2 Timoteo 2 - Tagbanwa

¹ Aypaꞌ ikaw, Timoteo, nga bilang anak ku, kaꞌilangan nga magmapaꞌgen kang banar kat tabang ni Cristo Jesus it imu.

² Magayen, iyan mga nagnegan mu sinit aken kat adapan it kadakel nga magdedngeg, ipangadal mu kat mga taw nga magkasarigan, isaꞌun magkakayaan na nira nga ipangadal gasiꞌ duꞌun it beken.

³ Sagkaꞌen muy mga kakuriꞌan nga magꞌabut it aten nga magpanindeg it ki Cristo Jesus. Pasbung ka it sundaluꞌ nga magkasarigan.

⁴ Ka basta sundaluꞌ, ega pasilabtan yay in unu nga bagay basta ega kat piyagsundaluꞌan ya. In daꞌga iyan talagay pagpaꞌresan ya, masagyaan it nagpasundaluꞌ it kanya.

⁵ Ta in ipaꞌalimbawa ta gasit manigkuntis, ega kilalaen kanya nga nandaꞌeg basta ega simnunud it in unu nga kalilꞌiyan.

⁶ Ta yan gasiꞌ, manigꞌuma, nga kanyay nagpakariga, simpri kanyay uꞌnang makakaꞌen in mabut nay piyakarigaan ya.

⁷ Pagpipikiren muytung pirmi i mga pagꞌaaten ku ngaytu, ka ipasepsep tut Ampuꞌan it imu nga muꞌsa.

⁸ Pagdedemdemen mu nga pirmi si Jesu-Cristo, nga inggen it paꞌuliꞌ, kanya ngaytung tungtung-inapuꞌ it adiꞌ nga si David. Itu ngaytuy Magayen ngaytung Baritaꞌ nga ipagpangadal ku.

⁹ Baw sabap it pangadal ku ngaytut Magayeng Baritaꞌ, nakalabay akut kakuriꞌan seked it ungaytu na, pagkakadinaan aku na, adimaat taw aku nga barapakun. Temed maski pagkakadinaan aku, iyan ampang it Ampuꞌang Diyus, ega yan magkakadinaan.

¹⁰ Aypaꞌ ka pagsagkaꞌen kuy maski unu nga kakuriꞌan it magayen i nakem, sabap kat ikagayen tu it mga napiliꞌ it Ampuꞌang Diyus. Pagsagkaꞌen kuy muꞌsa isaꞌun maribri sira gasiꞌ kat keseg it pakilagpit nirat ki Cristo Jesus, baw makaꞌuyut gasiꞌ sira it egay kaskedan nga kagayenan ya duꞌut langit.

¹¹ Kamatuudan tuy pagꞌaaten ngaytu. Basta teꞌteꞌan tami si Jesu-Cristo, maski maat ikagtas nat ginawa ta, siguradung kasagpun tami naga duꞌun it kaꞌgenan nga egay kaskedan.

¹² Eeꞌ baꞌ, basta teꞌteꞌan ta kanya, siguradung magꞌadiꞌ ta nga iba ya in duꞌun nat kaꞌadiꞌan ya. Takaꞌ in beteꞌ payluwan ta na kanya kat adapan it mga taw, siguradung payluwan ya kita pagꞌabut it aldaw ngayang ipangukuman.

¹³ Baw yay matuud, in beteꞌ kita, pabaꞌgu-baꞌgu, temed kanya, egay pagbaꞌgu yat kanya, ka egay maski unu nga pagꞌugadan it mga adat baw inampang yat kanya.

Kaꞌilangan nga gayen-gayenen ni Timoteo i buwat ya nga magpangadal

¹⁴ Kaꞌilangan ipagpademdem mu nga pirmi it mga pagpamaalaꞌan mu ngayan i itu nga mga bagay. Baw ibenge-bengel mut kanira kat panleteg it Ampuꞌang Diyus nga ega na magdaꞌe-daꞌegen sira pasar it dakel-dakel nga ampang, in unuy pagpapuntuꞌan, sabap talagang egay liꞌwan ya nga magayen. Ipagkateꞌag-teꞌag lamang it pamayaꞌ it mga magpagneg.

¹⁵ Baw ta yanayan, paꞌresan mu nga magkasagyaan ka nga pirmi it Ampuꞌang Diyus. Kaꞌilangan, manigbuwat ka it buwaten it Ampuꞌang Diyus nga egay magkaꞌyaꞌan mu, baw purus tamaꞌ i pangadal mu it kamatuudan.

¹⁶ Paꞌalaidan muy mga egay kapulusan nga mga pagrundingen nga taw lamang i garing. Sabap egay beken nga liꞌwan kayan, ikapaꞌalaid it kaꞌirgan it Ampuꞌang Diyus.

¹⁷ Mga pangadal nirat kanira, subung talaga it maꞌget nga sarut nga magpanalakep. Dakel i mabalun nga maꞌakalan. Uyut it mga magpangadal it itu ngaytu, si Himeneo baw si Fileto.

¹⁸ Talagang nakapaꞌalaid na sira it kamatuudan, baw pagranggaꞌen nira pay pamayaꞌ it beken. Ka ipagpanulduꞌ nira nga iyan namayaꞌ ta nat Ampuꞌan, yanayan i paꞌaaten nga nagꞌegen ta na it paꞌuliꞌ. Ega na kunuꞌ i pagꞌiꞌinawaren tami nga egnen paꞌ kat pagdadarapaꞌen.

¹⁹ Temed talagang mapaꞌgeng-mapaꞌgen i kamatuudan nga garing duꞌut Ampuꞌang Diyus baw magꞌuꞌunay sikaytu i pamayaꞌ it mga taawan ya. Binggayan ya paꞌ sirat kariꞌgenan nga magꞌaat, “Magkakilalaan it Ampuꞌang Diyus i kumpur taawan ya nga matuud.” Baw paꞌugdun ya paꞌ, “Kaꞌilangan nga in siyuy magpamatuud nga nagpasakep na kanyat Ampuꞌan, paꞌalaidan yay muꞌsang karaꞌe-raꞌetan.”

²⁰ Ka ipaꞌalimbawa ta it esang mabakas nga balay. Ega naga maat bulawan baw pirak nay muꞌsang garamiten duꞌun. May kayu nagay binwat baw dakut. Iyan mga bulawan ngaytu baw pirak i binwat, paggamiten lamang in kat matataꞌas nga mga aldaw. Iyan kayu baw dakut ngaytuy binwat, yay garamiten it aldaw-aldaw.

²¹ Ta kayti, iyan mga taw nga magpaꞌalaid na kat muꞌsang karaꞌe-raꞌetan, iyan i subung it garamiten ngaytu nga ega basta-basta. Sabap iyan i nakasiguru nga kat Ampuꞌan ya na, nga magkapakinabangan baw alistu nga pirmi kat in unu nga magayen nga pagbuwaten.

²² Aypaꞌ iyan i magayen, paꞌalaidan muy mga ega magayeng adat baw bisyuꞌ nga kaꞌiꞌirgan it mga kamamangaꞌwaꞌan. Iyan i magayen nga paꞌresan mu, mataldeng i pangaꞌgenan mu, magmapaꞌgen i pagsarig baw pamayaꞌ mu it Ampuꞌan, kamatuudan i raras mu it masigkataw mu, baw maꞌimbeng i pakiꞌiba-iba mu it kumpur magpasakep it Ampuꞌan, nga magpangaꞌgenan uyun kat kamatuudan.

²³ Paꞌalaidan muy adat nga mapiyakidaꞌeg it egay kapulusan nga pakidaꞌeg. Urut mu na nga yay magkapꞌunan it babatir.

²⁴ Ka yay matuud, ega na magayeng adaten it manigsirbi na it Ampuꞌan i magpakibatir, in daꞌga nakman baw maꞌildaw it masigkataw ya, magkaꞌrut mangadal, baw masagkaꞌ it pakuriꞌ.

²⁵ Ireg kung sugiden, ayaw kat pakerat-kerat, in daꞌga luway-luway nga tulduꞌan muy mga magkuntraꞌ it imu. Ka barang ildawan naga sirat Ampuꞌang Diyus it magsinguliꞌ baw mangindiꞌ it kamaliꞌ nga pasepsep nira baw matantuwan na nira i kamatuudan.

²⁶ Ta daꞌga in atkayan, meyag nagay pikir nira. Egay beken, makapaꞌalikaꞌsut naga sira kat pamegbeg ni Satanas nga simnakep it kanira isaꞌun buwaten niray kaꞌirgan ya.