹ Sabap yay ipiyabetang-betang it Ampuꞌang Diyus nga in magꞌuꞌunu i pagkaDiyus ya, maltegan kat Anak ya nga si Jesus. Aypaꞌ atkayan naga talaga i pagkaDiyus ni Jesus ngaytu.

²⁰ Baw ipiyabetang-betang ya gasiꞌ nga kat keseg it kamataynen ni Jesus nga ipiyaturuꞌ yay duguꞌ ya duꞌut krus, papaꞌuliꞌen ya kat sadili ya i muꞌsang-muꞌsa, nga situt banwa baw kat langit gasiꞌ, isaꞌun magkagayen siꞌ.

²¹ Ta, kamu ngaytu, kaꞌuyutan gasiꞌ it itu ngaytu. Ka iti tagnaꞌ, talagang alaid kamu kat Ampuꞌang Diyus kat pagkuntraꞌ it kanya it nakem mi baw karaꞌe-raꞌetan nga pamagbuwaten mi.

²² Temed kayti, sabap it kamataynen ni Cristo nga ipiyasalisi yay bilug ya, binwat kamu nat Ampuꞌang Diyus nga mga iba-iba ya isaꞌun makapaꞌadap ya kamu kat adapan ya it egay maꞌiway ya, mga taw nga mataldeng kat panleteg ya ka naꞌiriꞌan it muꞌsang kasalaꞌan.

²³ Temed gasiꞌ, kaꞌilangan nga maneꞌteꞌ kamu kat pamayaꞌ mi isaꞌun mapaꞌgen baw magꞌuꞌunay talaga, nga ega magꞌugad it maski sang dekeyeꞌ i kasiguruwan mi it tumbas nga ipagsanggup it Magayeng Baritaꞌ. Magayeng Baritaꞌ ngaytu, yanagay ipiyangadal asat imyu it tagnaꞌ, baw kayti ipiyangadal gasiꞌ kat belag-belag nga bangsa it taw situt sinirungat langit. Kat pabetang-betang it Ampuꞌan binwat ya aku, aku nga si Pablo, nga esang manigsirbi ya kat pangadal it ituꞌun ngaytu.

Manigsirbi si Pablo it muꞌsang mga magpamayaꞌ isaꞌun masepsepan nirang banar i muꞌsa pasar it Manriribri nga si Cristo

²⁴ Talagang pagsagyaan ku i mga kakuriꞌan ku ngaytu kayti ka sambatan ku, abir ku nga makuriꞌan aku basta kat ikagayen mi. Sabap, kat mga kakuriꞌan ngaytut bilug ku, pagꞌayawun ku i ipiyabetang-betang ni Cristo nga malabayan ku kat ikagayen it kumpur magsarig baw magpamayaꞌ it kanya, nga kabilangan nira, bilug ya.

²⁵ Aku ngaytu, manigsirbi aku it muꞌsa ngaytung mga magpamayaꞌ ka yay ipiyakarguꞌ it Ampuꞌang Diyus it aken, nga ipangadal ku it egay tataguꞌan i ampang ya kat mga bangsa nga ega Judio.

²⁶ Ka kaꞌlay ngaytu it pira-pira nang pagꞌanak-anak it taw, may subuk itiyagu-taguꞌ it Ampuꞌang Diyus nga ega ipiyaꞌrut yang banar. Temed kayti ngaytu, ipiyaꞌrut ya na kat mga piniliꞌ ya nga taawan ya.

²⁷ Ituy tagu-taguꞌ nga pabetang-betang nga ipiyaꞌrut ya na, nga mga bangsa it taw nga ega Judio i maꞌildawan ya it daꞌna masugid nga kagayenan. Eeꞌ baꞌ, mapakay na nga kamu na i pagtatakenaꞌan na ni Cristo, nga ituy puꞌun-sabap it kasiguruwan mi it kagayenang tumbas kat pagdadarapaꞌen.

²⁸ Si Cristo ngaytuy ipagpanadal namen kat muꞌsang taw. Kat kadakulat kasepsep nga ipagbegay it Ampuꞌang Diyus it amen ipagpangadal baw ipagsasar namen i muꞌsa, isaꞌun makapaꞌadap namen sirang muꞌsa kat adapan it Ampuꞌang Diyus it ustuꞌ nang mga taawan ya, nga egay magkaꞌiway yat kanira sabap it pakilagpit nirat ki Cristo.

²⁹ Aypaꞌ pagpaꞌresan ku nga banar i katengdanan ku ngaytu kat keseg it ega basta-bastang kakayaan nga ipagbegay ni Cristo it aken.